Naalakkersuisut: Savimminilerinermik Ilinniarfik nutaaq Sisimiuni sananeqassaaq
Sisimiuni nutaamik Saviminilerinermik ilinniarfiliornissaq Naalakkersuisut tunngaviusumik aalajangerpaat. Ilinniarfik nutaaq 2030-mi naammassineqartussatut naatsorsuutigineqarpoq.
Saviminilerinermik ilinniarfik nutaaq Sisimiuni sananeqassaaq. Naalakkersuisut Sisimiuni ilinniarfimmik nutaamik sanaartortoqassasoq tunngaviusumik aalajangerpaat, ilinniarfillu 2030-mi naammassinissaa siunniunneqarpoq.
Leiff Josefsen
Sisimiuni innuttaasut naatsorsuutigisinnaavaat Saviminilerinermik Ilinniarfik nutaaq 2030-mi atulersinnaasoq. Naalakkersuisut nalunaarutigaat illoqarfimmi nutaamik saviminilerinermik ilinniarfimmik sanaartornissaq tunngaviusumik aalajangerneqarsimasoq:
- Sanaartugassaq nutaaq taanna Sisimiuni KTI-p ilaatut inissinneqassaaq, taamaaliornermi ilinniartitaanermi sullissivittut annertunerusumik qaffassarneqassalluni, ilinniartitaanermut naalakkersuisoqarfik Naalakkersuisut nittartagaanni allappoq.
Nuummi Saviminilerinermik Ilinniarfik maanna atuuttoq politikerinit ilinniarfiullu iluani suliaqartunit sivisuumik oqallisigineqarpoq.
- Ilinniarfissap Sisimiuni, inuussutissarsiutinut ilinniartitaanernik ingerlatsivioreersumi, inissinneqarnerani, ilinniartunut, atuartitsisussanut inuiaqatigiinnullu eqqaaniittunut iluanaarutissat arlallit annertuut pissarsiarineqarsinnaassapput, Aqqaluaq B. Egede (IA) oqarpoq.
Pilersaarut sivisuumik suliarineqartoq
Saviminilerinermik Ilinniarfiup Sisimiunut nuunneqarnissaa siullermeerluni eqqartorneqanngilaq. Qinersineq kingulleq sioqqullugu pilersaarutit unitsinneqartut maanna aallartinneqaqqilerput. Qeqqata Kommuniata ilinniarfimmut pilersaarutit pillugit nalunaaruteqartoqannginnera ukiuni kingullerni ukkataraa.
Nuummi ilinniarfimmi sulisut atuarfiup siunissaa pillugu nalornissuteqarneq toqqissisimajunnaartitsisoq 2022-mi oqariartuutigaat. Sulisummi nuunnissaminnik kissaateqannginnamik.
Ilinniarfiit KTI aamma DTU, tamarmik Sisimiuni qitiusumik ingerlatsivillit, Saviminilerinermik Ilinniarfik pillugu pilersaarutit qanittukkut ujartorpaat, tassanilu Saviminilerinermik Ilinniarfiup KTI-milu ilinniarfiit kattunneqarnerata iluaqutissartai arlallit taakkartorlugit.
Aqqaluaq B. Egedep aamma tamanna nalunaaruteqarnermini eqqaavaa:
- Sisimiut ingerlalluareersunik avatangiisilinnik ilinniarfeqareerpoq. Tamanna Saviminilerinermut Ilinniarfiup nutaap pilersinneqarnerani nukittorsarneqaqqittussaavoq. Ilinniartitaanerni suliassaqarfiit akimorlugit suleqatigiinneq siuarsarneqassaaq. Ilinniartut ilinniagaqarfiit akimorlugit ilisimasaminnik misilittakkaminnillu avitseqatigiissinnaapput, aammalu atuartitsisut atuartitsinermi periaatsinik atortussanillu ineriartortitsineq suleqatigiissutigisinnaavaat Aqqaluaq B. Egede oqarpoq.
Tullinnguuttussaq suliniutip ingerlanerani neqerooruteqarnissaq pilersaarusiornerluussaaq. Naalakkersuisut naatsorsuutigaat Sisimiuni ilinniarfik nutaaq 2030-mi piareersimassasoq.
