Naalakkersuisoqatigiit siammasissut nutaat saqqummiunneqarput

Demokraatit, Inuit Ataqatigiit, Siumut aamma Atassut. Partiit taakku naalakkersuisooqataalerput.

Ilisaritsitsineq uani malinnaavigiuk:

Nalunaaqutaq aqqanermut saqqummiussineq suli aallartinngitsoq Katuap inersuaaraani inuppassuaqarpoq, ilaatigut tusagassiortorpassuit atortorissaaruterpassuallit najuullutik.

Nunatta Katersugaasiviani pisortaq Daniel Thorleifsen aqutsisuuvoq ilisaritsisinermilu ingerlatsisuulluni. Ilisarititsineq erinarsoqatigiit Nunarput Utoqqarsuanngoravit atorlugu aallarnerpaat.

Partiit siuttui sassarmata Jens-Frederik Nielsen ima oqarpoq:

- Ulloq manna qilanaarisimavarput - ulloq inuiaqatigiinnut kalaallinut pingaaruteqarluinnartoq - inuiaqatigiinnut kalaallinut ataatsimoornissaq pingaaruteqarluinnarpoq, innuttaasullu 75 procentii naalakkersuisoqatigiit uku aqqutigalugit ataatsimoortinneqarput, Jens-Frederik Nielsen oqarpoq, nangillunilu:

- Isumaqatigiinngissutit akerleriissutillu qimallugit inuiaqatigiinni ataasiussuseqarnissarput pingaaruteqarluinnarpoq, piffissamimi uani suleqatigiinneq suli nukittunerusoq avatitsinnut pilersittariaqarparput.

Partiit naalakkersuisoqatigiinnissamik isumaqatigiissuteqarnerminni kikkut tamarmik inuiaqatigiit ineriartornerannut katataasoqarani peqataanissaat qulakkeerniarsimagaat Jens-Frederik Nielsen nangilluni oqarpoq:

- Inuussutissarsiornerup ineriartortinnissaa ilinniartitaanerullu annertuumik iliuuseqarluta, Jens-Frederik Nielsen oqarpoq, nangillunilu:

- Inuit tamaavitta nunatsinni inussiarnersuusariaqarpugut, avammullu aamma inussiarnersumik kiinnersinnaasuusariaqarpugut.

Múte oqaaseqarpoq

Tamatuma kingorna Naalakkersuisut siulittaasorisimasaat Múte B. Egede (IA) oqaaseqarpoq. Aamma nunanit allanit tatineqarnermut tunngatillugu ataatsimoornissaq eqqartorpaa:

- Inuiaat amerlasoorsuunngikkaluarlutik ataatsimoornermikkut nunat pissaanilissuugaluarpataluunniit tatisiniarnerannut akiuunnissaminnut toqqammavissaat takutinneqartariaqarpoq. Anguniakkavut kisitta qitiutinnagit kigulissavut aamma eqqarsaatigisariaqarpavut – nuna mikigaluarluta ataatsimoorluta inissisimaffipput nukittorsarsinnaavarput, aamma nukittuunit tatineqaraluarluta, Múte B. Egede oqarpoq.

Nukiit ataatsimoortinnissaat pingaaruteqartoq Siumup siulittaasunngorlaava Vivian Motzfeldt aamma oqarpoq:

- Inuiaat kissaataat tusaallugit. Kalaallit innuttaasuisa katersuunnissaat, siumut isigisinnaaneq, qanga pisut eqqarsaatigiunnaarlugit pisariaqartinneqarnera tusaaniarsimavarput.

- Nukitta, kinaassutsitta kulturittalu ataatsimoortinnissaat pingaaruteqarpoq, oqarpoq.

Jeremiassen: Akerleriissutit illikartinneqartariaqarput

Pissutsit maanna atuuttut eqqarsaatigalugit akerleriissut illikartinneqartariaqartut Atassutip siulittaasua Aqqalu C. Jeremiassen oqarpoq.

