Naalakkersuisut Nuummi Qatserisuni sulisut inissiaat inoqanngitsut qanoq aaqqiiviginiarneqarlutik suli paasititsinngillat. Inissiat akisuallaarnerat pissutigalugu nakorsat peqqissaasullu inissiat attartorumanngilaat: Qaammammut 11.000-it aamma 17.000-it koruunit akornanni akillit.
Demokraatit peqqissutsimut oqaaseqartartuata Anna Wangenheimip septembarimi tamanna pillugu allakkatigut apeqquteqarpoq, maannalu peqqissutsimut naalakkersuisumit Agathe Fontainimit (IA) akineqarpoq.
Naalakkersuisut Nuummi Qatserisuni sulisut inissiaat inoqanngitsut qanoq aaqqiiviginiarneqarlutik suli paasititsinngillat. Inissiat akisuallaarnerat pissutigalugu nakorsat peqqissaasullu inissiat attartorumanngilaat: Qaammammut 11.000-it aamma 17.000-it koruunit akornanni akillit.
Demokraatit peqqissutsimut oqaaseqartartuata Anna Wangenheimip septembarimi tamanna pillugu allakkatigut apeqquteqarpoq, maannalu peqqissutsimut naalakkersuisumit Agathe Fontainimit (IA) akineqarpoq.
Fontain inissiat kusanartut qanoq atorneqarnissaat pillugu pilersaarummik paasissutissiinngilaq, erseqqissarpaali politikkikkut iliuuseqartoqassasoq. Sulisunulli inissiat pillugit unittooqqaneq alloriarfiulertutut isikkoqarluni:
- Naalakkersuisut aaqqiissutaasinnaasunik allanik misissuipput, Qatserisunilu ineqarnermut akiliut appartinniarlugu periutsimut nutaamut Aningaasaqarnermut Akileraartarnermut Ataatsimiititaliap akuersissutaa 2025-p aallartinnerani pissarsiarinissaa naatsorsuutigalugu, Agathe Fontain Wangenheimimut akissummini allappoq.
Kingunera akisusoq
Nuummi inissiat nutaat, inissaaleqinermut aaqqiissutissatut peqqinnissaqarfimmilu sulisunut pitsaanerusumik ineqarsinnaalersitsisut sulisoqarniarnermut pitsanngorsaataallutillu sulisut ataavartuunissaannik kinguneqartussatut naatsorsuutigineqartut AG-mi upernaaq allaaseraavut.
Inissiat taakku akisuallaarnerat pissutigalugit nakorsat marluk pingasulluunniit Dronning Ingridip Napparsimmavissuani atorfimminnit soraarlutik Danmarkimut utersimasut AG-p allaaserisani nangeqattaartuni ilaatigut sammivaa. Peqqissaasut aamma taama nalunaaruteqarput. Tassa pisoq ilamaginngisamik kinguneqarsimavoq.
- Piffissami matumani Qatserisuni sulisunut inissianik innersuussisoqanngitsoq Peqqinnissaqarfik ilisimatitsivoq. Taamaallaat sulisut Qatserisuni suliffimmut atatillugu ineqarusuttut, inissiamik neqeroorfigineqartarput. Inissiat ilaat aamma utaqqiisaagallartumik ineqarnermut atorneqartarput, Fontain allappoq.
Anna Wangenheimip, suliap aallartinneraniilli malinnaasup, qanoq aaqqiisoqassasoq maanna pissangalluni utaqqivaa.
- Naalakkersuisut aaqqiissutissatut siunnersuutaat Akileraartarnermut Aningaasaqarnermullu Ataatsimiititaliap itigartippaa, oqarpoq, nangipporlu:
- Unali qularnanngilaq, tassa inissiarsuarnut akiliutit akisuut peqqinnissaqarfiup iluaqutiginngilaat. Akileraartartut napparsimasullu maanna annertuumik akiliisitaapput, taamaammat piaartumik illersorneqarsinnaasumik aaqqiissutissinneqartariaqarpoq. Aamma 2025-mut aningaasanut inatsimmut akuerineqartumut qanoq sunniuteqassanersoq ernumassutigaara, aamma Naalakkersuisut qinersisoqangajalernera pissutigalugu suliaq kinguarteqqiinnassaneraat.
