Mette Frederiksenip Mark Ruttellu Natop illersornissaa Ukrainelu oqaloqatigiissutigissavaat
Nato nalunaarpoq Mark Rutte Danmarkimut tikeraassasoq ministeriunerlu Mette Frederiksen ataatsimeeqatigissallugu.
Mette Frederiksen aamma Mark Rutte Københavnimi sapaatip akunnera kingulleq naapipput. Ataasinngornermi naapeqqittut, Nato ilisimatitsivoq.
Foto: Emil Nicolai Helms/Ritzau Scanpix
Nato nittartakkamini nalunaarpoq, Natop generalsekretæria Mark Rutte ullumi ataasinngornermi Danmarkimiittoq ministeriuneq Mette Frederiksen (S) ataatsimeeqatiginiarlugu.
- Ataasinngornermi oktobarip arfernani Nato-p generalsekretæria, Mark Rutte, Københavnimut aallarpoq Danmarkimi ministeriuneq Mette Frederiksen ataatsimeeqatigiartorlugu, Nato-p nittartagaani allassimavoq.
Mette Frederiksen naapertorlugu Nato-p “ illersornissami nukittorsarneqarnissaa Ukrainemullu tapersersuiuarnissaa qulakkeerniarlugu” Mark Rutte oqaloqatigiittoqassaaq.
- Nato-mi Europamilu ataatsimoornissarput qanoq pingaaruteqartigisoq piffissap kingulliup takutippaa, ajoraluartumilli aamma ersersippaa piffissamut saassussinerit assigiinngitsut amerlanerulernissaannut piareersimasariaqartugut.
- Sakkussiaqalernissarput ataatsimoorlutalu nukittunerput Ruslandip qunusaarsinnaanissaanut pisariaqartipparput. Ukrainemik tapersersuinerput attatiinnassavarput, Europamummi tamarmut taanna illersortaavoq, saassunneqartuni saarlersaalluni, Mette Frederiksen tusagassiuutinut nalunaarummi oqarpoq.
Mark Rutte sapaatip-akunnerani kingullermi aamma Danmarkimiippoq.
Københavnimi sisamanngornermi Bella Centerimiippoq Europami Politikkikkut Peqatigiit ataatsimiinneranni peqataalluni.
Tassani Mette Frederiksenip ilaatigut Ukrainep præsidentia Volodymyr Zelenskyj tusagassiortunik katersortitseqatigaa.
Nunat Nato-mut ilaasortaasut piffissami kingullermi pisuni arlalinni akuliunneqarsimapput.
Aamma Danmarkimi taamaappoq, tassami dronet attaveqaatit pingaarutillit soorlu mittarfiit sakkutooqarfiillu qulaani timmisaartut nalaanneqarput.
Sakkutuut isertortumik paasiniaasartuisa (FE) sapaatip-akunnerani kingullermi nalilerpaat Nato-mut ilaasortaasut sakkuaaffigineqalersinnaanerannut aarlerinaat annertoorujuusoq.
FE-p nalilerpaa Rusland maannakkut Danmarkimut Kitaanullu sorsuttoq.
Misissuinermi assersuutitut eqqaaneqarput umiarsuit susassaqarfiginngisaminni angalasut, Nato-mi nunat isiginnaarutikkut saassunniartutut misilerarneqartut aamma umiarsuit timmisartullu sakkutuunit sakkutuujunngitsunillu atorneqatut attaveqaatai GPS-iilu akornusersorneqarnerat.
Russit Nato-mut ilaasortanut nunanut arlalinnut aamma silaannakkut akornusersuisimavoq. Soorlu tamanna aamma Danmarkimi pisoq, naak kikkorpiaat taama iliornersut pisortatigoortumik oqaatigineqanngikkaluartoq.
/ritzau/
