Naalakkersuisut siulittaasuat tusagassiortunik aggersaasoq
Tusagassiortunik katersuutsitsineq ataasinngornermi ualikkut pissaaq.
Múte B. Egedep Mette Frederiksen peqatigalugu Københavnimi ataatsimeereernerup kingorna tallimanngornermi tusagassiortunik katersortitsivoq.
Assi: Tom Little/Reuters/Ritzau Scanpix
Naalakkersuisut siulittaasuat Múte B. Egede (IA) ataasinngornermi nalunaaqutaq 14.00 tusagassiortunik katersortitsiniartoq Naalakkersuisut tusagassiuutinut nalunaarummi naatsumi ilisimatitsipput.
Tusagassiortunik katersortitsinermi suna sammineqassanersoq oqaatigineqanngilaq "ulluni makkunani pisut aallaavigalugit" katersortitsisoqarumaartoq allassimavoq.
Naalakkersuisut siulittaasuat Donald Trump Jr.-ip Nuummut tikeraarneranut atatillugu apeqqutit aamma USA-mi præsidentinngortussap Donald Trump seniorip oqariartuutai pillugit oqaaseqartarnerminik sapaatip-akunnerani kingullermi ulapputeqarpoq.
Aammattaaq Inatsisartunut qinersinissaq qalliartorpoq. Kommuninut qinersineq apriilip aallaqqaataani pissasoq tallimanngormat nalunaarutigineqarpoq. Inatsisartunut qinersineq kingusinnerpaamik apriilip arfernani pisussaavoq.
2021-mi kommunimut Inatsisartunullu qinersinerit ataatsikkut ingerlanneqarput.
Sermitsiaq tusagassiortunik katersortitsinermi malinnaassaaq.
