Mette Frederiksen: Nunat allat tiguarneqarsinnaanngillat

Mette Frederiksen Nuummi talittarfimmi tusagassiortunik katersortitsivoq.

Ministeriunerup Naalakkersuisunut siulittaasuugallartoq siulittaasunngortussarlu ataatsimeeqatiginiarlugit Nuummiippoq.

Ministeriuneq Mette Frederiksen (Socialdemokraterne) Issittumi Sakkutooqarfiup umiarsuaanut nakkutilliissummut Vædderenimut ilaalluni ullumi angalavoq. Naalakkersuisunut siulittaasuugallartoq Múte B. Egede (IA) siulittaasunngortussarlu Jens-Frederik Nielsen (D) angalaqatigai.

Nuummut taleqqammerput, tassanilu tusagassiortunut apeqqarissaarfigineqarsinnaanngorlutik sassarlutik.

Sermitsiaq tusagassiortunik katersortitsinermi malinnaavoq.

- Piffissami kingullermi toqqissisimanngitsutut misiginersi paasilluarsinnaavara. Nammineernissarsi sungiusimavarsi, assoralisimaarnerli maanna ilissinnut eqquisoq sakkortuvoq, immaqalu aallartilaaginnarluni, Mette Frederiksen tusagassiortunik katersortitsinermi oqarpoq.

USA toqqaannartumik saaffigaa eqqaallugulu Danmarkip USA ukiorpassuarni assigiinngitsorpassuartigut tatigisarsimagaa, imatulli nangippoq:

- Kunngeqarfiup ilaanik tiguaaniarlusi piumasarigussiuk, tatiniarsaraluta sioorasaarlutalu nuna ukiorpassuarni nuannarisarput pillugu qanoq isummertariaqassaagut?

Oqariartuutini Amerikamiut paasiniassammassuk tuluttut uteqqippaa.

Nunat allat tiguarneqarsinnaanngillat

Nunap nammineq oqartussaassuseqarnera killeqarfiilu nunat tamalaat inatsisaannit illersorneqartut Mette Frederiksenip aamma erseqqissarpaa.

- Nunat allat tiguarneqarsinnaanngillat. Aamma nunat tamalaat isumannaatsuunissaat anguniarlugu, oqarpoq.

Danmarkip Issittumi Kalaallit Nunaannilu sakkutooqarnini annertusaraa Mette Frederiksen nangilluni oqarpoq.

USA-mik suleqateqarneq

Taamaakkaluartoq naalakkersuisut siuttui USA-mik suleqateqarnissaminnut tunuarsimaanngillat.

- Nunatta USA-llu suleqatigiinnerat ukiuni kingullerni 80-inngulersuni piusimavoq. Taakkua sillimaniarnerat uagut illersorneqarnissatsik qulakkeerinnissimavoq, aamma niuernerup aallaavigisaanik suleqatiginnikkusuppugut. Tuniniagaanngilagulli, Múte B. Egede oqarpoq.

- Tassunga uiggiullugu soorunami oqaloqatigiinneq aqqutissaavoq. Oqaloqatigiinnerup maanna piunnginnera annertuumik aamma nalornilersitsivoq. Taamaammat oqaloqatigiinneq ataqqeqatigiinnerlu aallaaviussooq, Jens-Frederik Nielsen oqarpoq.

- Amerikamiut suleqatigerusuppavut, tamannali ataqqinnittumik pissuserissaartumillu pissaaq, Mette Frederiksen oqarpoq.

Ukiuni sisamani kingullerni suleqatigiilluarneq

- Avatitsinni pisut eqqarsaatigalugit ataatsimoortariaqarpugut. Naalagaaffeqatigiinnerup iluani, aamma nunanut allanut ilitsinnut attaveqarnitsinni, Jens-Frederik Nielsen oqarpoq.

Ukiuni sisamani kingullerni suleqatigiissimaneq nuannaarutigalugu Múte B. Egedep naggataatigut oqaatigaa.

- Isumaqanngilanga aatsaat maannakkut immitsinnut qaninnerulersimasugut, ukiuni sisamani kingullerni oqaloqatigiilluartarnikkut paaseqatigiinnerulersimavugut.

- Ikinngutigiilluartut iligiilluartullu ataatsimoorlutik nunani killerni naleqartitat pingaartinneqartuaannarsimasut illersortariaqarpaat.

- Isumaqarpunga tamanna ingerlaannassasoq. Kunngeqarfiup iluani suliassaqarpugut, avataaniillu tatineqarneq pissutigalugu tamanna unitsinneqassanngilaq.

Piffissami kingullermi USA-p præsidentiata Donald Trumpip Kalaallit Nunaannik aqutsilernissamik kissaateqarnini uteqattaartareeraalu Mette Frederiksen Nuummukarpoq.

Tamatuma saniatigut Inatsisartunut marsip aqqarnani qinersisoqarnerata kingorna Naalakkersuisut nutaat sapaatip-akunnerata ataatsip matuma siorna saqqummiunneqarput. Inatsisartunut qinigaasut ataasinngorpat perngaammik ataatsimiissapput, tassanilu Naalakkersuisunngortussat akuersissutigineqassallutik.

Taamaattumik ministeriunerup tikeraarnerani pisortatigoortumik isumaqatigiinniartoqassanngilaq.