Siumup siulittaasua AG-mit sianerfigineqarami naak oqaloqatigiissutigisinnaasarput quianarpallaanngikkaluartoq isumalluarpoq: Siumup aningaasaqarnera. Naatsorsuutit amigartoorfiupput. Tamanna partiip nuna tamakkerlugu immikkoortortaqarfiata ukiumoortumik nalunaarusiaani, kingusinaarluni Inatsisartut nittartagaannut ilanngunneqartumi, takuneqarsinnaavoq.
Naatsorsuutini 2023-moortuni 231.000 amigartoorutigineqarput.
Siumup siulittaasua AG-mit sianerfigineqarami naak oqaloqatigiissutigisinnaasarput quianarpallaanngikkaluartoq isumalluarpoq: Siumup aningaasaqarnera. Naatsorsuutit amigartoorfiupput. Tamanna partiip nuna tamakkerlugu immikkoortortaqarfiata ukiumoortumik nalunaarusiaani, kingusinaarluni Inatsisartut nittartagaannut ilanngunneqartumi, takuneqarsinnaavoq.
Naatsorsuutini 2023-moortuni 231.000 amigartoorutigineqarput.
AG-p partiit allat naatsorsuutaat, ingammik IA-p 1,2 millionit koruunit missaannik sinneqartoornera, siusinnerusukkut allaaserinikuuaa.
Partiip siulittaasua Erik Jensen naapertorlugu naatsorsuutit amigaartooruteqarfiusut nassuiaatissaqarput:
- Partiitsinni ataatsimeersuarneq aningaasarpassuarnik akeqartarpoq. Parteerujussuuvugut najukkani immikkoortorpassuallit.
- Qineqqusaarnissassinnut nukissaatikinneruisi?
- Naamik, pilersaaruterput malipparput, periusissiorluta ataatsimiinnikuullutalu piareersaleruttorpugut.
Qinersisartut kikkut Inatsisartuni issiavinnut 31-iusunut ingissanersut aalajangerniarlugit kingusinnerpaamik sapaatit akunneri qulit qaangiuppata qinersissapput.
- Kalaallit Nunaata nunanit tamalaanit soqutigineqarnerujussua isigissagaanni Siumut IA-lu suleqatigiiginnarsinnaassappat?
- Tamanna oqaatigissallugu siusippallaarpoq. Qinersisartut eqqartueqqaassapput. Qanorluunniilli eqqissiviittoqartigigaluarpat partiitut misilittagaqarluta akisussaaffimmillu qimarratiginninneq ajorluta qinigaaffimmi kingullermi takutipparput. Toqqissisimanermik pilersitserusuppugut. Tamanna massakkut pingaaruteqarluinnarpoq.
Erik Jensenip USA-mut tunngatillugu pisut pillugit oqaaseqaqqinnginnermini tunuliaqutani oqaloqatigeqqaarniarpaa.
Akiitsut annikinnerusut
Ukiumut nalunaarusiaq 2023-moortoq misissoraanni nammineq aningaasaatit millionit affaasa missaannik amigartooruteqarfiusut allaqqavoq. Siumut 2023-mi katillugit 4,4 millionit koruuninik partiinut tapiissutisivoq.
3,9 millionit koruunit Namminersorlutik Oqartussaniit 265.000 koruunillu nunamut namminermut ministeriaqarfimmiit. Qasigiannguani nuna tamakkerlugu ataatsimeersuarniinnaq 1.223.131 koruuninik akeqarpoq.
Siumup akiitsuni ukiuni kingullerni annikillisissimagai aqutsisut nalunaarutaanni allassimavoq, taamaalillutik akiitsut 2022-mi 714.000 koruuniusimasut maanna 547.000 koruuniupput.
- Aqutsisoqatigiit aningaasartuutinik aningaasanillu tigoriaannarnik sukannersumik aqutsilerput, 2024-mullu missingersuutit sinneqartoorfiussangatinneqarput. Partii ingerlaannarsinnaasoq aqutsisoqatigiit taamaalillutik nalileraat ukiumoortumik nalunaarusiami aqutsisut nalunaarutaanni allassimavoq.
- Isumalluarpugut. Aningaasaqarnerput siuariartorpoq, Erik Jensen pisoq pillugu oqarpoq.
