Ministeriunerup killitsisimaqisup arnat eqqugaasut assammillugillu pakkutaarai

Katuami Nuummiittumi spiralilersuisimanermut atatillugu pingasunngornermi ualikkut utoqqatsertoqassaaq. Utoqqatsernermut atatillugu allaaserisaq una ingerlaavartumik nutarterneqartassaaq.

15.45 Nutartigaq: Eqqugaasut maanna assamminneqarput

Aaqqissuussineq maanna naammassingajalerpoq, tamatumunngalu atatillugu ministeriunerup Naalakkersuisullu siulittaasuata arnat spiralilersuisimanermut tunngatillugu eqqugaasut najuuttut assammippaat.

Arnat nerrivinni saarlerni tunorlernilu issiasut takisuunngorlutik tulleriiaapput.

Jens-Frederik Nielsenip Mette Frederiksenillu arnat tulleriiaarlugit assammittarpaat.

Mette Frederiksenip isini allartertarlugit arnat arlallit pakkuppai. Ersarissumik killitsisimavoq, arnallu tulleriiaattut arlallit aamma killitsisimapput.

15.20 nutartigaq: Minutsi nipaallisimasut

Emma Kuko oqalugiareermat nikuilluni aamma ersaattaanneqarpoq, tamatumalu kingorna arnat akuersissuteqaratik spiralilerneqarsimasut pillugit minutsimi ataatsimik nipaallisimasoqarpoq.

Ini nipaqanngilaq najuuttullu tamarmik nikorfallutik.

Inuppassuit sequnngerlutik sikingapput.

15.10 nutartigaq: Ukiuni qulingiluani ilisimanagu spiraleqartoq

Emma Kuko 1992-ip kingorna spiralertinneqarsimasut sinnerlugit oqalugiarpoq:

- Misigisat amiilaarnartut kiisami oqaasinngorsinnaanngorpagut. Uummatikkut anniaatikka oqilissasoralugit aqqusaarsimasakka oqaluttuariniarlugit aalajangerpunga, oqarpoq.

16-inik ukioqarluni sinitsitaalluni naartuersissimalluni oqaluttuarpoq. Ilisimatinneqaranilu spiralilerneqarsimavoq.

- Spiralilerneqarsimanera pillugu journaliini allassimasoqanngilaq, oqarpoq.

Emma Kuko ukiuni qulingiluani ilisimanagu kissaatiginngisaminillu spiraleqarpoq. Meerartaarusussimagaluarpoq illiaminili imertaqarnerarnikuungami naartulersinnaassanerluni nalusimallugu.

15.10 Nutartigaq: Erla Wintherip misigisani oqaluttuarai

Naja Lyberthip oqalugiareernerata kingorna Erla Winther oqaluttarfimmut qaqilluni 13-inik ukioqarluni spiralilerneqarsimanini oqaluttuaraa:

- Ukiut timima ilisarisimalerniarneranut atortakkakka spiralilersinneq pissutigalugu anniarnernik pilatsinnernillu sunnerneqarput.

- Tamanna akuliunnerullunilu innarliineruvoq. Aaqqissuussinerup ilisimasaqarnerusussaagaluartup kisitsisit aalajangiinerillu tunuliaqutaani inoqartoq puigorsimavaa, meeqqat uattut ittut, Erla Winther oqarpoq.

Naja Lyberth qutsavigaa:

- Asasara Naja, nukittunerit allanngujaappoq. Iliuuserisimasat spiralilersuisimaneq pillugu saqqummiinerinnaanngilaq, saperunnaarsitsivoq. Arnarpassuit inuunerat allanngueqataaffigaat, oqarpoq.

14.55 nutartigaq: Amerlasuut timikkut innarlerneqarsimapput

Naja Lyberthip oqalugiarnermini arnat 143-t spiralilerneqarnikuunerminnik timikkut innarlerneqarnikuunerminnik naalagaaffimmiit taarsiivigeqqullutik eqqartuussivimmut suliassanngortitsisut eqqartorpai.

