ISSITTUMI SIUNNERSUISOQATIGIIT
Miki Jacobsen-ip ilisarnaasiai puisit pingasut kunngeqarfiup pilersaarutaani kusassaataapput
Assilialiortartoq Miki Jacobsen kunngeqarfiup Issittumi siunnersuisoqatigiinni ukiuni tulliuttuni marlunni siulittaasuunissaanut pilersaarutaani ilisarnaasiortuuvoq.
Issittumi Siunnersuisoqatigiit nittartagaanit assilisaq
Assilialiortartoq Miki Jacobsen Issittumi Siunnersuisoqatigiinni Kunngeqarfiup siulittaasuunerani ilisarnaatissamik ilusilersuisuuvoq.
Nunanut allanut tunngasunut Naalakkersuisoq, Vivian Motzfeldt (S) Issittumi Siunnersuisoqatigiinni Kunngeqarfiup siulittaasuunerani sulinissamut pilersaarummik tallimanngormat saqqummiussivoq, minnerunngitsumillu aamma Issittumi aallartitanngortoq, Kenneth Høegh, ilisaritillugu.
Ilisarnaatip kusanartup suliarinnittua, Miki Jacobsen, oqalugiarluni nassuiaavoq ilisarnaat qanoq pinngorsimanersoq aamma ilisarnaatip qanoq isumaqarnera pillugu oqaluttuarpoq. Matuma ataani eqqumiitsuliortup nammineq aallarniilluni nassuiaanera oqaasertaliunneqassaaq.
Nunat sanileriinngillat imarsuarli atassusiisoralugu ataatsimoorput
Puisit pingasut puisinit aalajangersimasuninngaanniinngillat.
Ilisarnaammik ilusilersuisup Miki Jacobsenip puisit pingasut ilusilersorsimavai, taakkulu tassaatippai Kalaallit Nunaat/Danmark kiisalu Savalimmiut.
Asseq: Issittumi Siunnersuisoqatigiit nittartagaannit assilisaq
Puiserpassuit issittumi eqqaanilu uumasut assersuutigalugu
puisinit kujasinnerusumi uumasunit talerukinnerupput,
issittullu puisai piffimmi imaannaanngitsumi uumanissamut
immikkut naleqqussarsimasuupput.
Taakkununngalu immap
nillertup silaannaallu nillertumut ilaapput, taamaanneratalu
sikusinnaalersittarpaa.
Puisit ilaannut sikuusarnera pingaaruteqarluinnarpoq, taakkumi sikumi piaqqiffigisartakkaminniinnissaq pinngitsoorsinnaanngilaat.
Naluneqanngitsutut Kunngeqarfik Danmarki tassaavoq
Kalaallit Nunaat, Savalimmiut Danmarkilu.
Nunat pingasut
tamarmik nunanik allanik sanileqarput, peqatigisaanillu
taakku imaq katinngatigaat. Nunat pingasut tamarmik
siamasissuupput, taamaattoq ataatsimoorlutik. Tamannalu
sulianni amisutut ilaqutaariittulluunniit siunissamut
ingerlaarnertut ersersinniarneqarpoq. Tassa ataatsimoorluni
siunissamut pitsaanerusumut ingerlaaqatigiinneq, Miki Jacobsen ilisarnaasiani pillugu oqalugiarnini aallarnerlugu oqarpoq.
