Meeqqat allaffiit ammarnissaanut ikiorneqarnissaminnik utaqqissappat?

- Meeqqat sulinerup avataatigut ikiorneqassappat? Imaluunniit allaffiit ammarnissaanut ikiorneqarnissaminnik utaqqissappat?, taama NIISIP siulittaasua Martha Lund Olsen Naalakkersuisunut ammasumik allakkamini ilaatigut allappoq.

NIISIP naapertorlugu qaangiuttoorluni sulinermi atugarisitat allanngortinneqalerput, suliffiup avataani sulinermi aaliangersimasumik tapeqalernikkut, 1.670 koruunit qaamammut qaammatinilu pingasuni 37 tiimer imaluunniit 52 timer iluaniissallutik, tiimimut 135 koruunit. Suliffiup avataani sulinermi, soorlu unnuakkut sapaatinilu, maannakkut 1.670 anguneqarsinnaasarpoq 6-8 timini sulinermi.

Qaangiuttoornermi akit qaffasinnerunikuusut

Martha Lund Olsen aamma naapertorlugu unnukkut, unnuakkut ullunilu illernartuni sulinermi qaangiuttoornermi akit qaffasinnerunikuusut. Tamannalu pissutigalugu inunnik isumaginninnermi pigaartut akissarsiakinnerulerput.

Isumaqatigiissummi allaqqavoq inunnik isumaginnittut ukiumut qaffaataat 1%-i missaaniittoq. NIISIP naapertorlugu tamanna inunnik isumaginnittunut ajorseriarneruvoq.

- Ilumoorpa inunnik isumaginninermi siunnersuisartut suliamillu ingerlatsisut sulinerup avataatigut piumaffigineqarsinnaanngitsut qangiuttoornissaminnnik, sapaatip akunneranut akunnerit 40-ut naamassereersimagunikkit?

Qanoq meeqqat ikiorneqassappat?

NIISIP isumaqarpoq inunnik isumaginninnermi siunnersuisartut isumaqartut, inuiaqatigiit soqutigisarigaat sulinerup avataatigut meeqqat tassanngaarnaq ikiortariaqalikkat ikiussallugit.

- Taamaattumik soqutigisaraarput ilisimassallugu qanoq Naalakkersuisut Kommunillu takorluuinersut suliffiup avataatigut qanoq meeqqat ikioorneqarnissaannut pisariaqartitsisut ikiorneqartalissanersut?

- Imaluunnit meeqqat sulinerup avataatigut ikiorneqassappat? Imaluunniit allaffiit ammarnissaanut ikiorneqarnissaminnik utaqqissappat? Inunnik isumaginninnermi politikki soqutiginartoq nutaaq, NIISIP allappoq. 

Isumaqatigiissut kingumoortumik 1. marsi 2023-mi atuutilissaaq. Isumaqatigiissutip isumaginninnermi siunnersortinut sullissisunullu piffissami tamatumani sivisunerusumik sulisimasunut qanoq sunniuteqassanersoq NIISIP-ip apeqquserpaa.

AK-mit peersitaasut

NIISIP-ip siulittaasua siulittaasullu tullia AK-mit anisitaapput AK-p tusagassiuutinut nalunaarutaa pillugu oqaaseqarsimanerat pissutigalugu.

AK-ip iliuusai tunngavigalugit - NIISIP misigisimavoq AK-mut toqqaannartumik saaffiginnissinnaanani taamaattumik toqqaannartumik Naalakkersuisunut ammasumik allagaqarput:

- Qaammat naatinnagu akineqarnissarput kissaatiginarpoq.