NAALAGAAFFEQATIGINNEQ PILLUGU ATAATSIMIINNEQ
Naalagaaffeqatigiinnerup nutarterneqarnissaa
- Ataatsimoorfitta nutarternissaanut aqqutissamik nassaarniarnissatsinnut misigivunga tamatta ataatsimoorluta piumassuseqartugut, taannalu nunat pingasuulluta tamatsinnut isumaqarluartumik angusaqarniarfigigipput, Statsminister Mette Frederiksen (S), naalagaaffeqatigiinneq pillugu ataatsimiinnissaq sioqqullugu oqarpoq, ataatsimiinnerlu massakkut Savalimmiuni ingerlanneqarpoq.
Assit qimerluukkit assip siulliup tikkuutitaa toorlugu
Qularutissaanngilaq Danmarkip, Savalimmiut Kalaallillu Nunaata siuttuisa akornanni ikinngutigiinnermik kissalaartumik tatigeqatigiinnermillu tunngaveqartoq, assimmi amerlasuut takutippaat aqutsisut pingasut naapeqqinnerminni nuannaarnermik takutitsillutik pakkutaartartut.
Ataatsimoornerup inuppalaassusertaa taannaavoq. Kisianni aamma ataatsimoorneq taanna politikkikkut ersarissumik sammivittaqarpoq, inuit ikittuinnaat ilisimasaqarfigisagaat, tassanimi isumaqatigiinniarnerit amerlasuut ingerlanneqartarput, illuatungeriit ataatsimoorlutik nalunaaruteqarnissamut piareeraangata aatsaat tamanut tusarliunneqartartunik.
Ministeriuneq Mette Frederiksen (S) naalagaaffeqatigiinneq pillugu ataatsimiinneq, massakkut Savalimmiuni ingerlanneqartoq sioqqullugu, nalunaarpoq naalagaaffeqatigiinneq nutarterneqassasoq, nunat pingasut tamarmik iluaqutissarsiffigisassaanik.
Anguniagaq taanna, tassa naalagaaffeqatigiinnermik nutarterinissaq, aamma Amerikamiut præsidentiata "Kalaallit Nunaat aqullugu pigilersinnaallugu" piumasaqalernera sioqqullugu aallartinneqartoq.
Kalaallit Nunaata tungaanit, avammut politikkikkut oqartussaassuseqarnerulernissamik kissaateqartoqarpoq piumasaqartoqarlunilu, Danmarkimut piumasaqaataasup annertusiartuinnarnera malinnaavoq, taamatuttaaq Kalaallit Nunaata Danmarkillu ataatsimoorussamik oqaluttuarisaaneranni "kapitalit taartut" saqqummeralermata oqallinnerit sakkortuut ingerlanneqarput aammalu Danmarkimut piumasaqaatinik sukaterisoqarneranik kinguneqarlutik.
Savalimmiunut tunngatillugu, Savalimmiut namminersornermik annertunerusumik piumasaqarlutik kissaateqarput, aamma nunanut allanut tunngasutigut politikkikkut suliassaqarfinni, assersuutigalugu Savalimmiut nunarsuarmi niuernermik kattuffissuarmut WTO-mut nammineq nunap taaguutaa atorlugu ilaasortaalerumallutik piumasaqarput.
Sermitsiamit Naalakkersuisut siulittaasuat, Jens-Frederik Nielsen (D) oqaaseqartinniarlugu sulissutigaarput, ilaatigut naalagaaffeqatigiinnerup nutarsarneqarnissaanut naalagaaffeqatigiinnermi ataatsimiinnermi iliuusissanik aalajangersimasunik saqqummiussisoqassanersoq akissutissarsiniarluta..
