Meeqqat pillugit suliarpassuit suliarisarpaat: – Ulapittaqaagut

Meeqqat inuusuttuaqqallu pillugit suliat 362-it. Meeqqat inuusuttuaqqallu Tasiilami nunaqarfiinilu tallimaasuni suliaqarfigineqartut tassa taama amerlatigipput. Tasiilami kommunip Meeqqanut Ilaqutariinnullu Immikkoortortaqarfiani sulisut qulingiluaasut taakkua avillugit suliassaraat. Agguaqatigiisillugu inuk ataaseq 40-nik suliassaqarluni.

Sulianik isumaginnittut marluk allaffianni, atuarfimmut peqqinnissaqarfimmullu qanittumi inissisimasumi naapippagut. Immikkoortortaqarfimmi pisortaq Sara Kristensen aamma sulianik isumaginnittoq Thomasine Sanimuinaq qanoq ulapitsigisarnersut aperigatsigit akissutaat ersarippoq.

- Ullaarnaniit ulapputtaqaagut, Sara taama oqartorlu suleqataa ilaliivoq.

- Ulapinnarujussuartarpoq ilungersunartarlunilu, Thomasine oqarpoq.

Inuuniarnikkut ajornartorsiutit

Kommuneqarfik Sermersuup aggustimi 2025-mi kisitsisaatai malillugit Tasiilami meeqqani 560-iusuni 274-it kommunip isumaginnittoqarfiani suliassatut nalunaarsorneqarsimapput. 

Tasiilami nunaqarfinni tallimaasuni meeqqani 249-ni 88-it kommunimit suliaqarfigineqartussanngorsimasut. Suliassanngortitsisoqartarneranut peqqutaasut arlaqarput.

- Inissaaleqinerujussuaq taanna ilaavoq, aamma suliffissaaleqineq. Immaqalu aamma atuisuunermi kaaverujoorneq. Angajoqqaat soorlu atornerluisuusimappata kaaverujoorneq, Sara Kristensen nassuiaavoq.

Sulianuttaaq ilaasarput meeqqat angerlarsimaffiup avataanut inissinneqarsimasut. Sulianimi 362-iusuni 133-t angerlarsimaffiup avataani inissinneqarsimasunut tunngapput.

- Meerannguit ilai, arlallit angajoqqaaqanngillat. Nalunngisattut ilaatigut angajoqqaatut oqartussaasut peerussimasarput. Taamaalillutillu angajoqqaarsianiittarlutik, Sara Kristensen taama oqarpoq.

Danmarkimeersut takkupput – angerlaqqillutilli

Tasiilami meeqqat affaasa suliassaqarfigineqarnerat nunatsinni tusagassiorfinni ukiut qulit matuma siorna sammineqaleqqaarmat meeqqat Tasiilami 1.000-it missaanniipput, suliallu 477-iullutik. Illoqarfiup inukilliartornera ilutigalugu meeqqat maanna 560-it Tasiilamiipput. 

Nutaarsiassaq suliarpassuarnut tunngasoq saqqummiunneqareersorlu Danmark nunatsinni meeqqat kinguaassiutitigut atornerlunneqarsimasut sullinneqarnissaannut 80 mio. koruuninik 2019-imi aningaasaliivoq. Taakkua ilaat Tasiilami meeqqanut sullissisussanut atorneqarmata suliartortoqartarnikuuvoq.

- Kisianni qallunaarpassuit aallaqqikkaangata sulisut nungoqqittaramik imaluunniit nungungajattaramik sagsbehandlerit. Taanna nukillalaarnartorujuugami, Sara Kristensen oqarpoq.

Taamaammat suliarpassuarnik isumaginnittut nungoqqinngiassammata allaanerusumik eqqarsarluni iliuuseqartoqarpoq. Nunaqavissut allanik ilinniagaqareersut atorfiniortortinneqarput, ilinniaqqinnissaallu aqqutissiuunneqarluni.

- Socialrådgiverimut atorfimmut nivinngaagaangatta qinnuteqartoqarneq ajorami kitaaninngaanniit. Taamaalilluni allaanerusumik suliniuteqarneq isummiunneqarpoq. Nunaqavissut soqutiginnittut sagsbehandlerisut sulisinnaasut pikkorissartarnerit ilinniaqqinnerillu ataavartut ingerlatissallugit maani, Sara Kristensen taama oqarpoq.

Siunnersortillu ikiortaattut ilinniarneq Tasiilami SPS suleqatigalugu aaqqissuunneqartoq oktobari qaammat 20-nik ilinniartoqarluni aallartinneqarpoq.

Nunaqavissut aqqutissaapput

Siunnersortit ikiortaattut ilinniartut ilaatigut tassaapput maani Meeqqanut Ilaqutariinnullu Immikkoortortaqarfimmi sulisut.

- Taanna pingaaruteqartorujuussuvoq, maani nunaqavissunik aamma tigusinissaq. Taavalu pingaaruteqartorujussuuvoq maani nunaqavissut ilinniagaqaqattaarnermikkut manna inoqartittuaannassagaat.

Kommunip isumaginnittoqarfiata inoqartinneqarnissaa kisimi pineqanngilaq. Sullitammi aamma eqqarsaatigineqarput.

- Nammineq oqaatsitik atorlugit oqalussinnaaneq aamma pineqartunut iluaqutissartaqartarami. Tamarmik kitaamiusut pikkorinnginnamik tamarmik aamma qallunaatut pikkorinnatik. Taamaammat kulturi aamma taanna sullitanut toqqissisimatitsisarpoq.

Ikilissappata qanoq iliortoqarsinnaava?

Soorliuna meeqqat pillugit kommunip suliai ukiut qulit ingerlanerani nikissimanngitsut? Apeqqut taanna sulianik isumaginnittunut apeqqutigissallugu akissutisissarsiniassallugulu inissaminiippoq.

- Taannartaa akisinnaanngilara. Ukiut kingulliit suliniutit annertoorujussuit ingerlanneqarput meeqqanut tunngatillugu. Sullissisut amerlinikuupput, aamma taakkununnga sullissisut ikilisaaqataaniarlutik, Sara Kristensen oqarpoq.

Ataaserli qularnanngilaq. Meeqqanik sumiginnaanerujussuaq unitsinneqassappat imigassamik ajornartorsiuteqarneq qaangerniarneqartariaqartoq sulianik isumaginnittut aqutsisuata qularinngilaa.

- Annertoorujummik imigassaq tamaani ajornartorsiutaasoq nalunngilarput. Aamma tusartarparput ikiaroornartoq atugaalersimasoq. Pinaveersaartitsinermi suliaqarneq immaqa ersarinnerusinnaavoq maani kommunerisatta iluani, Sara Kristensen oqarpoq.

Kisitsisit allaaserisami aallaavigineqartut aggustip naaneraneersuupput. Sermitsiamit Tasiilamut tikeraareernitta kingorna, meeqqani 560-iusuni 240-t suliassaqarfigineqalersut kommunip oktobarip 22-ani nalunaarutigaa. Nunaqarfinni tallimaasuni meeqqat 249-t akornanni 78-it suliassaqarfigineqarput. Imaappoq Tasiilami nunaqarfiinilu suliassat meeqqanut tunngasut katillugit maanna 318-upput.