Meeqqat tuluttut oqalunnissartik toqqaraat

Kalaallit meerartaat qallunaatut oqalukkusunngillat, akerlianilli tuluttut oqalukkusunnerullutik. Oqaluttuaq taanna nutaajunngilaq, taamaattumik tuluit oqaasiisa takornartat oqaasiisut siullertut ilinniartitsissutigineqartalernissaannik meeqqat kissaateqarnerat tusaanngitsuusaaginnarneqarsinnaajunnaarpoq. Taama oqarpoq Avannaata Kommuniani 1. viceborgmesteri aamma Inatsisartuni ilaasortaq, Jens Napãtôᴋ', Naleraq. Ilinniartitsisut Meeqqat Atuarfianneersut Kattuffianni, IMAK-imi siulersuisunut ilaasortamit taanna taperserneqarpoq.

Meeqqat tusaaneqarlik 

Jens Napãtôᴋ'-p oqarnera naapertorlugu Kalaallit Nunaata nunarsuarmioqataaleriartornera ilutigalugu qallunaat oqaasiisa siornatigumut naleqqiullugu pisariaqartinneqarnerat annikilliartorpoq.

- Meeqqat atuarfianni tuluit oqaasii takornartartut oqaasisut siullertut ilinniartitsissutigineqartariaqartut, innuttaasut amerliartuinnartut minnerunngitsumillu meeqqat isumaqarput.

- Meeqqat tuluttut oqalunnissartik nammineerlutik toqqarpaat qallunaatullu oqalukkusunngillat, tamannalu tusaaneqartariaqarpoq.

- Meeqqat oqaatsit namminneq ilinniarusutaat aallaavigalugu ilinniartitsisoqartariaqarpoq, tamannami meeqqaat pitsaasumik angusaqarnissaannut qulakkeerinnitsuussaaq, taanna oqarpoq.

Meeqqat piumasaannut akerliusumik oqaatsit pillugit politikkikkut siunnerfeqarneq pissusissamisuunngitsoq, Jens Napãtôᴋ' aamma ilinniartitsisutut ilinniarsimasoq isumaqarpoq.

Meeqqat siunissamut aqqutissiuussisut 

Tuluit oqaasii atorlugit nunarsuarmi pisunut meeqqat malinnaasut amerliartortut, taanna isumaqarpoq.

- Oqaatsinik ilinniarusunngisaannik meeqqat pinngitsaalillugit ilinniartissinnaanngilagut. Ukiorpassuit qallunaat periusaat atorlugu atuarfik ilusilersorneqarsimavoq, maannakkulli pissutsit piviusut atuuttut aallaavigalugit ineriartortitsineq aallartinneqartariaqarpoq, taanna oqarpoq.

Qallunaatut oqalussinnaasut qallunaatut oqalussinnaanngitsunut naleqqiullugit piginnaaneqarnerusutut isigineqartarnerat pissusissamisuunngitsoq, taanna aamma isumaqarpoq.

- Nunarsuarmi inuit 1,5 milliardit missaat tuluttut oqaluttuupput, akerlianillu qallunaat oqaasii inuit 6 millionit missaasa taamaallaat atorpaat. Meeqqallu nunarsuarmi ineriartornermut sukkaqisumut malinnaagamik qanoq iliussanersugut oqaluttuunniarsaaratigut, taakkuuppullu meeqqat atuarfiata qanoq ilusilersornissaannut aqqutissiuussisut.

- Qallunaat oqaasiisa atorneqarnerat annikillisaaffigigasuartariaqarput, kisiannili aamma meeqqat atuarfiani qallunaat oqaasii toqqagassaasinnaasut Naleqqamiik isumaqarpugut, taamatulli isumaqarnerput qallunaaluarnermik pissuteqanngitsoq Naleqqamiik ersarissarusupparput, Naleqqamiit politikeri nuimasoq oqarpoq.

Maannakkut killiffik eqqarsaatigalugu nutaamik oqaatsinut politikkeqalernissaq Naleqqamiit anguniarneqartoq, taassuma erseqqissaatigaa.

