Naggammik qaniuineq
Tusagassiortoq imaannaanngitsoq Elna Egede arfininngormat ualikkut ilisaavoq.
Aalborgimi kalaallit erinarsoqatigiit marluk Ikinngutigiit aamma Ullorissat Elna Egedep ilisaanerani tussiutinik sisamanik atuipput.
Jesper Hansen
Arfininngormat ualikkut Aalborgimi Vejgaard Kirkemi Elna Egede ilisaavoq. Aalborgimi karnevalernerup nalaani seqinnarissumi ilisaavoq.
Elna Egedep qaniginerpaasaanit illerfik anninneqarpoq. Saarlermi Elna Egedep uia Søren Wettergren Olsen.
Foto: Jesper Hansen
Ilisinermut inuit 100-t missaat najuupput, tamannalu Elna Egedep tusagassiortutut inuttullu qanoq sunniuteqartigisarneranut uppernarsaataavoq.
Ilisineq Vejgaardimi palasimit Sine Kielstrupimit ingerlanneqarpoq, taassumalu Testamentitoqqamit Davip Tussiaataata allagaaniittut issuarpai. Elna Egedep sanngiitsut tapersersortuaannarai – pissaaneqartullu akerlilersornissaat tunuarsimaarfinngisaannarsimagaa, palasip erseqqissarpaa.
Kalaallisut tussiutit
Elna Egedep ilisaanerani kalaallisut tussiutit sisamat: Illu Qaarsumi Sanaasoq, Guutiga Illimmi, Guuterput aamma Angerlarfissaqarpoq tussiarneqarput. Erinarsoqatigiinnit Aalborgimiittunit marlunnit, Ikinngutigiinnit aamma Ullorissanit, tussiarneqarput.
Angalaneq kingulleq: Biilit Vejgaardip oqaluffianit aallartut.
Foto: Jesper Hansen
Ilisinerup kingorna Aalborgimi Kalaallit Illuutaanni kaffillertoqarpoq, ilaatigut kalaallit kaageqarluni qullugaqarlunilu.
- Amerlanerusunik peqataasoqarsinnaagaluarpoq, ajoraluartumilli Fredericiami Inuit peqatigiiffiata ilaqutariinnik ataatsimoortitsinerata nalaani ilisineq pivoq – minnerpaamillu kalaallit Aalborgip eqqaaneersut 100-t peqataapput, Kalaallit Illuutaanni pisortaq Anna Lynge oqarpoq.
Ilisinerup kingorna Aalborgimi Kalaallit Illuutaanni kaffillertoqarpoq.
Foto: Jesper Hansen