Nalik Ventures suliniaqatigiiffik Canadameersoq suleqatigiinnissamut isumaqatigiissusiorfigaa
- Kalaallit Nunaat matumanilu suliffeqarfiit ineriartortitsinissaq siuariartornissarlu anguniartuarnissaa pillugu nunat tamalaat akornanni amerlanerusunik isumaqatigiissusiortarnissaat pingaaruteqarpoq, Nalik Ventures tusagassiuutitigut nalunaarummi allappoq.
Assi: Nalik Ventures
Northern Economic Development Agency imaluunniit CanNor Canadami nunap inoqqaavisa suliniaqatigiiffiat ukiut 15-nit missaanni Canadami Inuit pissarsissutigisaanik ineriartortitsillunilu aaqqiissutinik pilersitsisarnermigut angusarissaarsimavoq.
Maanna suleqatigiinnissamik isumaqatigiissusiornerup kingorna angusarissaarneq nunatta misilittaqarfigisussanngorpaa.
- CanNor aamma Nalik Ventures akunnerminni suleqatigiinnissamut isumaqatigiissut nunap inoqqaavisa suliniaqatigiiffii aammalu suliffeqarfiutaasa Canada aamma Nunarput akimut suleqatigiilernissaannut alloriarneq siulliusussaassaaq.
- Isumaqarpunga immitsinnut ilisimasassarsiorfigilluarnissarput aammalu suliniaqatigiiffitta tamatsinnut iluaqutaanissaa qularutissaanngitsoq, Nalik Ventures pisortaanera Thomas ”Tyt” Mogensen oqarpoq.
CanNor ilaatigut takornariaqarnerup silarsuaani nutaaliornikkut eqqarsarnissaminnik misilittagaqarput. Matumani Connor piffikkaartuni ineriartortitsinikkut misigisassarsiortitsinikkullu nutaaliorsimavoq.
- CanNor-mi præsidentitut Nalik Ventures suleqatigiinnissamut isumaqatigiissusioqatigineranut nuannaarpunga, aammalu Canadami Kalaallit Nunaannilu pisisartunik qaninnerusumik suleqatigiissitsilernissap naleqassusaa isiginiarlugu. Suleqatigiinnissamut isumaqatigiissut una issittumi ataatsimoorussamik aningaasaqarnikkut ineriartortitsinissaq aammalu siammaanissaq nukittorsassavaa, Jimi Onalik, CanNorimeersoq oqarpoq.
Suleqatigiinnerup Kalaallit Nunaata Canadallu akornanni aningaasaqarnikkut siuariartornermut aningaasaliinernullu nutaanut tapersersuissaaq.
