Naalakkersuisut timmisartortartup ajunaartup ilaqutaanut misiginneqataapput
Nuup eqqaani timmisartup nakkarnera tamatsinnut attuivoq, naalakkersuisoq Bentiaraq Ottosen oqarpoq, oqartussallu allallu iliuuseqarnerannut qujalluni.
Timmisartup ataasinngornermi ullaakkut nassaarineqarnerani isikkivik.
Assi: Morten Okkels
Naalakkersuisut Nuup eqqaani timmisartuaqqap arfininngormat ualikkut nakkarnera pillugu pisortatigoortumik nalunaaruteqarput. Timmisartuaraq qaqqamut Sermitsiamut nakkarmat timmisartortartoq ajunaarpoq.
- Naalakkersuisut sinnerlugit timmisartup aquttuata ajunaartup qanigisai misiginneqatigingaarpakka. Pisoq tamatsinnut itisuumik attuisoq alianarpoq artornarlunilu, isumaginninnermut, suliffeqarnermut, nunamut namminermut avatangiisinullu naalakkersuisoq Bentiaraq Ottosen oqarpoq.
Ujaasineq Naviairimit aqunneqartoq Air Greenlandimit, Kalaallit Nunaanni Politiinit, Issittumi Sakkutooqarfimmit kiisalu najukkami upalungaarsimasunit arfininngornermi ualikkut pivoq. Sermitsiap eqqaani imaatigut silaannakkullu ujaasisoqarpoq.
- Naalakkersuisut sinnerlugit suliamut tunngatillugu ujaaseqataasut suliaqartullu tamassi – Naviair, Air Greenland, Kalaallit Nunaanni Politiit, Issittumi Sakkutooqarfik najukkamilu upalungaarsimasut – pissutsit ajornakusoortorujussuit atorlugit annertuunik suliniuteqarnersi pillugu qutsavigerusuppassi. Taamatuttaaq Kalaallit Nunaanni Rigsombudi ujaasinermi nunagisaasunut paasissutissiisarluni suliniuteqarsimaneranut qutsavigerusuppara.
- Pisup ingerlanera tamakkerlugu Naalakkersuisut aamma Kalaallit Nunaanni Upalungaarsimanermut Ataatsimiititaliarsuup paasissutissat iluarisimaarnartorujussuarmik ingerlanerat oqartussaasullu, pisumi piginnaaneqarluarlutik suliassanik isumaginnittuusimasut akunnerminni suleqatigiilluarnerat misigaat, Bentiaraq Ottosen oqarpoq.