Tuluttut oqaatsit piumanerugaat 

Helene H. Heilmann Maniitsumi meeqqat atuarfianni Atuarfik Kilaaseeqqami ilinniartitsisuuvoq aammalu Ilinniartitsisut Meeqqat Atuarfianneersut Kattuffianni, IMAK-imi siulersuisunut ilaasortaalluni. Ukiuni kingullerni meeqqat tuluit oqaasiinik atuisut, qallunaat oqaasinik atuisunut naleqqiullugit malunnaatilimmik amerlanerulersimanerat IMAK-imi oqaluuserineqartartoq, taassuma oqaatigaa.

- Internetsimik atuinerup annertusiartornera ilutigalugu tuluit oqaasii meeqqat sukkasoorujussuarmik ilikkartarpaat.

- Meeqqat qallunaatut ilinniarnissartik piumarpiarunnaaraat maluginiarparput, meeqqallu atuartut affaasa missaat imaluunniit amerlanerusut atuarfiup avataani tuluttut oqaatsinik annertuumik atuipput.

- Aammali meeqqat tuluttut oqalukkusunnerusut qallunaatut ilinniartinneqarnertik ilungersunartutut isigissappassuk tamanna ilisarnartorujussuuvoq. Kisianni aamma ilaqarput qallunaat oqaasiinik ilinniartitsisarnermut akerliusunik, tamannalu immaqa aamma angajoqqaaminniik tusartarsimasinnaavaat, taanna oqarpoq.

Aammali meeqqat ilaasa tuluttut oqaatsit atorlugit ilaanni nassiuaagaangata, tamanna meeqqat angajoqqaallu akornanni oqaatsitigut paaseqatigiinniarnerannut ajornartorsiutaasinnaasartoq, Helene H. Heilmann oqarpoq.

Ernumanartoqartoq 

Meeqqat amerliartortut ulluinnarni imminnut tuluttut oqaluuttartut amerliartortut, taanna erseqqissaavoq.

- Tamanna nunarsuarmioqatigiinnut attaveqarnissaannut iluaqutaagaluartoq, taamaattoq kalaallisut oqaatsit atorneqarnerannut akornutaasinnaasoq isumaqarpunga.

- Meeqqat ilaasa tuluit oqaasiinik atuinerat imak annertutigilersimavoq kalaallisut oqaatsit tunulliunneqapajaartalersimallutik allaat, tamatumalu ilaatigut kingunerisaanik kalaallisut oqqarluttut amerliartorput.

- Ukiut arfineq pingasut qulillu missaasa siornatigut qallunaatut oqalukkusuttut amerlapput, kisiannili massakkut tuluttut oqalukkusuttut amerlanerulernikuupput, Helene H. Heilmann oqarpoq.

Meeqqat atuarfinni 1.klassemiik takornartat oqaasii annikitsumik ilinniartitsissutaasarput, 3.klassemiillu ilinniartitsineq annertusiartuaartinneqartarpoq.

Oqaatsinut politikki ujartorneqartoq 

Meeqqat atuarfinni qallunaat oqaasiisa takornartat oqaasiisut siullertut ilinniartitsissutigineqartarunnaarlutik, tuluit oqaasii siullertut ilinniartitsissutigineqartalernissaat IMAK-imi eqqartorneqartut ilagaat.

- Ilinniaqqiffinni amerlanerpaani qallunaatut atuakkat atorlugit ilinniarneq ingerlasarpoq, tuluillu oqaasii taarsiullugit atorneqassappata tuluttut atuakkat ilinniartitsisullu tuluttut oqaluttut amigaataalissapput, taanna oqarpoq.

Siunissami qaninnerusumi oqaatsinut politikki nutaaq ilusilersorneqartariaqartoq, tamannalu ilinniartitsisut, ilisimatusartut atuartullu peqatigalugit ingerlanneqartariaqartoq, Helene H. Heilmann isumaqarpoq.