Mia Kangerlussuarmiu

Mia Chemnitz arnaavoq anaananilu tunisassiornermik suliffeqarfimmik Qiviunik Nuummiittumik piginnittoq. Piuartitsinermik immikkut ittumik ingerlatsisimanermini pillugu ARNANUT-mi ”Arnatsialak 2023”-tut toqqarneqarpoq.

Arnarli immikkuullarissumik isikkulik ilingasunik nujarujussualik kinaava? Arnaq Qiviuni tunuliaqutaasoq ilisarinialaariartigu.

Mia 1993-mi Nuummi ukiut 31-t matuma siornagut inunngorpoq. Aneqarpoq, Mia nukarlersaalluni. Angajoqqaarai Anita Høegh aamma Niels Chemnitz. Anaanaata suliffeqarfik Qiviut pilersippaa. Angutaa Niels Polar Oilimi sulivoq.

Ukiuni pingasuni siullerni ilaqutariit Nuummi najugaqarput kingornalu Kangerlussuarmut nuullutik. Meeqqamut Mia Chemnitzitut ittumut najugassaqqissoq, nammineq oqarneratuut.

- Inuusuttunngorluni allaavoq, meeraallunili tulluarluinnarpoq. Qimuttunik qimmeqarpunga, hiistiuteqarlunga atugarissaartupilussuullungalu. Sumorsuaq angalasoqarsinnaavoq sumilluunniit navianartoqarani. Teriannissat perlerortut eqqaassanngikkaanni, Mia Chemnitz oqaluttuarpoq itisiliillunilu:

- Kangerlussuaq Nunatsinni tamarmi isumaginninnikkut ajornartorsiuteqarfiunnginnerpaatut immaqa oqaatigineqarsinnaavoq, inuimmi paarisariaqakkamik suliffeqarput asuliinnaq Kangerlussuarmiittoqartarani. Meeraallunga Kangerlussuarmi isumaginninnikkut ajornartorsiuteqartunik ikinnguteqarnangalu ilisarisimasaqanngilanga, oqarpoq.

Meeraalluni pinngortitamiittaqaaq illortaarpassuani ikinngutinilu peqatigalugit. Qimusseraqatigiittarput hiisterlutillu.

- Eqqaamavara taamaallunga angajoqqaakka kangerlummiit sianerfigigakkit qimussernitsinni, qiallunga angerlarusullungalu. 40 missaannik issippoq qiiavungalu, Mia Chemnitz eqqaamasalikkersaarpoq.

Meeraallunili uumasuuteqartuaannarpoq, soorlu hiistit qimmillu, nuannareqaalu.

- Uumasut sunut atorneqarnersut apeqqutaanngilaq. Qimusserarluni nuanneqaaq, aamma hiisterluni, uumasuuteqarnerlu nuanneraara. Suliassartai, silamiinnerlu nuannaraara, oqaluttuarpoq.

Aallussinikkaaq

Mia Chemnitz Kangerlussuarmi ”Qinnguata Atuarfiani” atuarpoq. Ittoortuuvoq, allaat ullumikkumut, ingammillu meeraalluni.

- Ittuutunermik inuit isigigaangannga qialersarpunga. Eqqaamavara atualeqqaarnitsinni ittoornermik aninnut pulaniartutut ikkama, oqaluttuarpoq.

Mia Chemnitzilli meeqqat atuarfiat nuannareqaa.

- Aallussinikkaavunga, ilinniarneq nuannaralugu, inuillu ilisimasartuut nuannaralugit. Inuit aallussinikkaajuppata nuannerilluinnartarpakka, oqarpoq.

10. klassertussaasoq ilaqutariit Sisimiunut nuupput, tamannalu Miamut inuusuttumut allannguilluinnarneruvoq. Illoqarfimmi nunatsinni annerpaat tulliani, isumaginninnikkut ajornartorsiuteqarfiusumi.

- Isumaliunngilangali: ’Shit, saperpara’. Sisimiuni najugaqartunik ikinnguteqareerpunga, ilassivaanngalu. Sallaatsumik inissippunga, Mia Chemnitz oqaluttuarpoq.

Meeqqat atuarfiata kingornagut Mia Chemnitz Danmarkiliarpoq pinngortitamut tunngasumik efterskolerniarluni. Tassani aallaaniartoqartarpoq, hiistertoqarluni qajariartoqartarlunilu. Tassunga tulluaqaaq.

- Naak angerlarsertaraluarlunga efterskole naammassivara. Aammami allatut iliorsinnaanngilanga, anaanaga sukangalaartuummat, oqaluttuarpoq.

Mia Chemnitz 2009-imi Sisimiuliaqqippoq, tassani teknikkimut tunngatillugu ilinniarnertuunngornialerluni, HTX-mi. Taamanikkut ilinniarfik sanaartorlugu naammasseqqammerpoq, naallu Mia Chemnitzip ilinniarnertuunngorniarfik nuannarigaluaqalugu, isumaqarpoq ilinniarnertuunngorniarnissamut immaqa siusippallaalaartoq. 15-inik ukioqarpoq.

- Immaqa ukioqqortunerulaartuuguma nuannernerussagaluarpoq. Isumaqarpunga sorpassuartigut sukkasuumik inersimasunngorsimasunga, tamannalu uggoraara, oqaluttuarpoq.

Asanninneq sakkortooq

Mia Chemnitz ilinniarnertuunngorami ilinnialernissani nukingiutinngilaa. Taamanikkut tusagassiortunngorusuppoq.

- 18-inilli ukioqarlunga tusagassiortunngorusunngilanga, tamanna tissinaannarpoq, ilisimasaqanngivippungami, Mia Chemnitz oqaluttuarpoq.

