KL

DK

Meeqqat pillugit Siunnersuisoqatigiit kalaallit meerartaannut tunngasut suliareqqinneqassasut kissaatigaat

Meeqqat angerlarsimaffiup avataanut inissinneqarnissaannik aalajangiineq qularutigineqarpat tamanna meeqqamut iluaqutaassasoq siunnersuisoqatigiit isumaqarput.

Kalaallit meerartaannik pinngitsaaliissummik Danmarkimi arsaarinnittarneq angajoqqaanullu nalilersuutit Folketingimi oqallisigineqarput. Isumaginninnermut ineqarnermut ministeri Sophie Hæstorp Andersen (S) aamma IA-miit Aaja Chemnitz tamanut ammasumik isumasiuinermi januaarip arfineq-aappaanni ingerlanneqartumi peqataapput.
Ritzaus Bureau
Saqqummersinneqarpoq

Kalaallit meerartaannik angerlarsimaffiup avataanut inissiisoqarnerani eqqarsartaatsikkut misissuutit angajoqqaanut naleqqussarneqarsimanngitsut atorneqarsimappata suliat suliareqqinneqartariaqarput.

Siunnersuisoqatigiinni siulittaasoq Bente Boserup Ritzauimut oqarpoq.

- Kommunit suliat suliareqqilereersimmanngikkunikku misissoqqissaartariaqarpaat. Angajoqqaat eqqarsartariaasiinut misissuttit angerlarsimaffiup avataanut inissiinermut aalajangiinermut sunniuteqarsimanersut misissorneqassallutik, oqarpoq.

- Kukkusumik tunngavilimmik meeqqamik angerlarsimaffiup avataanut inissiineq meeqqap ilaqutariittut inuusinnaatitaaneranik pisussaaffiinut unioqqutitsineruvoq, tamannalu ilungersunartuuvoq. Qulartoqarpat meeqqat iluaqutigissavaa.

Meeqqat pillugit siunnersuisoqatigiit naalagaaffiup pilersitarai politikkikkut aningaasatigullu pituttorsimanngitsut. Isumaginninnermut utoqqarnullu ministerimit toqqarneqartartunik siulittaasortaqarput arfineq-pingasunillu ilaasortaqarlutik.

Qallunaat kalaallillu meerartaat pillugit aalajangiinerni angajoqqaat eqqarsartaatsikkut piginnaaneri tunngavigalugu misissorneqartarput.

Misissuutit kalaallit kulturiannut oqaasiinullu naleqqutinnginnerat isornartorsiorneqarpoq, kukkusumillu tunngaveqarluni inissiinermik kinguneqarsinnaasoq isornartorsiuisut isumaqarput.

Isornartorsiuineq pissutigalugu qallunaat kalaallillu naalakkersuisui isumaqatigiissuteqartut isumaginninnermut ineqarnermut ministeriaqarfik sapaatiummat tusagassiuutinut nalunaarummi allappoq.

- Danskit naalakkersuisuisa pimoorussillutik isornartorsiuineq tusaavaat, kalaallinit kingoqqisunik ilaqutariinnut suliani misissuisarnerit pineqartillugit. Qularnerup kinguneranik danskit naalakkersuisui aamma Naalakkersuisut ataatsimoorussamik aaqqiissutissamik nassaarput, tusagassiuutinut nalunaarummi allassimavoq.

Isumaqatigiissutip imarisai sukumiinerusut sapaatip-akunnerani matumani kingusinnerusukkut saqqummiunneqassapput ministeriaqarfik Ritzauimut ilisimatitsivoq.

2024-mi aasaanerani Inuit Pisinnaatitaaffii pillugit Siunnersuisoqatigiit nunami kommunit annersaannut tallimanut misissuutit atorunnaaqqullugit kajumissaarpaat.

Tamatuma kingunerisaanik Københavnip Esbjergillu kommuneanni misissuutit atorunnaarsinneqarput.

Kommunit misissuutit atorunnaarnissaat eqqarsaatigisariaqaraat isumaginninnermut ineqarnermut ministeri Sophie Hæstorp Andersen (S) Ritzauimut 2024-mi novembarimi oqarpoq.

Aamma eqqarsartaatsimik misissuutit assigisaallu kalaallisuunngortinneqarsinnaanersut kulturimullu naleqqussarsinnaanersut ministeriaqarfimmi misissuineq aallartinneqartoq ilanngullugu paasissutissiissutigaa.

Misissuineq inatsisissatut siunnersuutigineqartup tunngavigineraa iluamik erseqqissarneqanngilaq.

/ritzau/

inuit ataqatigiit inuiaqatigiit forældrekompetenceundersøgelser tvangsanbringelser samfund socialområdet

ATORFIIT Se alle jobs

Powered by Labrador CMS