Naalakkersisut Campus Kujallermi Niuernermik Ilinniarfimmilu siulersuisut suliassaannik tigumminnikkallarput: Kajumissuseerunneq
Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup Campus Kujallermi aamma Niuernermik Ilinniarfimmi siulersuisut suliassaannik utaqqiisaasumik tigumminninnissaannik Naalakkersuisut aalajangerput, tamannalu 1. januar 2025-p tungaanut ingerlassssaq. Siulersuisut tunuarniarlutik aalajangernerisa kingorna taama aalajangertoqarpoq.
Campus Kujallermi aamma Niuernermik Ilinniarfik-Nuummi ataatsimoorussamik siulersuisut oktobarimi 2024-mi ilaasortanit arfineq-marluusuni arfinillit tunuarmata, ilaasortarlu kingulleq juunimi tunuarmat atorunnaarsinneqarput.
Naalakkersuisoqarfiup Sermitsiamut nassuiaatai naapertorlugit siulersuisuni ilaasortat kajumissuseerunnertik pissutigalugu tunuarput.
Taamaattumik Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup Campus Kujallermi aamma Niuernermik Ilinniarfik, Nuummilu siulersuisut suliassaannik utaqqiisaasumik tigumminnissaaq, tamannalu 1. januar 2025-p tungaanut ingerlassasoq.
Taama Naalakkersuisut novembarip aallaqqaataani ataatsimiikkamik aalajangerput.
Siulersuisut inatsisitigut atorunnaarsinneqartut
Naalakkersuisut inatsisissasut saqqummiussaat Inatsisartut upernaaq akueraat, tassani nuna tamakkerlugu ilinniarfinni siulersuisut atorunnaarsinneqarlutik. Siulersuisut atorunnaarsinneqarnerisigut 2 millionit koruunit missaanni sipaarutiginiarneqarpoq, inatsillu 2025-mi januaarip aallaqqaataani atuutilissaaq. Ilinniarfiit naalakkersuisoqarfimmit toqqaannartumik siunissami aqunneqalissapput.
Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik aningaasaqarnerup, ilinniartitaanerup, inatsisilerinerullu iluani piginnaasalinnik inunnik pingasunik sulianik isumaginnittussanik toqqaassasoq aalajangerput, taakkunanngalu ataatsimik attaveqaataasussamik toqqaassasoq.
- Naalakkersuisoqarfiup toqqagai toqqaannginnerup siorna ilinniarfiit siulersuisorisimasaasa aalajangersimasaannik atugassanngortissimasaannillu akisussaaqataatinneqarsinnaassanngitsut imminnullu akisussaaqataasunngortissinnaassanngitsut.
Misissuineq
Naalakkersuisut aamma aalajagerput ilinniarfinni pineqartuni ingerlatsinermut tunngatillugu misissuisoqassasoq.
Campus Kujalleq aamma Niuernermik Ilinniarfik Nuuk pisortanit pigineqartuupput ataatsimoortunik siulersuisoqarlutik.
Siulersuisunut ilaasortanik toqqaaneq iluaqutaanavianngitsoq
Inuussutissarsiornermut ilinniarfiit pillugit inatsit nutaaq, 2025-mi januaarip aallaqqaataani atuutilertussaq pissutaalluni siulersuisut atorunnaarsinneqassapput, aamma Naalakkersuisut inuussutissarsiornermut ilinniarfiit akisussaaffigilertussanngorpaat.
Taamaattumik naalakkersuisoqarfik isumaqarpoq piffissami taama sivikitsigisumi siulersuisuni ilaasortanik inuttassarsiuineq iluaqutaanavianngitsoq.
- Kattuffiit siulersuisunut ilaasortassanik toqqaasimasut attavigineqareernerata kingorna aalajangerneq tapersersorpaat, januaarip aallaqqaataata tungaanut siulersuisunik nutaanik toqqaanissaq iluaqutaanavianngitsoq, Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik allappoq.
