Naleraq: Utoqqatserneq taarsiissutitaqanngitsoq inuiannut misiginerlutsitseqqiineruvoq
Qallunaat naalagaaffiat arnanut spiralilerneqarsimasunut taarsiissuteqarnianngippat ministeriuneq Mette Frederiksen tikittariaqanngitsoq, Pele Broberg isumaqarpoq.
Arnat spiralilerneqarsimasut ingerlaannaq taarsiivigineqassasut Naleqqami siulittaasup Pele Brobergip piumasaraa.
Assi: Oscar Scott Carl
Arnat spiralilerneqarsimasut qallunaat naalagaaffiannit Naalakkersuisuniillu utoqqatserfigineqarput. Tamanna ministeriunerup Mette Frederiksenip (Socialdemokraterne) peqataaffigisaani Nuummi Katuami septembarip 24-ani malunnartinneqassaaq.
Spiralilersuisimanermut qulaajaanermit nalunaarusiaq sivisuumik utaqqisaasoq ippassaq tamanut saqqummiunneqarpoq. Arnat tusagassiuutitigut saqqummerlutik oqaluttuarisaat tassani uppernarsarneqarput: akuersitinneqaqqaaratik naartunaveersaaserneqarput, tamatumalu kingorna arlallit ajornartorsiuteqarlutillu kingunerluuteqarsimapput.
Taamaammat utoqqatserneq naammanngilaq. Naleqqap siulittaasua Pele Broberg taama isumaqarpoq.
- Danmark iliuuserisimasaminut qimaariaqqiffissaaruppoq. Mette Frederiksen nunatsinnut utoqqatsersimanini oqaasiinnaasut uteqqiinnassagunigit, taava inuiatsinnut misiginerlutsitseqqiinnassaaq, tusagassiorfinnut nalunaarummi allappoq.
Arnat spiralilerneqarnikut tamarmik piaartumik 300.000 koruuninik taarsiivigineqassasut taassuma piumasaraa. Arnat 143-t aningaasat taakku amerlaqqataanniik taarsiivigeqqullutik naalagaaffik eqqartuussivimmut suliassanngortinnikuuaat.
Inuiannik nungusaaneq nassuerutigineqarli
Arnat taarsiivigineqarnissamik piumasaqartut ilaat Pele Brobergip isumaqatigaa. Utoqqatserneq nuannaarutigaara, kisianni suli iliuuseqartoqartariaqarttoq Uullat Bach DR-imut oqarpoq.
- Utoqqatserneq uannut naammanngilaq. Oqaasiinnaavoq. Aqqusaarsimasakka qaangiinnarneqarsinnaanngillat, utoqqatsertoqarnerata kingorna DR-imut oqarpoq.
Inuit kinguaassiornaveersaartinnerisigut inuiannik nungusaasimaneq ministeriunerup nassuerutigisariaqaraa Naleqqap siulittaasuata kissaatigaa. Oqaaseq spiralilersuisimanermut tunngatillugu atorneqartareersoq.
- Inuiatta nungusariarsimanerat Mettep imaluunniit Danmarkip takoqqusaarutissarinngilaat, utoqqatsernerinnarlu pineqartunut allamut saasaarutaassanngilaq. Kinguneqartumik iliuuseqartussaavusi, Pele Broberg allappoq.
Kalaallit taarsiissuteqassasut
Naalakkersuisut siulittaasuata Jens-Frederik Nielsenip peqqinnissaqarfiup Kalaallit Nunaannit 1991-imi akisussaaffigilereernerata kingorna arnat akuersiteqqaarnagit spiralilerneqarsimasut aamma utoqqatserfigai.
Arnat akuersiteqqaarnagit pinngitsaalillugit naartunaveersaaserneqarsimasut 4,5 millionit koruuninik taarsiiffigineqarnissaat siunertarineqartoq 2025-mut aningaasanut inatsimmi allassimavoq.
Naalakkersuisut taarsiissuteqarnissaq aalajangertinnagu qulaajaanerup naammassinissaa utaqqigitsik 2024-p naanerani paasissutissiissutigaat. Arnat 15-it immikkut 300.000 koruuninik taarsiivigineqarnissaat aallarniutaassalluni.
