Kiss and fly-qarfik Nuummi mittarfiup illorsuartaani nutaami iserfiuvoq siulleq. Tassani inuulluaqqusisoqartartussaavoq.
Igalaaqassaaq, taamaalillunilu isiginnaarlunilu aalaterisoqarsinnaassaaq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
- Taannalu aamma mittarfiup tamarmiusup immikkoortorissavaa misigissutsinik aalatsaffiunerpaaq, Greenland Airportsimi siulersuisut siulittaasuat Kjeld Zacho Jørgensen oqarpoq.
Greenland Airportsip pisortaa Jens Lauridsen ima nangippoq:
- Piffiup uuma igalaavi akuttunngitsumik salinneqartassapput, meeqqammi mikisut tassani nikorfallutik qingartik igalaamut tutsittassavaat.
Suleqatigiit taakku ullaami, illorsuup tamanut ammarneqarnissaa akunnialunnik sioqqullugu, illorsuarmi suli sanaartorfiusumi immikkut takuniaatitsisuupput.
- Illorsuup sanaartorneqarnerata naammassinissaa sioqqullugu illorsuup ammarneqarnera nalliussissavarput. Taamaaliornikkut inuit illorsuaq immikkoortuilu tamaasa takuniarsinnaassavaat. Illorsuaq atorneqalerpat taamaaliortoqarsinnaajunnaassaaq, Jens Laudridsen nassuiaavoq.
Isaariaq maanna mittarfiup illorsuartaanit allaaneruvoq. Naak sanaartorfiulluni tukakkaluartoq, taamaattoq maanna Nuummi atorneqartumi iserlugu allaffinni ilisimaneqartunik iikkanik naammattuugassaqarfiusumit kusanarneruvoq. Isigisaq eqqumiippoq.
Toqqakkanut ikittunut allat tamaasa sioqqullugit illorsuarmik takuniaatinneqartunut ilaavoq ineqarnermut attaveqarnermullu naalakkersuisoq Hans Peter Poulsen.
Illorsuarmi isumannaallisaavia muteerniulluinnartup saniani ini napparsimasunut taamaallaat atugassiaq inissisimavoq, taamaalilluni napparsimasut eqqissisimanartunik avatangiiseqalissallutik. Meeqqat ingiaqateqarnatik angalasut aamma eqqarsaatigineqarput. Taakku illorsuarmi igalaarsualimmi piffimmi allami inissaqartinneqarput.
Leiff Josefsen
- Billetsimik inniminniinngikkaanni angalaneq aallartinneqarsinnaaneq ajorpoq. Kalaallit Nunatsinni mittarfiliornermi tamanna aamma atuuppoq. Attaveqaatillu Amerikamiut sakkutooqarfigisimasaat kingornutaraavut, taamaammallu manna aalajangerneq kalaallit tamakkiisumik aalajangigaraat. Taamatut iliornissaq qunusuitsuunissaq pisariaqartitsiviuvoq. Tassani ilisimariikkat qimanneqarput nutaarluinnaallu iserfigineqarlutik, taanna nalunaaquttap akunnerata ataatsip missaani takuniaatinneqareernermi kingorna oqarpoq.
Nassatanik tunniussisarfik
Jens Lauridsenip inuit ikittut nassatanik tunniussivinnukaappai. Taakku suli ivertinneqanngillat, katillugillu arfineq pingasuusussaapput. Tamanna maanna pigisanit pingasunit amerleriarneruvoq, Air Greenlandillu Københavnip mittarfiani tunniussiviit tallimat arfinillillu akornanni amerlatigisut maanna atortarpai. Nassatanik tunniussiviit tamarmik sullissisoqartartussaanngillat.
- Tassanilu periuseq nutaaq atulissavarput. Uani kufferti nammineq ilineqartartussaavoq, kuffertilu oqimaappallaanngippat, kuffertit aallarunneqassaaq taamaalillutillu nassatatit tunniutissavatit, taanna oqarpoq.
Pissanganassaaq, Jens Lauridsen oqarpoq, Københavnimimi tunniussanik tunniussisarfiit atorneqarpiarneq ajorput.
Isumannaallisaaviup nutaartanut ilaavoq. Maanna nunatsinni angalaniarnernilu allaat misissorneqaqqaartassaagut. Periutsit nutaat saniatigut aamma atortut nutaat atorneqalissapput. akikinnersiuisoqarsimanngilarlu. Pitsaanerpaat nutaanersaat. Københavniluunniit taama nutaaliaatigisunik atortoqanngilaq.
- Uku atorlugit ingerlatsilerutta, kunngeqarfimmi mutiunersaassaagut. Soorunami siunissamut qularnaariniarluta tamakku toqqarpavut, Jens Lauridsen oqarpoq.
Atortut nutaat atorlugit – amerlasuunut oqiliallaataasussamik – imerpalasut computerillu taskimit amuneqartariaarutissapput.
- Jakkip, taskip/kuffertip ilillugu ajanneranit, illuatungaanilu tiguneranit allamik isumagisaqartoqartassanngilaq, pisortaq oqarpoq.
