Meeqqat atuarfianni nalinginnaasumik atuarneq kingulleq Sisimiuni nalliussineqarluarpoq
Sisimiuni tallimanngornerup unnuaa, maajip ulluisa 24-iat unnuuvoq nalinginnaasuunngitsoq. Minngortunnguup Atuarfianeersummi atuartut naggataamik atuartussaanertik malunnartinniarlugu illoqarfimmi nipilioqalutik angalaarput. Atuartut 10.a-neersut 10. b-neersullu ullaassaq nalunaaqutaq 04.30 illoqarfimmi nipiliorlutik aallartipput.
Dorthea Reimer-Johansen
Tallimanngornerup maajip 24-ata unnuaani nalunaaqutaq 04.30-miit inuusuttut qalipaatigissaartunik atikkersorsimallutik Sisimiuni innuttaasut tamaasa nipiliorfigalugit itersarpaat.
Anguniagaat ersarippoq: Meeqqat atuarfianni atuarunnaalernertik kikkunnut tamanut paasitikkusuppaat.
Ileqqut malillugit ilinniartitsisut tulleriaarlugit angerlarsimaffiannut aaneqarput. Tassani illarpalaaq, nillianerit nuannaarnerillu tusarsaapput. Naggataatigut atuarfiup pisortaata angerlarsimaffia tikinneqarpoq. Pisortarlu iteqqaannerpaseqaluni pisoqataalerpoq.
Nalunaaqutaq ullaakkut arfininngorluinnartoq soraarummeertut atuarfimmut apuupput, tassani ullaakkorsiutit piareeqqapput. Ilinniartitsisut, atuartut atuarfiullu pisortaa ullaakkorsioqatigiillutik ataatsimuussapput.
Soraarummeertut atuarfimmut isileramik pisortamiit ima oqarfigineqarput:
- Iserussi, tassa naggataamik atuariartussaasi. Tulliani iserussi, tassa misilitsikkiartorlusi, taama oqarpoq Minngortuunnguup Atuarfiani pisortaq, Hans C. Jensen.
Atuartut misilitsinneri naammassippara, inaarutaasumik misilitsissimanerminnut allagartatik juunip qaammataata qeqqani tigussavaat.
