Ivana Nikoline Brønlund paniminik Aviaja-Luunamik Hvidovre Hospitalimi ernivoq. Høje-Taastrup Kommunemit, angajoqqaat piginnaasaannik misissuinermi tarnip pissusaanik nalilersuutit atorlugit meeqqamik arsaarinnittoqassasoq aalajangerneqarnikuummat, meeraq inunngorneraniit ingerlaannaq arsaarinnissutaavoq.
Ilaqutariit naapertorlugit suliami kommunip VISO-mi immikkoortortaqarfik immikkut ittoq, kalaallit kulturiannik oqaasiinillu immikkut ilisimasaqarfiusoq, peqataatinngilaa. Naak inatsit maajip aallaqqaataani akuerineqartoq tunngavigalugu, kalaallit meerartaannik angerlarsimaffiup avataanut inissiisoqarniarnermi suliami ilanngunneqarnissaat pisussaaffiugaluartoq, taama pisoqarpoq.
Ivana Nikoline Brønlund paniminik Aviaja-Luunamik Hvidovre Hospitalimi ernivoq. Høje-Taastrup Kommunemit, angajoqqaat piginnaasaannik misissuinermi tarnip pissusaanik nalilersuutit atorlugit meeqqamik arsaarinnittoqassasoq aalajangerneqarnikuummat, meeraq inunngorneraniit ingerlaannaq arsaarinnissutaavoq.
Ilaqutariit naapertorlugit suliami kommunip VISO-mi immikkoortortaqarfik immikkut ittoq, kalaallit kulturiannik oqaasiinillu immikkut ilisimasaqarfiusoq, peqataatinngilaa. Naak inatsit maajip aallaqqaataani akuerineqartoq tunngavigalugu, kalaallit meerartaannik angerlarsimaffiup avataanut inissiisoqarniarnermi suliami ilanngunneqarnissaat pisussaaffiugaluartoq, taama pisoqarpoq.
Ministeri qisuariartoq
Tamanna isumaginninnermut ineqarnermullu ministerip Sophie Hæstorp Andersenip qisuariarfigaa.
Paasissutissat tusagassiuutitigut saqqummiunneqartut isumakulunnarigamigit, Høje-Taastrup Kommune suliami tamatumani qanoq iliorsimanersut nassuiaateqaqqugllugit qinnuigisimallugit Sermitsiamut akissummini allappoq.
Kalaallit meerartaannik angerlarsimaffiup avataanut inissiinermut suliani nalilersuutit tamanut atorneqartartut atoqqusaanngitsut erseqqissalugu allappoq:
"Inatsit paatsoorneqarsinnaanngilaq: Kommunimi kalaallit meerartaannik angerlarsimaffiup avataanut inissiisoqassanersoq nalilersorneqarpat, imaluunniit tarnip pissusaanik misissuutit nalinginnaasut atussanerlugit eqqarsaatersuutigineqarpat, taakku atornagit immikkoortortaqarfik immikkut ilisimasaqarfiusoq suliamut ilanngunneqassasoq 2025-mi maajip aallaqqaataani atuutilersinneqarpoq."
Ministeri nangilluni allappoq:
"Tamannali suli siusinnerusukkut iliuuseqarfigisaarpara. Kommunit tamaasa ilaqutariinnit kalaallinit kingoqqisut eqqarsartaasaannik misissuinermi misissuutit tamanut atorneqartartut atorneqartarunnaaqqullugit siorna novembarimi kajumissaarpakka. VISO-milu immikkoortortaqarfik immikkut ittoq januaarimiilli siunnersuinissamut piareersimavoq. Aammattaaq kommunit malittarisassat nutaat pillugit tamarmik nassuiaanneqarlutik ministeriaqarfimmit upernaaq allagarsipput - taamaalilluni kommunit tamarmik inatsit atuutilersimasoq qularutigisinnaanngilaat."
Ataatsimiinnerit angalanerillu pilersaarutaasut
Meeqqat, inuusuttut ilaqutariillu pillugit naalakkersuisup Mads Pedersenip aggustip 22-ani ataatsimeeqatigineqarnissaa pilersaarutaavoq, Ministereqarfik aamma ilisimatitsivoq.
Isumaginninnermut ineqarnermullu ministeri septembarimi aamma Kalaallit Nunaannukassaaq.
