Naalakkersuisut inupiluit pinerlunniartarneri ilungersunartutut isigaat
Inupiluit nunanit allaneersut ukkataraavut, Kalaallit Nunaanni ikiaroornartulerineq allaaserineqareersorlu inatsisit atuutsinneqarnerannut naalakkersuisoq neriorsuivoq.
Foto: Oscar Scott Carl
Inatsisit atuutsinneqarnerannut naalakkersuisoq Naaja H. Nathanielsen (IA) danskit inupiluit pillugit pisortatigoortumik nalunaaruteqarpoq.
Kalaallit Nunaanni ikiaroornartut akisunerujussuusarnerat qallunaanut pinerlunnianut soqutiginnilersitsisartoq DR-imit allaaserinnittoqareersorlu taama pisoqarpoq.
- Naalakkersuisut ilungersunartutut isumakulunnartutullu isigaat. Taannarpiaq qaammatit kingulliit ukkataraarput, tassanilu Kalaallit Nunaanni politiit oqartussaasullu attuumassuteqartut ataatsimeeqatigineqartarsimapput. Qallunaat inatsiseqarnermut ministeriat Nuummut 2025-imi aggustimi tikeraarmat sammisaq aamma ullormut oqaluuserisassaniissimavoq, oqarpoq.
Naalakkersuisut borgmesterillu pinerlunnianik akiuiniarnermi ataqatigiissaarisussanik ilisimasanillu avitseqatigiinnissamik suliaqartussanik suleqatigiissitaliornissaq pillugu oqaloqatigiissutigaat.
- Kinaluunniit inatsisitsinnut pinerluttuliorluni iliuuseqartoq aamma inunnut ataqatigiinnermullu aserortereqataasut akiorneqassapput. Avataaniit pinerluttunik taakkulu nunami maani suleqataannut atuuppoq, Naaja H. Nathanielsen naqissusiivoq.
- Ikiaroornartut akii qaffasinnerugaluarput, kisianni anngiortumik eqqussinernut pillaatissiinerit taamatuttaaq Danmarkimut naleqqiullugit Kalaallit Nunaanni qaffasinnerupput, ilanngullugu oqaatigaa..
Pinerluttulerinermut inatsit aamma allanngortinneqartussaavoq, tassa ukiuni 16-ini pineqaatissinneqarsimasunut inissiisarfimmiittussanngortitsisoqarsinnaassalluni. Maanna annerpaamik ukiuni qulini pineqaatissiisoqarsinnaavoq.
