Nakkutilliisoqarfik nutaamik siulittaasoqalertoq
Sólja í Ólavsstov Kommuninut Nakkutilliisoqarfimmi ukiuni qulini siulittaasooreerluni tunuarpoq. Taartissaa Nunatsinni Eqqartuussisuuneqarfimmit toqqarneqarpoq.
Nunatsinni Eqqartuussisuuneqarfik Nakkutilliisoqarfimmi siulittaasumik toqqaasarpoq, Naalakkersuisullu siunnersuisoqatigiinnut allattoqarfimmi pilersitsisarput.
Assi: Leiff Josefsen
Nakkutilliisoqarfimmi siulittaasoq Sólja í Ólavsstovu tunuarpoq. Taakku arlaannaannulluunniit atuumassuteqaratik kommuninik nakkutilliisuupput.
Naalakkersuisut tusagassiuutitigut nalunaarummi allapput.
Sólja í Ólavsstovup ukiut qulit sinnerlugit siulittaasuunermini suliassat ilungersunartut arlallit suliarisimavai, tusaamasaanerpaarlu tassaavoq Kommuneqarfik Sermersuumi ineqarneq pillugu suliaq, ukiut sisamat suliarineqareerluni aggustimi naammassineqartoq.
- Siulittaasutut tunuarnera uannut tussunngunarpoq. Kalaallit Nunaat inuuninni initoqaaq aamma uummatinni imartoqaaq – kisianni suna tamarmi naggatissaqarpoq, Sólja í Ólavsstovu tunuarnerminut atatillugu oqarpoq.
Sólja í Ólavsstovu inatsisilerituutut ilinniagaqartoq, siornatigullu Naalakkersuisuni pisortaasimasoq, Savalimmiuni Lagtingimi ombudsmandiusimasoq Savalimmiunilu ilinniartitsisut peqatigiiffianni inatsisilerinermut siunnersortiusimasoq, Naalakkersuisut ilisimatitsipput.
Siulittaasunngortup Nakkutilliisoqarfiup suliai isornartorsiorai
Morten Engberg Nunatsinni Eqqartuussisuuneqarfimmit siulittaasussatut toqqarneqarpoq.
Inatsisilerituujuvoq Ilisimatusarfimmilu kommuninut inatsisit pillugit ilinniartitsisuulluni. 2020-miilli kalaallit kommuninut inatsisaat pillugit ilinniartitsisuuvoq, atuakkianilu Kommunestyrelse i Grønland 2022-mi saqqummersillugu, tassani Kalaallit Nunaanni kommunit aqunneqarnerannut kommuninillu nakkutilliinermut malittarisassat sammineqarput.
Atuagaq 2022-mi saqqummermat uissuummissutigineqarpoq, Morten Engbergimmi tassani Nakkutilliisut ineqarneq pillugu suliamik suliarinninnerat isornartorsiorpaa.
Morten Engberg Nunamut Namminermut Ministereqarfimmi 1983-imi Kommunit pillugit Immikkoortortaqarfimmi atorfinikkami, kommunit pillugit inatsisilerinermut soqutigisaqalertoq, Naalakkersuisut aamma allapput. 1993-imiit 1997-imut Frederiksberg Kommunemi inatsisilerinermut pisortaavoq. 1985-imi kommunit pillugit inatsisilerinermi ilinniartitsisalerpoq aamma Kommunestyret i Danmark, sisamariarluni saqqummersinneqartoq atuakkiaralugu, kiisalu kommunit pillugit aamma ingerlatsinermut inatsisilerinernut tunngasunik atuakkianut ilanngutassianullu ilanngussaqartarluni.
Morten Engberg Folketingip Ombudsmandeqarfiani maanna sulivoq, nakkutilliinermut immikkoortortaqarfimmiilluni.
