Missingersuutinik malittareqqeereernermi nunatta karsia amigartooruteqangaassangatinneqartoq
Aningaasaqarnermut Naalakkersuisoqarfik naapertorlugu nunap karsiata aningaasaqarnerata 225 million koruuninik ajorseriarnissaa ilimagineqarpoq.
Assi: Leiff Josefsen
Naalakkersuisunngorlaat aningaasaqarnikkut aallartilluanngillat, illuatungianilli Nunatta Karsia aningaasanik millionilinnik amigartooruteqartoq nangissavaat.
2025-mi aningaasanut missingersuutit 2025-mi marsimi aningaasaqarnermut akileraartarnermullu naalakkersuisoqarfimmit suliarineqarsimasut naapertorlugit aningaasartuutit amerleriarujussuarsimassapput.
Nunatta karsiata amigartooruteqarnera 121 millionit koruuniniit 346,8 millionit koruuninut ajorseriaannassasoq naatsorsuutigineqarpoq. Tassa 225 millionit koruuninik ajorseriaannassasoq.
Akileraartarnermut soraarnerussutisiaqarnermullu tunngatillugu annertuumik nikingassuteqalersinnaanera, kiisalu suliassaqarfinni missingersuutinik qaangersimasunik naatsorsuuteqarfigineqarsinnaasuni tamani amigartoorutit ikilisinniarlugit iliuuseqartoqartariaqartoq Naalakkersuisoqarfiup erseqqissarpaa.
Aningaasarsiorunnaarneq, peqqinnissaqarfimmut aningaasartuutit soraarnerussutisiassallu
Aningaasartuutit marluk amigartoorutit annertusiartornerannut pissutaanerpaapput.
Tassa Naalakkersuisut Siulittaasuata Naalakkersuisoqarfiata Namminersorlutik Oqartussat suliffeqarfiutaannik 107 millionit koruuninik iluanaarutikinnerulernissaa aamma Peqqissutsimut Naalakkersuisoqarfiup 65 millionit koruuninik aningaasartuuteqarnerulernissaa.
Peqqissutsimut Naalakkersuisoqarfik ilaatigut Dronning Ingridip Napparsimmavissuanut 35 million koruuninik aamma napparsimasunik nunani allani katsorsaasarnernut 24 millionit koruuninik aningaasartuuteqarnerulerpoq.
Isumaginninnermut Naalakkersuisoqarfik aamma immikkut aningaasartuuteqangaassalluni nalunaarpoq, naalakkersuisoqarfiup soraarnersussutisiassanut 59 millionit koruuninik atuivallaartoqassasoq naatsorsuutigaa.
Naalakkersuisut missingersuutit malittareqqiivigineqarnerat juunip tallimaani ataatsimiinnerminni tusaatissatut tiguaat.
