SPIRALILERSUISIMANEQ PILLUGU QULAAJAANEQ
Naaja Nathanielsen: Pisinnaatitaaffiit unioqqutinne-qarsimagunarnerannut takussutissarpassuaqarpoq
Spiralilersuisimaneq pillugu suliami inuit pisinnaatitaaffiinut tunngasortaanut misissuineq suli ingerlavoq. Arnat arlaannaannulluunniit attuumassuteqanngitsunut suliamik qulaajaasunut oqaluttuaat misissuinerup sooq taama pingaaruteqartigineranik takussutissiipput, naalakkersuisoq oqarpoq.
Spiralilersuisimaneq pillugu suliami inuit pisinnaatitaaffiinik nunallu inoqqaavisa pisinnaatitaaffiinik nunarsuarmi tamarmi atuuttunik unioqqutitsisoqarsimanersoq suli misissuiffigineqarpoq.
Assi: Oscar Scott Carl
Spiralilersuisimaneq pillugu suliami arlaannaannulluunniit attuumassuteqanngitsunik ukiuni marlunni qulaajaaffigineqarnera naammassivoq, misissuinerli alla suli ingerlanneqarpoq.
Naalakkersuisut inuit pisinnaatitaaffiinut tunngasortaa 2024-mi misissorneqarnissaanik aallartitsipput.
- Nalunaarusiami qaqinneqartut atorluarneqarsinnaasut isumaqarpunga. Periuseq amiilaarnartoq allaaserineqarpoq. Naalakkersuisut siuliisa misissuineq aallartitaat pisariaqartoq suli erseqqippoq, tassalu erseqqinnerusumik, pisinnaatitaaffinut tunngassuteqartunik aalajangersimasunillu misissuisoqarnera, inatsisinik atuutsitsinermut naalakkersuisoq Naaja H. Nathanielsen (IA) oqarpoq.
Misissuineq taanna uani qaammammi naammassineqartussatut naatsorsuutigineqarnikuugaluarpoq, 2026-mulli januaarimut kinguartinneqarpoq.
- Maanna naammassisinnaallugu neriuutigisimagaluarparput, kisianni suliamik naammassinnissagunik ilisimatusartut qulaajaanerannit paasissutissat maanna saqqummersinneqartut pisariaqartikkamikkit.
- Inatsisilerituujunngilagut politikeriuvugut
Inuit pisinnaatitaaffii pillugit misissuinermit nalunaarusiaq piareerpat, atuarneqaqqaariarluni qulaajaasut nalunaarusiaannut naleqqiunneqassaaq.
Tamatuma kingorna suli allanik iliuuseqartoqassanersoq Naalakkersuisut aalajangiissapput.
- Qanoq iliuuseqartoqassanersoq oqaatigissallugu siusippallaarpoq, oqaatigisinnaavarali suliap ilaani tamarmiluunniit inuit pisinnaatitaaffiisa unioqqutinneqarsimarpasinnerannik takussutissarpassuaqarnera, taakkulu takujumaarpagut.
- Inatsisilerituujunngilagut politikeriuvugut, taamaattumik immikkut ilisimasallit misissueqqullugit qinnuiginikuuagut, Naaja H. Nathanielsen oqarpoq.
Misissuinermi inuit pisinnaatitaaffiinut tunngasut kisimik misissorneqanngillat, aammali nunap inoqqaavisa pisinnaatitaaffii isumaqatigiissutillu Danmarkip peqataaffigisai, ilaatigut inuiannik nungusaannginnissaq pillugu isumaqatigiissut, unioqqutinneqarsimanersut misissorneqarput.
Atuarlugu sakkortusoq
Naaja H. Nathanielsenip apersornerani spiralilersuisimaneq pillugu suliaq arlaannaannulluunniit attuumassuteqanngitsunit qulaajaasut nalunaarusiaat suli atuarpaa.
Aalassassutigaali.
- Atuarlugu sakkortusoq oqaatigisinnaavara.
- Arnat aqqaneq-marlunnik ukioqarlutik spiralilerneqarsimanertik pillugu oqaluttuaat atuarlugit. 14-inik ukiullit nalallutik nilliasimasut, oqarpoq.
Arnallu 354-it qulaajaasunut misigisimasatik pillugit oqaluttuaat tunngavigalugit inuit pisinnaatitaaffiinut tunngasortaata misissuisoqarnissaa Naalakkersuisut pingaartissimavaat. Danskit naalakkersuisuisa misissorumanngisaat.
- Ingerlariaqqissagutta suut tamaasa qiviaqqaartariaqarpavut, Naaja H. Nathanielsen nalunaarusiaq pillugu oqarpoq, nangipporlu:
- Atuarlugu oqitsuinnaanngilaq. Arnat oqaluttuarniarlutik aalajangersimasut ataqqingaarpakka misigisimasaallu pillugit aliasuutigalugit.