- Arnani 143-suni qassit timikkut innarlerneqarsimanerat eqqarsalersitsivoq.

- Ingammik spiralilerneqarnikuunerminnik pissuteqarunarlutik meerartaarsinnaajunnaarsimasut. Spirali arnanut ernisimasunut atorneqartartoq niviarsiaqqanut aqqaneq-marluk tikillugit ukiulinnut ikkunneqarsimasut.

- Arnat pingajorarterutaat meerartaarsinnaajunnaarsimapput, sisamararterutaallu illiaarsissimallutik, Naja Lyberth oqarpoq.

Naalagaaffiup utoqqatsernera nunanut allanut, soorlu arnat nunap inoqqaavi ukiut ingerlaneranni assingusumik pineqartarsimasunut, maligassiuilluassasoq, Naja Lyberthip neriuutigalugu aamma oqarpoq.

- Nunarsuarmi arnat qatanngutivut assingusunik misigisaqarsimasut uagutsitut utoqqatserfigineqarumaartut neriuutigaara, Naja Lyberthip suliami siuttoqatini peqatigalugit oqaluttarfimmiit aqqarmata nikuilluni ersaattaanneqartoq, oqarpoq.

14.45 nutartigaq: Naja Lyberth oqalugiarpoq

Ministeriuneq aqqarmat Naja Lyberth ersaattaanneqarluni oqalugiartarfimmut qaqivoq, inuppassuillu nikuillutik taanna siulersuisuilu tapersersorniarlugit ersaattaappaat.

- Ministeriuneq qujanaq utoqqatsernerninnut, uagutsinnut arnanut kalaallinut akuersitinneqarnata naartunaveersaatilerneqarsimasunut utoqqatseravit, Naja Lyberth oqarpoq.

Naja Lyberthip arnaqatini qutsavigigalugillu utoqqatserneq pillugu ima oqarpoq:

Tuigut nakkartissinnaanngorpagut. Taava taarsiiffigineqarnissatta qulakkeernissaa tullinnguuppoq, oqarpoq DR-imilu tusagassiortunut podcastimik „Spiralkampagnen“-imik suliaqartunut qujalluni.

- Utoqqatsertoqarnera ingerlariaqqinnissatsinnut pingaaruteqarpoq. Naalagaaffeqatigiinnermi naligiittugut Naalagaaffiup maanna naqissuserpaa, taanna oqarpoq.

14.30 nutartigaq: Mette Frederiksen Naja Lyberthip misigisaanik innersuussilluni oqalugiarpoq

Mette Frederiksen maanna oqaluttarfimmiippoq, aamma taassuma pisoq killitsissutigingaarpaa.

Ministeriunerup arnat misigisimasaat tusaatissatut tiguai, ilaatigut Naja Lyberth eqqaavaa, taanna oqaluttuarpoq spiralilerneqarnermini ilumini savimmik kapineqartutut misigalunilu naalliutsinneqartutut misigisimavoq.

Ministeriunerup oqaluttuartut tamaasa qutsavigai:

- Peqqinnissaqarfimmi oqartussaasut, naalagaaffik ilissinnut isumassuisussat naak? Ilissinnut paarsisussat naalliutsippaasi, taanna oqarpoq.

Mette Frederiksenip spiralilersuisimanermik suliaq oqaluttuarisaanitsinni immikkoortutut allanneqarsimasussaanngitsutut taavaa:

- Asasakka arnat, ilaqutaasut kalaallillu. Ullumikkut eqqortoq ataasiinnaq oqaatigisinnaavara: Utoqqatserpunga. Danmark sinnerlugu utoqqatserpunga, Mette Frederiksen oqarpoq oqaluttarfimmiillu aqqarmat ersaattaattoqarpoq.

