NAALAKKERSUISOOQATIGIINNISSAMUT ISUMAQATIGIINNIARNERIT
Múte: Isumaqatigiinniutigisassat suli qajannarpallaarput
Inuit Ataqatigiit siulittaasuat, Múte Bourup Egede, Siumup siulittaasua, Vivian Motzfeldt, assigalugu isumaqatigiinniarnernut tunngatillugu isumalluarpallaanngilaq: - Maannamut takujuminaatsipparput isumaqatigiinniarnerit angusaqarfiullutik piviusorsiortumik tigussaasumillu kinguneqarsinnaanersut, taanna erseqqissaavoq.
Partiit allat assigalugit Inuit Ataqatigiit Demokraatinik arlaleriarlutik ataatsimeeqateqarput. Partiip siulittaasuata, Múte Bourup Egedep, takujuminaatsippaa isumaqatigiinniarnerit naapeqatigiiffiusumik kinguneqarsinnaanersut.
Assiliisoq (toqqorsivimmit): Leiff Josefsen
Maanna ilimatsaannarsiartuaarpoq Inatsisartut siuliini illuatungiliuttuusimasut (D, N, A) illuatungeriit saqitsaassutigisarsimasaat nassarlugit qinigaaffik nutaaq aallartikkusussimagaat.
Inuit Ataqatigiit siulittaasuat, Múte Bourup Egede, Siumup siulittaasua, Vivian Motzfeldtitulli, takujuminaatsippaa qinersinerup kingorna ataatsimeeqatigiinnerit isumaqatigiinniarnivinnut toqqammavissiisinnaassanersut:
- Demokraatinik arlaleriarluta ataatsimeeqateqarpugut, maannamulli ataatsimiinnerit aallaavigalugit tunngavissatsinnut naleqqiullugu, suli immitsinnut ungasippallaartugut nalilerpara.
Assersuutinik tigussaasunik taasaqalaarsinnaavit?
- Pissusissamisuussanngilaq ataatsimiinnernit isumaqatigiinniarnernillu paasissutissanik sukumiinerusunik saqqummiussinissaq. Taamaattorli ataatsimut isigalugu nassuerutigisariaqarpara, siunissamut isigisumik anguniagaqaqatigiissinnaanerput amigaatigigatsigu aammalu politikkikkut peqatigiilluni suliniutinik pilersitsisinnaaneq, piffissami ilungersunartorsiuleruttorfitsinni, avatitsinnillu sakkortuumik kimigiiserfigineqaleruttorfitsinni; isumaga malillugu isumaqatigiinngissutit tulleriiaarinermi allerpaasariaqaraluartut aammalu nunatta siunissaa pillugu sulineq sallerpaasariaqaraluartoq qinigaaffimmi maanna aallartitatsinni.
Suliniuteqarnissamut pisariaqartitsineq
Múte Bourup Egede oqaluttuarpoq Inatsisartunut qineqqusaarneq qinersinerlu nalinginnaasumit sivikinnerutinneqaarsimasut, nunatta aalajangiisinnaassusilinnik Naalakkersuisoqarnissaa piaarnerpaamik qulakkeerneqartariaqarmat. Tamanna USA-p præsidentia Donald Trump-ip nunatsinni "aqutsinissamik piginnittuunissamillu" piumasaqarneranut akiuiniarnermi pisariaqarmat.
- Kisianni maannamut Demokraatit ingerlataannik isumaqatigiinniarnerit arriitsuinnarmik ingerlapput siuarsaanissarlu amigaataalluni. Inuiaqatigiittut avataaneersunit sakkortuumik tatisimaniarneqarnerput eqqarsaatigalugu iliuuseqarnissamik siuariartornermillu amigaateqarpugut, maannakkullu kigaatsumik ingerlasoqarnerani naliliivunga ullut angusaqarfiunngitsut ingerlatillugit, navianartumik sanngiitsutullu inissisimanerput annertusiartuinnassasoq. Taamaattumik isumaqatigiinniarnerni iliuuseqarnissamik angusaqarnissamillu amigaateqarpunga, Inuit Ataqatigiit siulittaasuat, Múte Bourup Egede, oqarpoq.
Inatsisartuts aalajangiinerisa utertinneqarnissaat pisussanngorpa?
Inuit Ataqatigiit Siumullu isumaqatigiinniarnerit killiffiat pillugu nalunaarnerat qanoq paasineqartariaqarnersoq eqqoriaruminaappoq, kisianni Demokraatit qineqqusaarumminni qineqqusaarnerullu nalaani nalunaarutigaat Inatsisartut aalajangiineri arlallit utertinneqassasut allanngortinneqassasulluunniit.
Maannakkut isumaqatigiinniarnerit ersersitsinerpat inatsisit aalajangiunneqarsimasut atorunnaarsinneqanngikkunik allanngortinneqarnissaat pilersaarutaalersimasoq? Tassuunaana ajornartorsiuteqartoqartoq?
Tassunga atatillugu Múte Bourup Egede akissuteqarusunngilaq. Kisianni maannamut avammut ersersitsinerit ikittuinnaat pissarsiarisagut naapertorlugit, Demokraatit allannguutinik arlalinnik saqqummiussinissaminnik siunertaqartutut isikkoqarput, tassa Inatsisartuts aalajangiuteriigaasa ilaat atorunnaarsinngikkunikkit allanngortinnissaat siunniussimarpasikkaat.
Assersuutissaavoq akileraartarnermut aaqqissuusseqqinneq. Demokraatit qineqqusaarumminni piumaneruaat akineraarut tamanut appartinneqassasoq, illuatungaani Naalakkersuisut tunuartussat pingaartissimagaat akileraartarnermut aaqqissuusseqqinneq isertitakinnernut annerusumik iluaqutissiissasoq.
Aappaattut assersuutissaavoq aalisarnermut inatsit, Demokraatit sakkortuumik tassunga ilisimaneqartutut akerlilersuinikuuvoq, partiilu qineqqusaarummini nalunaaruteqarpoq "aalisarnermut inatsit pitsaanngitsuusoq". Pingajuattut assersuutissaavoq aatsitassarsiornermut politikki, tassani assersuutigalugu uuliamik gassimillu misissuinermut piiaanermullu Demokraatit ammanerunerarput.
Eqqoriaanerinnaagaluarpoq, kisianni pasitsannarpoq Demokraatit allattorsimaffeqartut inatsisiliat maleruagassallu Inatsisartunit aalajangiiffigineqarsimasut aammalu Inuit Ataqatigiit Siumullu siuttuuffigisimasaat arlallit atorunnaarsinneqanngikkunik allanngortinniarneqarsimasut. Taamaappat, tamanna paasinarnerulaalersitsissaaq, sooq Inuit Ataqatigiit aamma Siumut nassuerutigineraat isumaqatigiinniarnerni partiit imminnut suli ungasinnerannut.
