Múte: Annernassaaq – kisianni suli iliuuseqarsinnaavugut

Naalakkersuisut sipaarniarnissamut pilersaarutiminni innuttaasunut aallinnginnissamik pingaartitsinerat isumaqarpoq 2026-mut aningaasanut inatsisissatut siunnersuummi ukiunilu missingersuusiorfiusuni tulliuttuni, akileraarutit qaffanneqarnissaannik imaluunniit akitsuutinik qaffaanissamik Naalakkersuisut pilersaaruteqanngitsut.

Taamatuttaaq qinigaaffiup siuliani oqilisaatit akuersissutigineqarsimasut utertinneqarnissaat pilersaarutaanngitsoq erseqqissaatigineqarpoq. Assersuutigalugu sulinermut ilanngaat aamma akileraartarnermik aaqqissuusseqqinnerup tunngaviinik allanngortitsinissaq pilersaarutigineqanngilaq, aaqqissuusseqqinneq taanna 300 millioner koruunit sinnerlugit maannamut naleqarsimavoq.

Aningaasaqarnermut naalakkersuisup tikkuarpaa pisortat ingerlatsiviisa qimerloorneqarnissaat pisariaqartoq, tamannalu pissasoq avataanit misissuisitsinikkut, taakkulu siunnersuusiussasut innuttaasunut pisortat sullissinerat ajorseriaateqartinngikkaluarlugu sipaarniarneq qanoq ingerlanneqarsinnaanersoq pillugu.

Ilimagineqarpoq iluarsaaqqinnissamut ataatsimiititaliaq siunertamut pilersinneqarsimasoq 2025-2026-mi sulissasoq, kingornalu 2027-miit pisortat ingerlatsiviisa pitsanngorsarneqarnissaat aallartinneqassasoq. Tassani pineqarlutik Namminersorlutik oqartussat aamma kommunit ingerlatsivii tamarmik.

Uteriarfeqanngilaq - Pilersorneqartariaqartut amerlipput pilersuisussallu ikiliartorlutik

Aningaasaqarnermut Siunnersuisoqatigiit ukiuni qulikkaani arlalinni politikerinut mianersoqqussutigisimavaat nunami innuttaasut katitigaanerata ineriartornera, tassa innuttaasut suliffeqarnermiit tunuartut amerliartuinnassasut illuatungaanilu sulisussatut isumalluutit ikiliartortut.

- Massakkut aatsaat tassa malugilertulerparput innuttaasut katitigaanerisa ineriartorneq allanngortoq. Inuttussuserput qimerluugaanni inoqutigiit ikittuinnaavugut qajannartumillu inissisimavugut, suli qajannarnerusumut pivugut, sulisussarsiornissatsinnut periarfissakinneruleratta. Taamaattumik pisariaqarluinnarpoq maanna naleqqussarnissarput pissutsinullu nutaanut naleqqussarnissarput.

Tassunga atatillugu kalaallit inuiaqatigiit naatsorsuutigissavaat utoqqalinersianut aningaasartuutit 348 millionit koruuninik qaffariaateqassasut. ullumikkorpiarlu pisortanit utoqqalinersiaannut ukiumut 600 millionit koruunit missaanniipput, ukiunilu tulliuttuni qaffariaatissat eqqarsaatigalugit utoqqalinermut aningaasat atugassat milliardimut siullermut ingerlarsorput.

- Tamanna ilaatigut pissutigalugu Naalakkersuisut soraarnerussutisiaqarnermut aaqqissuusseqqinnissaq siunnerfigaat, taamaalillutillu aaqqiissutissanik attanneqarsinnaasunik aningaasaqarnikkullu isumannaatsunik ujartuillutik. 

- Taamaammat aamma  pingaaruteqarpoq uagut innuttaasugut namminerisatsinnik akisussaassuseqartariaqartugut pisortanit utoqqalinersiassat isumalluutigineqarnerisa saniatigut. Kisianni maannangaaq takusinnaavarput pisariillisaataasinnaasunik maannakkut pisartagaqartitsinermi iluarsisassaqarluta, Naalakkersuisutillu siunnersuutigaat piffissami soraarnerussutisiaqarnerup aaqqissuuteqqinneqarnissaata atuutilernissaata tungaanut skattekorti aqqutigalugu kinguaattoorutaasut  ilanngaatigineqartassanngitsut.

Múte: - Naalagaaffik innuttaasut katitigaanerannik ineriartorneq allanngortitsivoq

Aningaasaqarnermut akileraartarnermullu Naalakkersuisoq, Múte Bourup Egede (IA) tusagassiortunik katersortitsinermi innuttaasut katitigaanerisa taamak sukkatigisumik sakkortutigisumillu allanngorneranut pissutaaqataasut eqqartornissaannut annilaanganngilaq:

- Naalagaaffik Danmark spiralilersuinermik suliniuteqanngitsuuppat, taava innuttaasut katitigaanerisa ineriartornerat nalimmassimanerussagaluarpoq, maannami utoqqalillutik sulinermiit tunuarartut, sulisussatullu isumalluutit ikinnerunerat misigaarput.

Sermitsiamit Múte Bourup Egede aperaarput spiralilersuinermik suliniuteqarnermi Kalaallit Nunaanni inuttut ineriartornermut sunniutai pillugit naalagaaffik akisussaaffimmik tigusisussanngorlugu Naalakkersuisut pilersaaruteqarnersut. 

- Misissuineq suli ingerlavoq, kisianni naalagaaffimmut oqaloqatigiissutigisassagut arlallit pingaaruteqartut siunitsinniipput, aamma naalagaaffiup akisussaaffigisimasaminik arlalinnik sumiginnaasimanera pillugu oqaloqatigiissutissaqarpugut, Bourup Egede akivoq, maannali itisilikkamik  nassuiaateqarusunngilaq naalagaaffiup Kalaallit Nunaanniit taarsiiffigineqarnissamik piumasaqaateqarsinnaanera pillugu. 

Taanna tassaavoq nassuiaatit annerit ilaat, sooq nunap aningaasaqarnera taamak pilertortigisumik patajaatsumik ingerlanermiit qajannartumut ingerlalernermut allanngoriataarnera pillugu.

Sermitsiamiit ulluni tulliuttuni aningaasanut inatsisissatut siunnersuut sukumiinerusumik misissuataaqqissavarput.