Naalakkersuisut imigassaq pillugu politikkissamut innersuussutit saqqummiuppaat
Imigassamut politikkissamut suliaqarnermi innersuussutit 18-it Naalakkersuisut ullumi sisamanngornermi saqqummiuppaat. Innersuussutit qulakkiissavaat meeqqat toqqissisimasumik perornissaat, pinerlunnerit ikilinissaat imminullu toquttarnerup pinaveersaartinnissaa.
Assi: Jensine Berthelsen
OBS: Allaaserisaq nutarterneqarpoq nal. 16.30 peqqissutsimut naalakkersuisoqarfimmit saaffiginnittoqareernerata kingorna.
Imigassat akii qaffasinnerusut, imigassarsisinnaasut ukioqqortunerulertinneqarneri imigassallu niuertarfinni pisiarineqarnissaannut piffissaliussat sukanganerusut. Naalakkersuisut imigassaq pillugu politikkissamik suliaqarnerannut innersuussutit ilaat taama nipeqartut Naalakkersuisunit saqqummiunneqarput.
Peqqissutsimut Naalakkersuisoq, Anna Wangenheim (D) aamma Meeqqanut, Inuusuttunut Ilaqutariinnullu Naalakkersuisoq, Mads Pedersen (IA) imigassaq pillugu politikkimik suliaqarnermut atatillugu ilisimasat tunngavigalugit innersuussutinik 18-inik ullumi sisamanngornermi saqqummiussaqarput.
- Ullumi Naalakkersuisut tamattaalluta saqqummiisinnaagaluarpagut, imigassarmi inuiaqatigiinnut tamanut eqquinerluttarpoq. Naalakkersuisut tamarmiusut innersuussutit siunertaat taperserpaat, Anna Wangenheim oqarpoq.
Misissuinerit maanna inassuteqaatinik kinguneqartut qulakkeerniassavaat imigassaq pillugu oqallittoqartillugu isumaliutinik pigiliutiinnakkanik tunngaveqartumik oqallinnerup killilersimaarnissaa.
- Meeqqat imigassaq eqqornerlunneqarnissaat pinngitsoortinniartariaqarparput. Imigassaq pissutaalluni nakuusernerit imminullu toqunniarnerit aamma pisartut, pinngitsoortinniartariaqarpagut, Anna Wangenheim oqarpoq.
Pissutsit maannakkutut ittut ingerlatiinnarneqassanngillat
Saqqummiussinermi ilaatigut oqaatigineqarpoq pissutsit maanna atuuttut ingerlatiinnarneqarsinnaanngitsut. Tamanna meeqqanut, inuusuttunut ilaqutariinnullu naalakkersuisumit ilalerneqarpoq:
- Imigassamut politikkerput ullumikkutut isikkoqartillugu uku suliniutit
iluatsinnavianngillat, Mads Pedersen oqarpoq.
- Assersuutissaqarpunga. Takusarpakka inersimasut meeqqaminnik arsaagaasimasut, tarnimikkulluunniit ajornartorsiuteqartut imigassamik atuinerup kinguneranik, oqarpoq.
Oqallinneq aallartittussanngorpoq
Innersuussutit ilagaat imigassamik pisinissamut atuinissamullu malittarisassat sukannernerusut. 21-leereersimasut imigassamik pisisinnaalernissaat ilaatigut aamma innersuussutigineqarpoq.
Naalakkersuisut erseqqissaatigaat, politikkimik nutaamik suli aalajangiisoqanngitsoq, kisianni Naalakkersuisut innersuussutit siunertaat taperseraat.
- Maanna politikkikkut oqallinneq isumaqatiginninniarnerillu aallartissinnaalerput. Isumaqatiginninniarneq Inatsisartut iluani pisussaavoq siunissami qaninnermi, aamma ukiakkut ataatsimiinnerup ingerlanerani. Ilisimasat tunngavigalugit innersuussutit isumaqatiginninniarnermi tunngaviussapput, aamma imigassaq pillugu politikkimik nutaamik suliaqarnermi innersuussutit sorliit ilaatinneqassanersut oqallisigineqassapput, peqqissutsimut naalakkersuisoq oqarpoq.
- Inatsisartut qaagiinnarlugit iliortoqarnavianngilaq. Inatsisartut peqatigalugit politikkimik nutaamik isumaqatigiinniarnissaq pingaaruteqarpoq, taamaalilluta ilaqutariit, inuusuttut meeqqallu pitsaanerpaamik inissisimanissaat qulakkeerneqaqqullugu, Mads Pedersen oqarpoq.
Anna Wangenheimip erseqqissarpaa alloriarneq angisooq tiguneqassasoq, ukiumi tullermi - taamatullu qinigaaffiup matuma naatinnagu - imigassamut tunngatillugu politikkimik nutaamik isumaqatigiittoqassappat. Ukioq manna naatinnagu anguniarneqarpoq imigassaq pillugu politikkimik nutaamik suliaqarnerup aallartinnissaanik isumaqatigiittoqarnissaq.
