Múte KNI-mut piumasaqartoq: Enoksen akissuteqarfigisiuk
Namminersorlutik Oqartussat suliffeqarfiutaata KNI A/S-ip qitiusumik allaffeqarfinni sulisut qassiunersut aallaqqaammut paasititsissutigerusunngeqqaaraluarpaa, Naalakkersuisulli siulittaasuata paasissutissat saqqummiuteqqullugit KNI piumasaqarfigaa.
Namminersorlutik Oqartussat piginneqatigiiffiisa ingerlatsineranut akornutaanngitsumik sapinngisamik ammasumik ingerlatsisoqartariaqartoq Múte B. Egede oqarpoq.
Assi: Leiff Josefsen
- KNI A/S pissutsit tunngaviusut patsisigalugit ingerlatsinermut aningaasartuutiminik taama itisiliiffiutigisumik tamanut paasissutissiineq ajorpoq.
Naleqqameersup Hans Enoksenip paragraf 37 naapertorlugu KNI-p qullersaqarfiani sulisut qassiunersut juulip qiteqqunnerani apeqqutigimmagu taama naatsumik akineqarpoq.
Hans Enoksen kingorna matoqqasumik pissuseqarneq paasiumallugu Naalakkersuisunut apeqquteqarpoq, tassanilu Naalakkersuisut siulittaasuata Múte B. Egedep "KNI AS-ip qullersaanut apeqqutigineqarsimasup akineqarnissaa piumasaralugu" erseqqissaatigaa.
Ammasuunissaq piumasarigaa
Taamaalilluni Múte B. Egedep ersersippaa Namminersorlutik Oqartussat ingerlatseqatigiiffiutaanni ammasuunissaq ersarissumillu paasissutissiisarnissaq kissaatigineqartoq. Tamannalu piginnittuunermut politikki pillugu aqutsinermut allakkiami, tamanut saqqummiunneqaqqammersumi Namminersorlutillu Oqartussat ingerlatseqatigiiffiutaanni aqutsisut malitassaanni, qitiusumik immikkoortut ilagaat.
Múte B. Egedep Hans Enoksenimut akissuteqarnermini erseqqissarpaa “Namminersorlutik Oqartussat aktianik piginneqatigiiffii
ingerlatseqatigiiffiup aqutsisui pillugit sapinngisamik ammasariaqarput, aammattaaq
ingerlatseqatigiiffiup ingerlatsinera aqutsisuilu pillugit paasissutissanik sapinngisamik
amerlanerpaanik tamanut saqqummiussisarlutik”.
Enoksenip apeqqutaanut uteqqeriarutta: Qullersaqarfimmi sulisut 2020-miilli 107-it akornanniiginnapajaarsimanerat paasinarsivoq, maannalu aggustimi 102-iullutik.
Kisitsisilli taakkua misissorluaraanni immikkoortortaqarfiit assigiinngitsut akornanni nikerartoqarsimavoq — ilaatigut Aalborgimi immikkoortortaqarfik matuneqarsimalluni.
- Atorfiit
inuttaqanngitsut siuliani saqqummiussami ilaanngillat.
Ilisimatitsissutigineqassaaq immikkoortortaqarfinni ataasiakkaani
sulisut amerlassusaat ingerlaavartumik naleqqussarneqartarmata. Ingerlatseqatigiiffiup qarasaasiai cyber-imillu illersuutai
pisoqalisimasut massakkut aallunniarneqalermata IT-imik
immikkoortortaqarfimmi sulisut amerlineqartariaqarnerat assersuutitut
taaneqarsinnaavoq. Assersuutigalugu piujuartitsinermut tunngasut
isiginiarneqarnerulernerisa nalunaaruteqartussaatitaanerullu
annertusiartornerisa kingunerisaanik piujuartitsinermut tunngasunut
siunnersortimik atorfinitsitsisoqarnikuuvortaaq. Immikkoortortani
allani sulisut ikilisarneqarnikuupput. Piffissami tassani Aalborgimi
immikkoortortaqarfik matuneqarnikuuvortaaq pisiortornernut
assartugassanullu tunngatillugu suliassat Sisimiuni Sullissivimmit
isumagineqalerlutik, KNI akissuteqaammini allappoq.
Arnat pisiniarfinni pisortat amerlanerusut
Akissummi atuarneqarsinnaavoq Sisimiuni sullissivimmi arnat 49-t angutillu 53-it sulisorineqartut. Pisiniarfinni pisortani niuertarfinnilu kisitsisit allaanerulluinnarput, tassanimi arnat 47-upput angutillu 18-iullutik.
