Nunanit allaneersut, ingammillu amerikamiut Avannaata Qimussersua suunersoq siorna aperisimagaanni immaqa sianigisimassanngikkaluarpaat.
Sukkaniunnerli nunatta avannaaniunerusoq malinnaaffigineqartartoq amerikamiut tapiisussanngormatali nunarsuaq tamakkerlugu tusaamasanngorpoq.
Nunanit allaneersut, ingammillu amerikamiut Avannaata Qimussersua suunersoq siorna aperisimagaanni immaqa sianigisimassanngikkaluarpaat.
Sukkaniunnerli nunatta avannaaniunerusoq malinnaaffigineqartartoq amerikamiut tapiisussanngormatali nunarsuaq tamakkerlugu tusaamasanngorpoq.
Amerikami præsidentip tullersortaata JD Vancep nulia Usha Vance tikeraartussanngoraluarpoq, allaallu nunap taassuma illersornissamut ministeria Pete Hegseth qimussersuarmut isiginnaariarnissamut qaaqquneqangajassimalluni. Amerikamiummi sakkutuuisa qulimiguulii qimussersuarianut qimminullu angallassinissaat siunniunneqaraluarpoq. Taamaammanuna illersornissamut ministerip qaaqquneqarnissaa KNQK-p siunniukkaluaraa.
- Uagut naliliinitsinni tulluartissimavarput iluatsissagutsigu akisussaanerpaaq qaaqquneqarsinnaasariaqartoq, Mikkel Jeremiassen taama oqarpoq.
Qaaqqusissulli taanna oqallisaaqisoq Namminersorlutik Oqartussat allaffeqarfiannut killiinnarpoq, illersornissamullu ministerimut nassiunneqarani. Amerikamiut aallartitaqarfiata aningaasaliiniarnera nunatta ukkanneqarnerujussuata nalaani, naalagaaffeqatigiinnerup tusiapinnerani Trumpillu nunatsinnik pisinialersaarnerani pisoq KNQK-p kingumut qiviaruni peqqissimissutissaqarfinngilaa.
- Assartuinerup iluatsinneranut qulakkeerisuummata, aammalu siulersuisuunerit aalajangigaat najoqqutaralugit suligama, taava suna peqqissimissutigissuara?, Mikkel Jeremiassen taama oqarpoq.
Amerikamiummi aningaasaliinerat sukkaniuttoqarnissaanut qulakkeerinnissimavoq.
- Nuummi konsulateqarfik saqqummersimanngitsuuppat Avannaata Qimussersuaqanngitsooratarsinnaagaluarpoq, imaluunniit annikinneeraasimassagaluarpoq, ikinnerullutik peqataasut, Mikkel Jeremiassen taama oqarpoq.
Kalaallit Nunaanni Qimussertartut Kattuffianni siulittaasoq Mikkel Jeremiassen, amerikamiut aningaasaliinerannut oqallisaaqisumut tunngatillugu paasisaqarfiginerujumallugu podcastimit naapipparput. Podcast tamakkiisoq ataani tusarnaarsinnaavat.
