Mette F. Kalaallit Nunaannut: Ataqqingaarpassi
Inuiaqatigiit kalaallit USA-mit kingullertigut annertuumik kimigiiserfigineqarnerminni iliuusaat pillugu Ministeriuneq Mette Frederiksen nersualaarinnippoq.
- Qunusiarineqartutut taqiinnanngilasi - Kinaassusersi pillugu nikussaarpusi. Tamanna pillugu ataqqingaarpassi, Mette Frederiksen pingasunngornermi unnukkut kalaallinut allappoq.
Assiliisoq: John Thys/AFP/Ritzau Scanpix
Ulluni kingullerni USA-p nunarsuarmi pissaanilissuup Kalaallit Nunaat Danmarkilu sakkortuumik kimigiiserfigai, kimigiiserfigineqarnerlu pillugu qisuariaatigineqartut pillugit Facebookimi takkajaamik allalluni statsministeri annertuumik inuiaqatigiinnut kalaallinut nersualaarinnippoq:
- Maluginiarneqarneq annertoorujussuuvoq kimigiiserfigitinnerlu aamma sakkortulluni. Taamaattorli piffinni taamaattuni, takutinneqarpoq inuiaqatigiittut qanoq nukittutiginersusi. Qunusiarineqartutut pissusilersunngilasi. Kinaassusersi pillugu nikussaarpusi - aamma takutipparsi ilissinnut suna pingaaruteqarnersoq. Taanna pillugu ataqqinninnera ilissinnut apuukkusuppara, ministeriuneq allappoq.
Statsministeri allatamini killiffik pillugu naliliivoq, taassumalu erseqqissaatigaa, nalaataq imaannaanngitsuusoq aammalu suli sivisuumik ingerlasinnaasoq:
- Qularutissaanngilaq nalaatarput maanna ajornaatsuinnaanngitsoq, aamma taamatut nalaataqarnerput sakkukillisarlunilu sakkortusisassaaq - ilimagineqarsinnaallunilu sivisuumik taamaattoqassasoq.
Vance ilumoornerarpaa
- Tikeraartoqassaaq, tikeraartoqassanngilaq, kinguninngualu nutaamik tikeraartoqassaaq. Tamakku pinngippata nutaamik pisoqassaaq isummerfigisariaqakkatsinnik, Mette Frederiksen allappoq, paasilluarsinnaanerarlugulu misigissutsit sukkasuumik mumissinnaasarmata, ilaanni ernumassuteqarnermik misigisimaneq, tullianilu eqqissiallannermik misigisimaneq paarlakaajaallutik.
Taassuma mianersoqqussutigaa Trumpip Kalaallit Nunaannut soqutiginninnera qaangiutissasoq isumaqalersinnaasunut, kisianni aamma kaammattuutigaa USA-mut suleqatigiinnissamut suli ammasuunissaq.
Ministeriunerup aamma vicepræsident Vance ilumoornerarpaa Danmarkip Kalaallit Nunaanni eqqaanilu isumannaallisaanermut iliuuserisimasaanut isornartorsiuimmat:
- Præsidentip tullersortaa Vance assersuutigalugu oqarpoq, USA imaluunniit Danmark Kalaallit Nunaanni eqqaanilu isumannaallisaanermut naammattumik iliuuseqartarsimanngitsut, taava tamanna kukkunerunngilaq, ministeriuneq allappoq.