14.20 nutartigaq: Jens-Frederik Nielsen oqalugiarpoq

Utoqqatsernermi siullertut oqalugiartoq tassaavoq Naalakkersuisut siulittaasuat Jens-Frederik Nielsen (D), taannalu killitseqqaqaaq:

- Akuerineqarsinnaanngitsoq pissutigalugu ullumikkut maani katersuuppugut. Utoqqatserneq pisimasut akuerinerannik isumaqanngilaq. Maaniippugut pisimasut akuerisinnaannginnatsigit, Jens-Frederik Nielsen oqalugiarnermini aallartippoq nangillunilu:

- Arnat akornatsinniikkunnaarnikut eqqarsaatinniipput.

Jens-Frederik Nielsenip arnat toqqaannartumik oqaluuppai nassuerutigalugulu inuunerisa sinnerani sunniuteqartumik pisoqarsimasoq:

- Tuppallersarneqarsinnaanngitsutut misigineq, aliasunneq, iliuusissaarunneq, kamanneq, anniarneq, qularneq, ikiortissaarunneq, isumatsassimaneq, neriuutaarunneq, qianeq, paatsiveerunneq, nakkanganeq, siunertaqanngitsutut misigineq, aliasunneq, kanngusunneq, anniarneq. Eqqarsaatit nuanniitsut uteqqiasut, nikallunganeq, isumatsassimangaarneq, siunertaqanngitsuuneq. tamakku ilaatigut misigisimassagisi takorloorpara.

- Inuk nammineq timiminut aalajangiisinnaatitaavoq, taanna oqarpoq.

Spiralilersuisimanermik suliaq Kalaallit Nunaata oqaluttuarisaanerani taarnerpaat ilaattut oqaatigineqarsinnaasoq oqarpoq:

- Ullumi ataqqinnilluta utoqqatserniarluta maani katersuuppugut. Akuersinasi naartunaveersaaserneqarsimanersi oqaluttuarisaanermi immikkoortut taarnerpaat annernarnerpaallu ilagaat, oqarpoq, taavalu qamannga pisumik utoqqatserluni:

- Utoqqatserpunga. Utoqqatserneq oqaaseq naatsoq isumatooq, utoqqatserneq akuerisinnaagaanni. Peqqinnissaqarfiup aqunneqarnerata˙tiguneqarnerata kingorna arnat inuusuttut taama pineqarsimanerat pillugu Naalakkersuisut sinnerlugit utoqqatserpunga.

13.40 nutartigaq: Jens-Frederik aamma Mette F. apuuteqatigiipput

Kalaallit politikerii nuimasut arlallit nalunaaqutaq 13.30 missaani apuupput, ilaatigut Inatsisartut siulittaasuat Kim Kielsen (S), IA-p siulittaasua Múte B. Egede aamma naalakkersuisoq Mads Pedersen.

Tamarmik saarlerni issiapput. Mimi Karlsen tulliani issiavoq issiaviillu arlallit Inatsisartunut inniminnerneqarsimapput

Tamarmik saarlerni issiapput. Mimi Karlsen tulliani issiavoq issiaviillu arlallit Inatsisartunut inniminnerneqarsimapput

Naleqqameersoq Aki-Matilda Høegh-Dam Katuap silataani naasunik ilisivoq.

Ministeriuneq Mette Frederiksen aamma Naalakkersuisut siulittaasuat Jens Frederik Nielsen apuuteqatigiipput.

Marluullutik nerriviit sanioqqullugit ingerlaaramik tassani issiasut ilaat ilassiorpaat. Jens-Frederik Nielsenip arnaq assammillugulu sivisuumik oqaloqatigaa, Mette Frederiksenillu arnat arlallit saarlermi issiasut assammippai.

(Allaaserisaq assip ataani nageqqippoq)

Erinarsoqatigiit nal. 14 sioqqutitsiarlugu erinarsorlutik aallarniipput, erinarsornerinilu inimiittut ilaat qullilipput, arlallit killitsisimaqisut ersarippoq.

Taava Jens-Frederik Nielsenip allattaa Andreas Poulsen oqalugiarluni tikilluaqqusivoq, kingorna inuiattut erinarsuuterput ataatsimoorluni erinarsorneqarpoq.