KL

DK

Mette F. Trumpip oqaaseqaatai kingulliit pillugit: Danmark USA-p iligaa pitsaasoq

Donald Trumpip oqaaseqaatai kingulliit danskit naalakkersuisuisa isummernerannik allanngortitsinngillat, ministeriuneq apersorneqarami oqarpoq.

Sapaatip unnuaani Amerikamiut præsidentiat Donald Trump Kalaallit Nunaat pillugu oqaloqatigiinnissamut kissaateqarnera uteqqippaa. Sapaatikkut ministeriuneq Mette Frederiksen (S) oqarpoq, danskit naalakkersuisuisa isummernerat allanngunngitsoq. (Arkivfoto).
Ritzaus Bureau
Saqqummersinneqarpoq

USA-p præsidentiata Donald Trumpip Kalaallit Nunaat pillugu oqaaseqaqqereernerata kingorna ministeriunerup Mette Frederiksenip (S) Danmark USA-mut pingaaruteqartumik suleqataasoq eqqaasissutigaa.

- Danmark suleqataalluartuusimavoq, suleqatigilluarpugut taamaattuarnissarpullu pilersaarutigalugu, TV 2-mit sapaammi apersorneqarluni oqarpoq.

Aamma DR-imut oqarpoq oqaaseqaatit nutaat Donald Trumpip Kalaallit Nunaannik aqutsilernissamik kissaataanut danskit naalakkersuisuisa isiginnittaasiannik allannguinavianngitsoq.

- Præsidentip oqaasii tusareersimavagut. Akissutigisarpullu aamma allanngunngilaq, DR-imut oqarpoq.

DR naapertorlugu ministeriunerup Mette Frederiksenip (S) innersuussutigaa Naalakkersuisut siulittaasuata Múte B. Egedep decembarimi oqarsimanera, tassa Kalaallit Nunaat tuniniarneqanngitsoq.

Sapaatip unnuaani præsidentip timmisartuanut Air Force One-mut ilaalluni Las Vegasimiit Miamimut ingerlaartilluni tusagassiortumit aperineqarpoq Danmarkip Kalaallit Nunaata tuninissaanik itigartitsinera Trumpip akuerisinnaaneraa.

Tusagassiorfimmit Forbesimit tusarnaagassiaaqqami saqqummiunneqartumi Trump ima oqarpoq:

- Isumaqarpunga Kalaallit Nunaat pillugu apeqqut uagut suleqatigaluta aaqqinneqarumaartoq.

- Isumaqarpunga pissarsiariumaarlugu, oqarpoq nangillunilu Kalaallit Nunaanni innuttaasut 57.000-ingajaat “peqataarusuttut”.

Mette Frederiksen DR-imi TV 2-milu Europap ataatsimut nukittunerusariaqarnera aamma erseqqissarpaa.

TV 2-mut ministeriuneq oqarpoq „sillimaniarnermut politikkimut tunngatillugu uummatikkut iluunngarluni Atlantikumut tapersersuigaluarluni“ aammali „uummatikkut iluunngarluni isumaqartoq maanna Europa nukittunerulersittariaqartoq“.

Donald Trumpip præsidentitut aappassaanik atuuffissani suli aallartinnaguli oqarsimavoq USA-p isumannaatsuuneranut Kalaallit Nunaat “pingaaruteqarluinnartoq”.

Donald Trumpip 2019-imi præsidentitut siullermik atuuffimmini Kalaallit Nunaat pisiarerusullugu nalunaaruteqareersimavoq.

Taamani ministeriunerup itigartitsinera pissutigalugu USA-p præsidentiata Danmarkimut tikeraarnissani taamaatippaa.

grønland donald trump samfund inuiaqatigiit mette frederiksen arktis

ATORFIIT Se alle jobs

Powered by Labrador CMS