KL

DK

Mette F.-ip toqqaannartumik oqalutseqarneq nersualaaraa: Ulloq oqaluttuarisaanermut ilannguttoq

Folketingip siulittaasoqarfiata Folketingimi toqqaannartumik oqalutseqarsinnaanermik akuersissuteqarnera Mette Frederiksenip nuannaarutigaa.

Ministeriuneq Mette Frederiksen ullumi Folketingimi apeqqarissaarnermi toqqaannartumik oqalutseqarnermut tusarnaarpoq.
Ritzaus Bureau
Thomas Munk Veirum
Tusagassiortoq
Saqqummersinneqarpoq

- Ulloq manna toqqaannartumik oqalutseqarneq oqaluttuarisaanermut ilannguppoq.

Folketingimi marlunngornermi ministeriunermut apeqqarissaarnermi ministeriuneq Mette Frederiksen (S) taama oqarpoq.

Aki-Matilda Høegh-Damip Siumumeersup ministeriunermik kalaallisut oqaluffiginninnera apeqquteqarfiginninneralu tamatumunnga pissutaavoq.

Folketingimi Siulittaasoqarfik, partiit annerpaat tallimat ilaasortaatitaat, apeqqarissaarnermi toqqaannartumik oqalutseqarneq misilinneqassasoq aalajangersimavoq.

- Tamanna nuannaarutigeqaara, isumaqarama Siulittaasoqarfik eqqortumik aalajangiisimasoq, ministeriuneq oqarpoq.

- Nunanit tamalaanit peqataaffigineqartartunik ataatsimiinnerpassuarnut toqqaannartumik oqalutseqartunut peqataasarpunga, tamannalu ingerlassinnaakutsoorparput, Mette Frederiksen oqarpoq.

Tapersersuinermut qujasoq

Aki-Matilda Høegh-Dam maligassiuisimasutut aaqqissuussinermillu maanna misiliutitut ingerlanneqartumik sorsuutiginnissimanera pillugu ministeriunerup qutsavigaa.

Aki-Matilda Høegh-Dam oqarpoq oqalutseqarneq pillugu apeqqut Inuit nunap inoqqaavisut Kunngeqarfimmi naligiimmik ataqqineqarnissaannut tunngasoq.

Aki-Matilda Høegh-Damip aamma ministeriuneq qutsavigaa toqqaannartumik oqalutseqarnissamik kissaateqarneq tapersersormagu.

Folketingimi ilaasortap apeqqarissaarnermi toqqaannartumik oqalutseqarneq atorlugu kalaallit meerartaasa Danmarkimi pinngitsaaliissummik arsaarinnittarnerit pillugit Mette Frederiksen aperaa.

Ministeriuneq pinngitsaaliissummik arsaarinnittarneq pillugu: Ilaannikkut meeqqap angerlarsimaffimminit qimagutsinneqarnissaa eqqortuliornerusinnaavoq

Ministeriuneq akivoq angerlarsimaffiup avataanut inissiineq tamatigut ilisimasaqarluarluni tunngavissaqarluartumillu tunngavilersuuteqarnermit aallaaveqartariaqartoq:

- Oqartussaasut suliaminnik nakkutiginninnissaannut tunngaviusumik tatiginnippunga, soorunami kukkusoqarpat eqqumaffigisariaqarparput.

- Nalunngilara isumaginninnermut ministerip tamanna soqutigingaaraa, ersarippoq naalagaaffeqatigiinni uagutsitut ittumi nunat killeqarfii akimorlugit nuussinnaassuseqarfiusumi suliap suliarineqarnerani ilisimasaqarfigisariaqakkatsinnik ilisimasaqarnissaq eqqumaffigisariaqaripput. Nalunngilara isumaginninnermut ministeri Naalakkersuisullu oqaloqatigiilluartartut.

- Isumaqarpunga suleqatigiinnerup tamatuma ingerlatiinnarnissaa pisariaqartoq, aammali meeqqat atugarliornerpaat pillugit sorsuutiginnittuaannarsimasutut aalajangiusimavara ilaannikkut meeqqap angerlarsimaffimminit qimagutsinneqarnissaa eqqortuusartoq, uagut allat isumagisinnaaniassagatsigu, Mette Frederiksen oqarpoq.

simultantolkning siumut aki-matilda høegh-dam folketinget inuiaqatigiit mette frederiksen samfund

ATORFIIT Se alle jobs

Powered by Labrador CMS