- Partiit annerpaaniit minnernut ataatsimoortoqarnerani akisussaassuseqarnermut takutipparput.

- Akerleriissutinik aaqqiinissaq pisariaqarluinnarpoq, ullumikkullu nunatta illersorneqarnissaa ajugaavoq – tamannalu pisussaaffiuvoq, taamaattumik Atassummiit nuannaarutigeqaarput naalakkersuisoqatigiinnut siammasissunut ilaagatta, partiip siulittaasua oqarpoq.

Isumaqatigiissut atsiorneqarpoq.

Naalakkersuisut ima isikkoqalerput

Naalakkersuisunngortut ukuupput:

Naalakkersuisut siulittaasuat: Jens-Frederik Nielsen (D)

Aningaasaqarnermut akileraartarnermullu Naalakkersuisoq: Múte B. Egede (IA)

Nunanut allanut ilisimatusarnermullu Naalakkersuisoq: Vivian Motzfeldt (S)

Ilinniartitaanermut, kultureqarnermut, timersornermut ilageeqarnermullu Naalakkersuisoq: Nivi Olsen (D)

Inuussutissarsiornermut, aatsitassanut, nukissiuutinut, inatsisit atuutsinneqarnerannut naligiissitaanermullu Naalakkersuisoq: Naaja H Nathanielsen (IA)

Peqqissutsimut Inuit innarluutillillu pillugit Naalakkersuisoq: Anna Wangenheim (D)

Meeqqanut, inuusuttunut ilaqutariinnullu Naalakkersuisoq: Maasi Pedersen (IA)

Aalisarnermut, Piniarnermut, Nunalerinermut imminullu pilersornermut avatangiisinullu Naalakkersuisoq: Peter Borg

Isumaginninnermut, suliffeqarnermut nunamullu namminermut Naalakkersuisoq.: Bentiaraq Ottosen (A)

Ineqarnermut, attaveqaasersuutinut isorliunerusunullu Naalakkersuisoq: Aqqaluaq B. Egede (IA)

Naalakkersuisut ilisaritinneqareermata Juaaka ilanilu aliikkusersuillutik erinarsuut nuannarineqarluartoq “Inuiaat kalaaliusugut” atorpaat.

Tusagassiortunik katersortitsisoqassanngilaq, tassa tusagassiortut ilisarititsinermi apeqquteqarsinnaanngillat. Ilisaritsitsereernerulli kingorna partiit siuttuisa apersornissaat Sermitsiap sulissutigaa.

Jens-Frederik Nielsen Inatsisartunut marsip aqqarngani qinersinermi ajugaarujussuarpoq, tassa Demokraatit qinersinermi kingullermiit pingasoriaataat sinnerlugit amerlanernik qinerneqarlutik. Taamaalillunilu sapaatit akunnerini kingullerni isumaqatigiinniarnerni siuttuulluni.

Naleraq isumaqatiginninniarnernut peqataajunnaartoq ataasinngormat nalunaarutigineqarpoq. Naleqqap siulittaasua Pele Broberg naapertorlugu namminiilivinnissaq pillugu apeqqut pissutaalluni isumaqatiginninniarnernit anisinneqarput.

Partiilli sinneri isumaqatigiissinnaasimapput. Maannalu naalakkersuisooqatigiilerlutik, taamaalillutik Inatsisartuni ilaasortanit 31-usuni 23-nit tunuliaqutaqalerlutik.

Isumaqatiginninniarnerit nalaanni Amerikamiut aallartitaasa tikeraarnissartik nalunaarutigaat. Tamannalu aalassassutaangaatsiarpoq, tassami præsident Donald Trumpip Kalaallit Nunaannik aqutsiniarneranut alloriarnertut isigineqarmat.

Naalakkersuisunut siulittaasuusimasup Múte B. Egedep nutaanik naalakkersuisoqatigiinnik pilersitsisoqassasoq kaammattuutigaa, taamaalilluni Kalaallit Nunaat aalajangiisinnaasunik naalakkersuisoqalersinnaaqqullugu.