Taamaattumik Europaliarpoq, ukiumilu ataatsimi Islandip avannaani hiisterluni. Meeraalluni hiistiuteqartuaannarsimavoq, Mia Chemnitzilu hiistinik nuannarisaqarnissaminut pinngitsaalisatut ippoq.

- Eqqaamavara hiistit ersigisupilussuullugit. Hiistit nuannarilernissaannut hiisternissamillu pinngitsaalineqarpunga. Ukiuni siullerni marlunni hiisteraangama qiasarpunga aqqaqqusaanangalu. Asanninneq sakkortooq. Maannali inuunerma ilagilersimavaa annertooq, hiistiuteqannginnerlu takorloorsinnaanngilanga, Mia Chemnitz ullumikkut Islandimiut hiistiinik marlunnik peqartoq oqaluttuarpoq.

Ukiumi ataatsimi Islandimi kusanaqisumi hiistereerluni Mia Chemnitz Aarhusiliarpoq tassanilu tusagassiortunngorniat ilinniarfiani ilinniarsinnaaniarluni ukiup affaani højskolilerluni. Kingorna ilinniarusutani aallartippaa.

- Tusagassiortunngorniarfik nuannerpoq, inuusuttoqarporlu aallarteqatigisannik pikkorissunik. Sakkortullutillu salliuniartuupput. Sakkortugaara sungiusimasakka malillugit ikinngutigiissinnaannginnatta, Mia Chemnitz eqqaasalikkersaarpoq.

Tusagassiortutut naammassinngilaq, bachelorinngornissaminulli allaaserisani allariikkani taamaallaat amigaatigalugu. Taamanikkut ilinnialersussat killilersorneqartarput Mia Chemnitzilu nalornilerpoq.

- Tusagassiortutut naammassinissara, kingornalu ilinniarnissamik aallartitsisinnaajunnaarnissara qunuginnginnerlugu imaluunniit massakkut tunniussinanga allamik ilinniagaqarnissamik periarfissaqarnissara pillugu aalajangipallattariaqarpunga, nassuiaavoq.

Mia Chemnitzip isumaliutiguarsimavaa ullut ilaanni siunissami Qiviut ingerlateqqikkusullugu, anaanani naammassippat. Tamannali siunissami ungasissorsuarmiippoq. Isumaliorpoq. Tamatuma tungaanut tusagassiortuuniarpoq. Ullulli ilaanni anaanaa napparsimalerpoq, arlaanillu pisoqartariaqarmat Mia Chemnitz Sisimiunut angerlarluni.

Mia Chemnitzip tusagassiortuuneq unitsippaa aalajangerlunilu atisaliortutut ilinniarniarluni. Atisarliortoq ilusilersuinerup silarsuaani bygningskonstruktøriuvoq. Aarhusiliaqqippoq tassanilu ilinniarluni. 23-nik ukioqarpoq.

- Ukioq artornarpoq. Sakkortuallaannginnissarli ilinniarpara. Brugsenimiissinnaavunga nikallungallungalu qiallunga arlaanit nassaarineqarnissama tungaanut. Isumaqartuarsimavunga tamanna killissamik qaangiinerusoq ingammik inuiaqatigiinni kikkut tamarmik imminnut ilisarisimammata, Mia Chemnitz oqaluttuarpoq.

Nammineq suliffeqarfimmini sungiusaammik sulisoq

Mia Chemnitz inuussutissarsiummik ilinniarnermi nalaani Aarhusimiit Sisimiunut uteqattaarpoq, namminerlu suliffeqarfiutimini sungiusaammik sulilluni.

- Tamanna sulisunut annertuumik piumasaqarfiuvoq, ilinniartoqarluni aammali naalagaalaarluni. Imminut oqarfigaanga sulininni maniguuttupilussuunikkut tamanna aaqqissimallugu, ilinniarusuttuarnikkullu. Anaanagalu nalunngilarput kinguaariit nikittariaqartut, oqaluttuarpoq.

Mia Chemnitzip atisaliortutut nammassigami ullormi tassani suliffeqarfik Qiviut piginneqataaffigilerpaa. Alloriarnerujussuartut misinnarpoq, aammali taamaattussatut. Tassaniittussaavoq.

- Anaanaga kakkageqaara. Suliffeqarfinni kinguaariit nikittarnerpassui ajornaatsuinnaaneq ajortut tusarsimavara. Isumaqarpunga akaartartupilussuusoq arlaanik naqqaniit piorsaasimaneq, panimminullu 25-nik ukiulimmut aamma oqarluni: “Tatigaara sapinngikkit, aajuku sulisut”. Tatiginninnermik takutitsineruvoq annertooq, oqarpoq.

Mia Chemnitzip ukiut pingajuata affaa matuma siornagut Qiviut Nuummut nuuppaa. Naak Sisimiut nuannarilluartuugaluarlugu ilaquttani qaninnerorusuppai.

- Aalajangiusimavara Nuummut nuukkutta Qiviut Sisimiuniikkunnaassasoq, oqarpoq.

Mia Chemnitz ”Arnatsialak 2023”-mut toqqarneqarpoq Kalaallit Nunaanni piujuartitsinermik immikkut iliuuseqarsimanermigut. Siullermik tupigilaaqqaarpaa, nalornigigamiuk 30-nik ukiullit taamaattunngorsinnaanersut.

- Akimasuut akornanniilerluni. Isumaqarpunga arnatsialaat toqqarneqartarsimasut ilaallu nammineq ataqqeqaakka. Sunali peqqutigalugu oqaluttuarmata suliannilu aalajangersimasoq aallutara pineqartoq, taava paasinarsivoq. Tulluuteqaangalu, oqaluttuarpoq.