Meeqqat ataatsimeersuarneranni internetsimi isumannaallisaaneq sammineqarpoq
Ulluni makkunani NAKUUSA-p meeqqanut ataatsimeersuartitsinerani meeqqat 34-t sinerissamit tamarmit politikerit atorfillillu peqatigalugit peqataapput, tassanilu meeqqat internetsikkut illersorneqarnissaat pingaarnertut sammineqarpoq.
Ilulissani meeqqat ataatsimeersuarneranni internetsikkut attaveqaqatigiittarfinni meeqqat inuusuttullu qanoq illersorneqarsinnaanerat sammineqassaaq.
Assiliisoq: NUKUUSA
Ukioq manna meeqqat ataatsimeersuarneranni, meeqqat inuusuttullu internetsimi nittartakkani illersorneqarnissaasa sammineqarnissaa, Meeqqat Isummersorfiineersut namminneq aalajangerpaat.
- Silarsuarmi digitaliusumi unammilligassaqarneranik aarlerinartoqarneranillu paasinninnerat, taama toqqaanerisa ersersippaa. Inuit attaveqatigiittarfiinik internetsikkullu tusagassiivinnik annertusiartuinnartumik atuinerup, meeqqat internetsikkut attaveqatigiinnermi isumannaatsumik angalanisamut pisariaqartitanik sakkussaqarnissaannik ilisimasaqarnissaannillu qulakkeerinissaq suli naapertuunnerulerpoq, Tina Dam, Kalaallit Nunaanni UNICEF-ip allaffiani suliniutinut pisortaq, oqarpoq.
Ataatsimeersuarnermi politikerit immikkut ilisimasalinnit saqqummiivigineqassapput, meeqqanik oqaloqateqassapput kiisalu meeqqat inuusuttullu internetsikkut nittartakkani illersorneqarnerunissaannut anguniagassanik tigussaasunik oqaasertaliissallutik.
Meeqqat illersorneqarlik
- Meeqqat ataatsimeersuarnissaannut qaaqqussummut politikerit akuersisimanerat nuannaarutigaarput. Meeqqanik peqataatitsinermik- meeqqallu oqariartuutaannik naalaarnissamik pimoorussineq, tamatuma takutippaa. Internetsikkut nittartakkani innarliinernut misigisanullu allanut nuanniitsunut meeqqat inuusuttullu illersorneqarnerunissaannut, politikkikkut tigussaasunik iliuuseqartoqarumaarnissaa neriuutigalugulu upperaarput, Tina Dam nassuiaavoq.
Ataatsimeersuarnerup ingerlanerani ukioq manna kingusinnerusukkut Naalakkersuisut siulittaasuannut Múte B. Egede-mut politikerinullu allanut, pisortatigoortumik nalliuttorsiorpalaartumik katerinnermut atatillugu saqqummiussassaminnik tigussaasunik, meeqqat innersuussuteqarnissaat pilersaarutaavoq.