Mittarfittaami siunissamut isumannaarinissaq annertuumik eqqarsaatersuutigineqarpoq. Illorsuaq – immaqa ukiut qulikkaat arlallit qaangiuppata – mikivallaalerpat alliliinissaanut periarfissaqarpoq. Allilerissutini nassatat ingerlaarfii isumannaallisaaviit tamatigut ajornartorsiutaanerpaasarput. Tassungali killittoqassappat tamanna Nuummi nalaanneqassanngilaq. Maanimi pissutsit marluk talliliinermi ilanngullugit eqqarsaatigineqareerput, taamaalillunilu tamanna eqqaannerusumik ingerlanneqarsinnaajumaassaaq.
Una atulerutsigu taanna kunngeqarfimmi tamani muteerniunerpaassaaq, Jens Lauridsen oqarpoq
Naak illorsuarmi tikittut 400-t aallartussallu 400-t isumagineqarsinnaasussaagaluartut, amerlanerujussuarnut suli inissaqarpoq.
- Ilaasut allatut misigissapput, killilerujussuarmillu periarfissalittut misigissanngilaat, Kjeld Zacho Jørgensen ilassusiivoq.
- Coronap kingorna Issittoq allatut isigineqalerpoq, taamaammallu Kalaallit Nunaat annertoorujussuarmik periarfissaqarpoq, taanna nangilluni oqarpoq.
Akisunerni ilaasut
Mittarfittaami atortut kisimik pitsaanerpaajunngillat, tassanilu illorsuup saavani timmisartut anginerit arlaallit kisimik inissaqartinneqassanngillat. Sulisoqarpormi aamma.
- Securitymi ilitsersuisugut siulliit Københavnip mittarfiani ilinniartitaaqqammerput, Jens Lauridsen oqarpoq.
Nassatat ingerlaarfiat nutaamut pisariusumullu sulisussat Greenland Airportsip Nuuk Imermit pissarsiarai.
- Elektrikerimik pikkorissumik Nuuk Imermi ingerlatsivimmik sulinermik misilittagaqartumik, nassatanik ingerlatsivitsinnik passussisussamik pissarsivugut. Teknologi taanna pisariusuuvoq nunatsinni sungiusimanngisarput, taamaammallu inuit piginnaanillit qularnaarpagut, taamaaliornitsinni tassanngaannaq unittuunnginniassagatta, Jens Lauridsen oqarpoq.
Mittarfiup illorsuartaa maanna akisunernut ilaasunut, aallarnissaminnut utaqqisunut immikkut utaqqisarfeqalissaaq. Quleriit qullerpaartaat ilaassunut ammassanngitsoq timmisartuussisarnermi sulisunut allaffeqarfiussaaq.
Timmisartuussisarnermilu sulisunut kivittaarisartunut illorsuarmi pissutsit nutaat ajornaannerulaalissapput. Kuffertinik isumaginnittunik kraneqassaaq, soorluttaaq nassatat ingerlaarfii illorsuaq tamakkerlugu ingerlassasut, taamaalillutillu usilersuisunut pissutsit oqinnerulissallutik.
Immaqa angisoorsoorpasinngikkaluarpoq. Kiilerimi nassatanut inissiivik immikkuullarippoq. Nassatat Danmarkimut nunatsinniluunniit ornitassanut allanut ingerlaarnissaat apeqqutaatillugit ingerlaarfii marluupput, taakkulu illorsuup takissusaa tamakkerlugu ingerlaarfeqarput. Inimi sanianiittumi kuffertit scannerneqartarput, inimilu allami timmisartortartut sulisullu allat isersimaarfeqassapput.
Leiff Josefsen
- Qanga usilersuisartut sivisuumik sulisanngillat qitiminnillu anniaateqalertarlutik, Kjeld Zacho Jørgensen Jens Lauridsenilu oqarput, taakkulu oqalukkamik allanngillat aappariit sivisuumik inooqatigiissimasut; arlaata oqaatsit aallartitai aappaata naasarai.
Taamattaarlu aamma eqqiaasarneq eqqarsaatigineqarsimavoq. Illup tamanut ammatinnissaa ullormik sioqqullugu anartarfiit salinnissaat pillugu maili takkuppoq. Tamanna ullormut arlaleriarluni pisassaaq, Jens Lauridsen erseqqissaavoq.
Novembarip 28-at sukkasuumik qanilliartorpoq, Kalaallillu Nunaata avataanit sammineqarnera annertuvoq.
- Suut tamaasa iluatsittariaqarpavut, tutsuiginassuserpummi attattariaqarparput, tamanna Jens Lauridsenip Kjeld Zacho Jørgensenillu isumaqatigiissutigaat.
- Taamaammat ulloq taanna silagittariaqavippoq, Air Greenlandip direktøria, Jacob Nitter Sørensen oqarpoq imalu paasissutissiilluni:
- Naatsorsoqqissaakkat naapertorlugit novembarip qaammataa ukioq tamaat isigissagaanni silarluffiunerpaasarpoq. Oqaannarpunga..
- Silagikkumaartorli upperaarput, taanna illarluni oqarpoq.
