KL

DK

Múte B. Egede Fox News-imi unnugu ilanngutassiamiissasoq

Nunatta nalunaaqutaa malillugu sisamanngornermi unnukkut tv-kkut aallakaatitassiorfimmi Fox Newsimi Bret Baier Múte B. Egede oqaloqatigissagaa oqaatigineqarpoq.

Naalakkersuisut siulittaasuat, Múte B. Egede, oqarpoq Kalaallit Nunaat USA-mut suleqatiginninnerata annertusineqarnissaanut piareersimasoq. (Arkivfoto).
Ritzaus Bureau
Saqqummersinneqarpoq

Sisamanngornermi unnukkut Amerikamiut tv-qarfiani Fox News-ip aallakaatitassiaani "Special report"-imi kalaallimik pulaartoqassaaq.

Sisamanngornermi amerikami unnukkut nalunaaqutaq 18.00 - nunatsinni nalunaaqutaq malillugu 21.00 - Fox Newsimi aallakaatitsisup Bret Baierip Naalakkersuisut siulittaasuat Múte B. Egede apersorniarpaa.

Tamanna Bret Baierip tamat attaveqatigiittarfianni x-imi allagaani takuneqarsinnaavoq.

- Unnugu: Kalaallit Nunaanni naalakkersuisut siulittaasuat "Special report"-imi, taanna allappoq.

Saqqummiunneqartumi ilanngunneqarsimavoq videoliaq, tassani Donald Trumpip Amerikamiut Kalaallit Nunaannik aqutsilertariaqarneranik oqariartuuteqartoq.

Tamassuma kingorna takutinneqarpoq Múte B. Egedep assiga, pulaartussatut nalunaarutigineqarluni.

- Kalaallit Nunaanni naalakkersuisut siulittaasuata Donald Trump maanna akivaa. Bret (Baier, aaqq.) apersuisuuvoq, arajutserusunnavianngilatit, videomi oqaatigineqarpoq.

„Special report“ Fox News-ikkut nutaarsiassiissutaavoq unnuit tamaasa aallakaatinneqartarpoq, aallakaatitsisorlu tassaavoq Bret Baier.

Piffissami kingullermi Amerikamiut Kalaallit Nunaat soqutiginerulersimavaat.

USA-mi præsidentinngortussap Donald Trumpip præsidentitut aappassaanik ivertinneqarnissani sioqqullugu Kalaallit Nunaata, Trumpip isumaa naapertorlugu USA-p isumannaatsuuneranut „pingaaruteqangaartup“, pigilernissaanik kissaateqarnini erseqqissumik oqaatigaa.

Tamanna pissutigalugu Múte B. Egedep juullingajalersoq erseqqissaavoq Kalaallit Nunaat tuniniarneqanngitsoq.

Tamatuma kingorna arlaleriarluni Kalaallit Nunaata tuniniarneqarsinnaanera itigartitsissutigisarpaa.

Múte B. Egedelli oqaatigaa Kalaallit Nunaat USA-mik suleqateqarnerunissamut piareersimasoq, ingammik aatsitassarsiornermut tunngatillugu.

Aammattaaq nunatta naalakkersuisui nunani allani tusagassiuutini ulluni kingullerni sassartarput piffissami kingullermi pisut oqaaseqarfigalugit.

Naaja Nathanielsen (IA), ilaatigut aatsitassanut, nukissiornermut naligiissitaanermullu naalakkersuisuusoq, The Guardianimut oqaaseqarpoq The Washington Postimilu isumaliutersuummik allalluni.

The Guardianimut oqarpoq Trumpip Kalaallit Nunaannut soqutiginninnera „Københavnimiunut eqeersaataasoq“.

- Ukiorpassuarni EU-mit USA-millu akuliunneqarnerunissaq sulissutigisimavarput. Mianersortumik oqaatigisinnaavara pisariaqartittarsimasatsinnik maanna soqutigineqaleratta, nutaarsiassaqartitsivimmut oqarpoq.

Washington Post-imilu allappoq Kalaallit Nunaat USA-p ataaniilerusunngitsoq, suleqatigiinnerulli annertusineqarnissaanut periarfissanik takusinnaalluni.

inuiaqatigiit grønland er ikke til salg fox news donald trump samfund usa múte b. egede

ATORFIIT Se alle jobs

Powered by Labrador CMS