Naalakkersuisoq ernisunut qimaguttunut qisuariartoq:
–  Alianartorujussuuvoq

Arnat pingasut erninermut atatillugu toqukkut qimagupput, tamanna qaammatit pingasut ingerlaneranni pivoq.

Arnanut qanigisaasut inuit attaveqatigiittarfiitigut Facebookikkut oqaluttuaraat arnat erninermi ernereernermilu toqukkut qimagussimasut, oqaluttuallu Facebookikkut inunnit hunnorujulikkaaniit siammarterneqarput.

Peqqinnissamut Naalakkersuisoq, Agathe Fontain (IA) pisut tusarsimallugit alianartorujussuartut nalilerpai:

- Siullermik soorunamili taakku pingasut tamarmik pillugit alianartorujussuuvoq. Nalaakkusunnginnerpaasagut nalaappagut. 

- Siullermik soorunalimi alianartorujussuupput taakku pingasut tamarmik. Nalaakkusunnginnerpaasagut tassani nalaappagut. Aliatsannaqaaq nalaallugit, assorsuaq attortissutigivakka, Agathe Fontain, Sermitsiamut oqarpoq.

- Unammillernartuniippugut

Agathe Fontainip inuit ataasiakkaat pillugit oqaaseqarsinnaannginnini ilisimatitsissutigaa, nipangersimasussaatitaagami. Suut toqqutaanersut ilanngullugu oqaatigisinnaannginnerarpaa qanorlu pinngitsoortinneqarsimasinnaagaluarnersut.

Ataatsimullu oqaatigalugu erninermut tunngatillugu unamminartoqarnerarpaa:

- Unamminartumiippugut, atorfinitsitsiniartarnerit assigiinngitsut unamminartumiitittuarigut nalunngilarput.

- Kisianni taamaakkaluartoq partiinut tamanut 2024-mut isumaqatigiinniutiginikuuakka, aamma peqqinnissaq pillugu isumaqatigiissummi erniartorneq aamma eqqartorparput nukittorsarnissaa. Siullermik 2024-imi katillugit 17,7 millioninik aningaasaliinikuuvugut,  erniartortarnermut tunngasut immikkut iliuuseqarfigalugit. Taavalu tassani soorlu sinerissami juumuut saniatigut pingasunik amerlillugit pingasunik, taamatullu aamma meeqqerisut aamma pingasunik ilallugit.

Illoqarfigisaminni ernerusuttut

Peqqinnissamut Naalakkersuisoq, Agathe Fontain nalunaarusiamut siornarnisamut innersuussivoq, tassani ernisut sumiiffigisaminni ernerusuttarnerannut tunngatillugu. Nalunaarusiami allassimavoq naartusut sumiiffigisaminni ernerusuttartut.

-  Soorunami kialuunniit ernisussap illoqarfigisamini erninissani kissaatiginerpaasarpaa, tamanna tupinnanngilaq, aamma taamaatsikkusunnaraluaqaaq. Kisianni pissutsit taamaatsillugit ajornarpoq.

Pisoq qaqutigoortoq

Agathe Fontainip naggataatigut oqaatigaa nunatsinni arnat erninermut atatsillugu toqusarnerat qaqutigoortuusoq.

-  Ukiorpassuit tamanna nalaassimanngilarput, aliatsannaqaaq nalaallugit.