Mette F. ammaanersiorluni oqalugiarnermini: Naalagaaffeqatigiinneq pissutsinut nutaanut naleqqussartariaqarpoq
Kalaallit Nunaat naalagaaffeqatigiinni issittumi nunani annersaavoq. Taamaattumik Issittumi Siunnersuisoqatigiinni siulittaasoqarfik Danmarkip aappaagu akisussaaffigilerpagu Kalaallit Nunaata siulittaasuuinnarnissaa pissusissamisoorpoq. Ministeriuneq Mette Frederiksen Folketingimi ammaanersiorluni oqalugiarnermini marlunngornermi oktobarip aallaqqaataani oqarpoq.
Naalagaaffeqatigiinnermi nunat pingasut naligiimmik ataqqeqatigiinnermillu ataqatigiissasut ministeriuneq Mette Frederiksen ammaanersiorluni oqalugiarnermini oqarpoq.
Ass.: Liselotte Sabroe/Ritzau Scanpix
Nunanit allanit pissutaasut arlallit pissutigalugit naalagaaffeqatigiinneq allanngortariaqarpoq piviusunullu nutaanut innuttaasunut pingasunut naleqqussartariaqarluni. Ministeriuneq Mette Frederiksen (Soc.) Folketingimi ammaanersiorluni oqalugiarnermini marlunngornermi oktobarip aallaqqaataani oqarpoq.
Mette Frederiksenip oqalugiarnermini naalagaaffiup killiffia eqqartorpaa.
- Savalimmiut, Kalaallit Nunaata Danmarkillu naalagaaffeqatigiinnerat inuiaqatigiit pingasut inuuffigisaattut allanngortariaqarpoq. Allanngorneq tamanna pitsaasumik qanittumillu suleqatigiinnikkut pisinnaammat nuannaarutigaara, nunallu namminneq kinaassutsitik aallaavigalugit ataqqeqatigiinnerannit allaaveqarluni, Mette Frederiksen oqalugiarnermini oqarpoq.
Ukiuni kingullerni sorsunnerit, nappaalanersuaqarneq Issittumillu soqutiginninnerulerneq eqqaavai.
Kalaallit Nunaat siulittaasutut
Statsministerip erseqqissaqqippaa Kalaallit Nunaat naalagaaffeqatigiinni issittumi nunani annersaasoq.
Taamaattumik Issittumi Siunnersuisoqatigiinni Kalaallit Nunaat siulittaasuussaasoq oqaatigeqqillugu. Danmarkip Issittumi Siunnersuisoqatigiinni siulittaasuuffimmik 2025-mi tigumminnittuulissaaq.
- Naalagaaffeqatigiinni issittumi nunat annersaraat. Taamaammat naalagaaffeqatigiit siulittaasuuffik tiguppagu Kalaallit Nunaat siulittaasuussaaq. Tamanna naligiimmik ataqqeqatigiinnermillu pissaaq. Aamma naalagaaffeqatigiinni nutaaliornissamik sapiissuseqarpugut, Mette Frederiksen oqarpoq.
Ministeriunerup Folketingimi ammaanersiorluni oqalugiaataa sisamanngornermi oktobarip pingajuanni oqaluuserineqassaaq.
