Ullumikkut arnat 1960-ikkunniilli akuersinatik naartunaveersaaserneqarsimasut qullilinertalimmik, pakkutaarinninnertalimmik assamminnertalimmillu utoqqatserfigineqarput.
Tamanna Nuummi Katuami pivoq, tassani ministeriuneq Mette Frederiksen (Socialdemokraterne) aamma Naalakkersuisut siulittaasuat Jens-Frederik Nielsen (D) oqalugiarnerminni utoqqatserput – taamaalillutik arnat 1992 sioqqullugu kingornalu spiralilerneqarsimasut utoqqatserfigineqarput.
Ullumikkut arnat 1960-ikkunniilli akuersinatik naartunaveersaaserneqarsimasut qullilinertalimmik, pakkutaarinninnertalimmik assamminnertalimmillu utoqqatserfigineqarput.
Tamanna Nuummi Katuami pivoq, tassani ministeriuneq Mette Frederiksen (Socialdemokraterne) aamma Naalakkersuisut siulittaasuat Jens-Frederik Nielsen (D) oqalugiarnerminni utoqqatserput – taamaalillutik arnat 1992 sioqqullugu kingornalu spiralilerneqarsimasut utoqqatserfigineqarput.
Maannalu susoqassanersoq ullormi tassanittaaq arnat apeqqutigaat. Utoqqatserneq nuannaarutigaat, kisiannili aamma innarlerneqarnertik pillugu taarsiiffigitikkusupput.
Tamatuma kingorna tusagassiortunik katersortitsisoqarpoq, tassanilu Mette Frederiksen apersorneqarpoq.
- Inatsiseqarnermut tunngasunik najoqqutassaqarlunilu eqqartuussivimmi suliamik ingerlatsisoqarpoq. Tamannali eqqartuussivimmi suliassaammat soorunami akuliuffigissanngilara.
- Taarsiinissaq pillugu apeqquteqarpoq. Saammaateqatigiinnermut aningaasaateqarfimmik pilersitsiniarluta Danmarkimi naalakkersuisunit oqareerpugut, tassanilu ataasiakkaanut taarsiisoqarsinnaassaaq. Aningaasaateqarfik qanoq isikkoqassanersoq, qanorlu tamanna pissanersoq Naalakkersuisut oqaloqatigissavagut, taanna oqarpoq.
Sivisusinnaasoq
Sooq danskit naalakkersuisui utoqqatsinnginnerminni taarsiissutissanik apeqqut pillugu erseqqissumik paasitinneqarsimannginnersut Mette Frederiksen aperineqarpoq.
- Aap, ukiut 25-t matuma siornatigut tamanna qulaarneqarsimasinnaagaluarpoq. Kisianni taamaaliortoqanngilaq, akivoq nangillunilu:
- Uagut taamaaliorpugut. Kikkunnit tamanit suliarineqarumanngitsunik ukiuni kingullerni suliaqarniarluta aalajangersimasugut anneruniajuilluta oqarsinnaasugut isumaqarpunga.
- Taarsiissutissamik nassaarnissatsinnut piumassuseqarluta danskit naalakkersuisuinit oqarpugut. Tamannami neriorsuutaavoq siornatigut oqaatigineqarsimanngitsoq. Qulaajagassanilli apeqquteqarpoq. Tamanna sivisusinnaavoq, taanna oqarpoq.
Aqutsisoqatigiit suliartik ingerlatiinnassagaat
Tusagassiortunik katersortitsinerup naggataatungaani spiralilersuisoqarsimanera pillugu aqutsisoqatigiit oqaaseqartartuat Arnaq Johansen apeqqutinik akissuteqarpoq. Tassani suliartik ingerlatiinnaritsik erseqqissarpaa.
- Eqqartuussivimmut suliassanngortitarput (taarsiiffigitinnissaq, aaqq.) soorunami ingerlatiinnarparput. Ulloq manna uagutsinnut pingaaruteqangaarpoq. Utoqqatsertoqarnera uagutsinnut pingaaruteqarluinnarpoq.
- Amerlasuujusugut ikiorneqarnissatsinnik pisariaqartitsivugut. Ikiorneqarnissarput ullumimiit oqartussaasut akisussaaffigilerpaat. Tassami piumasaqaatitta ilagaat.
Arnat 143-t tamarmik immikkut 300.000 koruuninik taarsiiffigitikkumallutik danskit naalagaaffiat eqqartuussivimmut suliassanngortissimavaat.
Utoqqatsertoqarnissaa aqutsisoqatigiit sulissutigisimagaat Arnaq Johansen oqarpoq.
- Ajugaasimasugut ullumikkut misigisimavunga. Misigisimasagut ajortuusut naalagaaffiup nassuerutigaa. Taamaammat ullumikkut angusarput uagutsinnut pingaaruteqartorujussuuvoq.
Inuiannik toqoraanerua?
Naalakkersuisut siulittaasuisa marluullutik spiralilersuisimaneq pillugu suliaq Danmarkip Kalaallit Nunaatalu ataatsimut oqaluttuarisaaneranni immikkoortutut taarluinnartutut oqaatigaat. Inuit arlallit, matumanittaaq Naalakkersuisunut siulittaasuusimasup Múte B. Egedep, inuiannik toqoraanertut taavaat.
Mette Frederiksenili Jens-Frederik Nielsenilu tamanna pillugu oqaaseqarusunngillat.
- Tamanna pillugu isummersuutit amerlaqaat. Maannakkut inuit pisinnaatitaaffii pillugit misissuineq ingerlanneqarpoq. Taannalu naammassippat aamma iliuuseqarfigisariaqassavarput.
- Iliuuserineqarsimasoq ullumikkut utoqqatsissutigisarput oqaluttuarisaanermi pisut taarnerpaartaasa ilagigaat, qularutissaanngilaq, inuiannullu iliuuserineqarsinnaasut amiilaarnartuupput, Jens-Frederik Nielsen oqarpoq nangillunilu:
- Qanorli taassaneripput qulaajaanerup ersersikkumaarpaa. Arnat eqqugaasut ullumikkut salliutippakka. Taakkualu ullumikkut utoqqatserfigaagut.
Ministeriunerup siulittaasup akissutaa isumaqatigaa.
