Nakorsassaaleqineq pissutigalugu ernisarfiit marluk matugallarneqartut
Peqqinnissaqarfimmi sulisussanik amigaateqarneq pissutigalugu nunap immikkoortuini marlunni ernisussiorneq allanngortinneqarpoq.
Qaqortumi Sisimiunilu ernisarfiit matugallarneqarput.
Assi: Leiff Josefsen
Peqqinnissaqarfimmi sulisunik amigaateqartoqarnera ernisussiornermut tunngatillugu unammillernartunik pilersitsivoq.
Tamatumuuna Qaqortumi Sisimiunilu ernisarfiit nakorsat immikkut ilisimasallit amigaataaneri pissutigalugit matugallarneqarput.
NUUMMUT ERNIARTORTASSASUT
Kujataani naartusut tamarmik Nuummi Dronning Ingridip Napparsimmavissuani erninissamut neqeroorfigineqassapput.
Qaqortup Napparsimmaviani 2024-mi 14-inik ernisoqarpoq.
Naartusut Sisimiuni nunaqarfinnilu minnerusuni najugallit aamma Nuummi Dronning Ingridip Napparsimmavissuani erninissamut neqeroorfigineqassapput.
Sisimiut Napparsimmaviani 2024-mi 39-t ernisimapput.
Maniitsumi naartusut tamarmik aamma nunap immikkoortuini marlunni naartusut erninerminni ajornartorsiuteqarsinnaasut Dronning Ingridip Napparsimmavissuanut erniartortinneqartareerput.
Tigulaariffik: Peqqissutsimut Innarluutilinnut Naalakkersuisoqarfik
Nakorsat amigaataanerat pissutigalugu erninermi upalungaarsimasinnaasunik illersorneqarsinnaasumik nakorsassaqanngitsoq Peqqissutsimut Inunnullu innarluutilinnut Naalakkersuisoqarfik tusagassiutitigut nalunaarummi allappoq.
Naalakkersuisoqarfik naapertorlugu Qaqortup napparsimmaviani ernisarfik matugallarneqareerpoq, Sisimiullu napparsimmaviani allannguutit 2025-mi apriilip 22-ani atuutilissapput.
Peqqinnissaqarfimmi malittarisassat erninerup nalaani ajornartorsiutit, soorlu aanaarneq, pilatsinnikkut ernineq, imaluunniit arnap meeqqalluunniit napparsimalernerata nakorsamit piginnaasalimmit suliarineqartarnissaaa qulakkeerniarlugu aalajangersaapput.
Akorngutit isumakuluutillu eqqumaffigineqartut
Ernisarfiit taakku marluk matuneqarmata naartusut Nuummi Dronning Ingridip Napparsimmavissuani erninissamut neqeroorfigineqartalissapput:
- Naartusunut ilaqutaasunullu allannguutinut akornutit ajoqutillu pillugit eqqasuuteqartoq peqqinnissaqarfimmi sulisunit maluginiarneqarpoq,“ naalakkersuisoqarfik allappoq nangillunilu:
- Erninerit sumiiffimmi sulisunik piginnaasalinnik illersorneqarsinnaasumik ingerlasuuppata anaanaasup qitornallu isumannaatsuunissaanut aalajangiisuusinnaavoq. Massakkut piffissami Qaqortumi Sisimiunilu qitiusumik napparsimmaveqarfinni tamanna qularnaarneqarsinnaanngilaq.
Sumiiffinni taakkunani ernisussiortut sulisullu allat naartusunik misissuisartut suliinnassaput.
Ernisarfiit sulisussaaleqineq pissutigalugu matugallarneqartarnerat aatsaat pilinngilaq.
Assersuutigalugu Qaqortumi ernisarfik arlaleriarluni matugallarneqarnikuuvoq. Peqqinnissaq pillugu isumaqatigiissummi politikerit 2023-p naanerani isumaqatigiissutaanni ernisarfiit pioreersut ammatinneqarnissaat misilillugu ammatiinnarneqarnissaat isumaqatigiissutigineqarpoq.
