Múte amigartooruteqaratarsinnaaneq pillugu: Aningaasartuutigisagut maanna misissoqqissaarpagut

Aningaasaqarnermut Naalakkersuisoqarfik Naalakkersuisunut ernumanartumik nalunaaruteqarpoq. Naalakkersuisoqarfik naapertorlugu isertitat ikileriarnerat aningaasartuutillu amerleriarnerat pissutigalugit nunatta karsiata aningaasaqarnera ukioq manna 225 milliuunit koruuninik ajornerulersinneqassaaq, taamaattumillu missingersuusiorneqaqqaarnermit amigartooruteqarnerunissaq naatsorsuutigineqarluni.

Aningaasaqarnermut naalakkersuisup Múte B. Egedep (IA) pissutsit ilungersunartutut oqaatigai, neriorsuutigalugulu pissutsit pimoorunneqassasut:

- Pissutsit taamaannerisa takutippaat aaqqiissuussaanerput allaanerummat allatut iliortariaqartugut. "Paaqqinnittussatut" inissisimanerput ilisimariigarput maanna atorsinnaanngilaq, aningaasaqarnerput sanngiinnerummat, oqarpoq nangillunilu:

- Nalunngereersimavarput soraarnerussutisiaqalernissamut aningaasartuutit qaffakkiartorumaartut, maannalu qaffakkiartorneri malugineqarsinnaalereerput. Tamatuma saniatigut suliffeqarfinnit sinneqartooruteqarnissaq amigaatigaarput, qaavatigullu peqqinnissaqarfimmut aningaasartuuteqarnerulerluta. Siunissami tungiuinerup pitsaasup attatiinnarnissaa qulakkeerniarutsigu, aningaasaqarnerup patajaannerunissaa pisariaqartoq takusinnaavarput.

Suliniuteqalereerpoq - ajornartuuittoqalinnginnerarpaa

Múte B. Egede naapertorlugu Naalakkersuisut aningaasanik sipaarniarlutik suliniuterpassuaqarput, atugarissaarneq pingaarnerpaaq eqqunngikkaluarlugu:

Missingersuutinik malittareqqeereernermi nunatta karsia amigartooruteqangaassangatinneqartoq

- Oqarsinnaavunga aningaasartuutit annikillisinniarlugit massakkut misissuileruttorpugut, isumaginninnerup pingaarnersaata qulakkeernissaa sulissutigalugu, oqarpoq aaqqiissuusseqqittoqartariaqarneralu erseqqissarlugu:

- Pisortat aaqqissuussaanerat nutaaliaanerulersinniarlugu pisariillisarniarlugulu aaqqissuusseqqittoqartariaqarpoq. Allaffissornikkut suliassat ikilisinneqartariaqarput, innuttaasunullu iluaqutissat inuiaqatigiinni atugarissaarfiusuni atugarissaarnermut naleqquttariaqarlutik.

Apeqqut: Kalaallit Nunaat aningaasaqarnikkut ajornartuuikkaluttuarpa?

- Maanna iliuuseqanngikkutta aningaasartuutit isertitanit amerlanerunissaat ilimagineqartuarsimavoq. Pissutsit taama ittut qanilligaluttuinnarput. Qanoq iliuuseqartariaqarpugut sammivissarisatsinnillu isumaqatigiiffeqartariaqarluta, immitsinnut tikkuartuutiinnarata.

- Maanna iliuuseqanngikkutta ajornartorsiulersinnaavugut. Kisiannili oqarusuppunga pissutsit ajornerulinnginnissaat pillugu nammineq suli iliuuseqarsinnaavugut.

Aningaasanik suli karsimiittoqarpoq

Apeqqut: Naalakkersuisooqatigiissimasut isumalluarpallaarsimavisi?

- Kina kikkullu susimanersut tikkuartuerusunngilanga. Oqarusunneruvunga aningaasaqarnikkut unammilligassaqarpoq, tamannalu ukiuni qulit 15-illu akornanni ilisimaarereersimavarput.

- Iliuuseqartoqarsimavoq, pissutsilli takutippaat aningaasaqarneq patajaatsuuinnaassappat ataqatigiissumik aaqqissuusseqqittoqartariaqartoq, Múte B. Egede oqarpoq.

Aaqqissuusseqqinnerit pillugit ilaatigut Naalakkersuisut ataavartumik ineriartornissamullu pilersaarusiaat aamma ilinniartitaaneq inuussutissarsiornermillu siuariartorneq nunatta karsiata isertitaanut aningaasartuutaanullu oqimaaqatigiissaarinissamut matuersaatit pingaarnerit ilaattut innersuussutigai.

Apeqqut: Nunatta karsia suli aningaasanik tigoriaannarnik pigisaqarpoq, kisiannili ingerlatsinermut aningaasartuutissanut taarsigassarsisoqarsinnaanera killinneqarsinnaava?

- Maannakkut aningaasanik tigoriaannarnik peqarpugut, taamaattumik iliuuseqarsinnaavugut. Maannalu iliuuseqarutta taarsigassarsiniartariaqalernissaq pisariaqalissanngilaq, Múte B. Egede oqarpoq.

Aningaasaqarnermut naalakkersuisoqarfiup marsimi missingersuusiaa naapertorlugu Namminersorlutik Oqartussat aningaasaateqarfiini aningaasat qaammatini aqqaneq-marlunni kingullerni 382 millionit koruunit aamma 1.208 millionit koruunit akornanniissimapput.