KALAALLIT NUNAANNI POLITIIT
Meeqqat toqqissisaatissaat bamseeqqat
Pisuni sakkortuuni, politiillu orniguttariaqarfiini, meeqqanik najuuttoqarsinnaasarpoq. Meeqqamullu sakkortuumik misigisaqartumut politiit aamma bamseerannguaq meeqqap nalaataqarnerani meeqqamut annertoorujussuarmik isumaqarsinnaapput toqqissisaataallutillu. Taamaattumik Kalaallit Nunaanni Politiit, Nordjyllands Politiit isumassarsiorfigalugu, Kalaallit Nunaanni Politiit bamseeqqanik nuersakkanik nissikullattakkanilluunniit meeqqanut sulinerminni naapitaminnut tunniussassaminnik piareersimasuuteqalernikuupput.
Pisuni ilungersunartuni sakkortuunilu meeqqat najuullutillu isiginnittuuffigisaanni, politiillu orniguffigisaanni, meeqqat bamseerannguanik pakkussinnaasaminnik Kalaallit Nunaanni Politiinit tunineqartalerput.
Kalaallit Nunaanni Politiit Facebookikkut quppernerminni nalunaarutigaat, Nordjyllandimi Politiit suliniutaannit isumassarsiorlutik, Kalaallit Nunaanni meeqqanut bamseeqqanik agguaassassaminnik peqalersimallutik.
- Pingaaruteqarpoq meeqqat isumassorneqarluarnissaat, pisuni atoruminaatsuni najuussimatillugit, tamatumunngalu bamseeqqat pakkutaarneqarsinnaasut iluaqutigineqassapput. Bamseeraq pakkutaarneqarsinnaasoq aamma kaasarfimmiorineqarsinnaasoq toqqissisaatissatut eqqarsaataavoq, taamaammallu meeqqap assaanut naleqquttumik angissuseqarpoq kaasarfimminullu ikisinnaavaa. Piffissami ajornartorsiorfiusumi bamseeraq meeqqamut toqqissisimanerulersitsisinnaavoq, pisup sakkortuup meeqqap isiginnittuuffia ungavartinneqarsinnaavoq aammalu meeqqamut nalaataqarnerlukkaluarluni nuannersumik eqqarsalersitsisinnaalluni.
Bamseeraq siaruariartorpoq - aamma illit ikiuussinnaavutit
Kalaallit Nunaanni Politiit nalunaarutigaat bamseeqqanik agguaassisarneq Kalaallit Nunatsinni siuaruariartulersoq sumiiffinnilu arlalinni atuutilereersoq, politeeqarfiilli arlallit suli bamseeraateqalersimanngillat.
- Meeqqanut ikiukkatsinnut bamseeqqanik agguaassassanik pilersueqataarusukkuit, bamseeraliatit politeeqarfimmut illit qanitanniittumut tunniussinnaavatit, Kalaallit Nunaanni Politiit kaammattuuteqarput.
Bamseeraq nuersagaanngikkuni nissikalluttagaq qanoq sananeqartarnersoq ilitsersuuteqarpoq, taannalu politiit nittartagaanni nassaarisinnaavat.
