SIUMUP IMMIKKUT ITTUMIK ATAATSIMEERSUARNERA
Naliliineq: Siumumi pakasaalluni uppisitseriarneq partiip akisunaarpaa?
Partii Siumut kommunalpolitikkimi suli nukittoorujussuuvoq, kisianni nuna tamakkerlugu politikkimi partii ammuinnaq ingerlarsorpoq, ullumikkullu Inatsisartuni partiit minnersaasa tulleraat. Partiimi suna kukkussutaasimava, qinersisartut tapersersuisut ikiliartuinnarnerannut, taamaalillunilu innuttaasut tatiginninnerat partiip oqaluttuarisaanerani appasinnerpaaffimmiilersimaneranik kinguneqarluni? Akissutit ilagisinnaavaat ilaasortat siuttunngorniarlutik tamaviaarnissaminnut tunuarsimaaruteqartannginnerat.
29. november 2020 pisumi immaqa siulittaasunngorniunneq kinguneqarnerpaaq immaqa pivoq, tassani Erik Jensenip Kim Kielsenip siulittaasuuneranut unammillernermini taasinermik arfinilinnik ajugaaffigimmagu. Tamatuma kingorna Siumut Inatsisartunut qinersinermi partiini anginersaattut inissinniartarnermini iluatsinngilaq.
Asseq toqqorsivimmit: Leiff Josefsen
Arfininngornermi Siumut immikkut ittumik ataatsimeersuassaaq. Matumani Siumup oqaluttuarisaanerani nutaaliaanerusumi kingumut qivialaassaagut.
Erik Jensenip novembarip 29-ani 2020 ajugaanera sioqqullugu, sallaatsumik oqaatigissagaanni Siumup iluani "politikikkut sorsuuterujussuarneq" pisimavoq, tamannalu pivoq Kim Kielsenip siulittaasutut tunuartinneqarnissaanik siunniussaqarneq tunngavigalugu.
Partiip Inatsisartuni ilaasortaatitai arfineq marlunnik ikinnerunngitsut aggustimi 2020-mi Kim Kielsenip tunuarniarnissaa piumasaraat. Ilaatigut Erik Jensen, taamani aatsitassanut sulisoqarnermullu Naalakkersuisoq uppisitsinianut peqataavoq, naak Kielsenip Naalakkersuutitaani peqataagaluarluni.
Inatsisartuni ilaasortat arfineq marluk, Kielsenip tunuarnissaanik piumasaqartut tassaapput Anders Olsen, Nikkulaat Jerimiassen, Henrik Fleischer, Erik Jensen, Laura Táunâjik, Jens Danielsen aamma Hermann Berthelsen. Taakku piumasaqarnerannut tunngavilersuutit ilagaat Siumup qinersinermi neriorsuutai Kim Kielsenip malissimanngikkai, pingaartumik aalisarnermut aammalu arfernik pisassiissutinut tunngatillugu, kiisalu Kielsenip namminissarsiorlunilu tusaanianngitsuuneranik pisuutitsineq.
Partiip siulittaasuanik uppisitsiniarnermi, taamani aamma Naalakkersuisut siulittaasuattut inissisimasumik saassussinertut taaneqarsinnaasumi toqqaannartumik Vivian Motzfeldt peqataanngilaq, Inatsisartuneeqataagaluarlunimi Kim Kielsenip uppisinneqarnissaanik piumasaqaammut atsioqataanngilaq. Taassumalu isumaqatigiissitsiniaraluarnini iluatsinngitsoorpaa. Tamatuma kingorna Jensen ajugaammalli siulittaasumut tunniusimalluni tunuliaqutaavoq, politikkikkut siulittaasup tulliatut inissisimanermini, tamatuma kingorna Jensenip tunuarnerani siulittaasuugallartunngorpoq.
Kielsen sassaqqippoq
Kim Kielsenilli imaaliallaannaq tunniutiinnartitassaanngilaq, taannami Naalakkersuisunut siulittaasuattut ingerlaannarpoq, Erik Jensenip 29. november 2020-imi ataatsimeersuarnermi nalinginnaasumi qinersinermi arfinilinnik qinerneqarluni ajugaaffigigaluaraani.
Inatsisartunut qinersineq 6. april 2021-mi ingerlanneqartoq aamma ersersitsivoq innuttaasut Kielsenimut tatiginninnerat suli attanneqartoq, tassami Erik Jensen 659-inik ajugaaffigaa.
Tamanna aamma tunngavigalugu Kielsen Siumup tulliani nalinginnaasumik ataatsimeersuarnerani Qasigiannguani 2023-imi siulittaasutut qinigassanngorteqqippoq. Taamaattorli ataatsimeersuaqataasut qinersisinnaasut 68-it akornanni Erik Jensen 39-nik taaneqarluni ajugaavoq, Aki-Matilda Høegh-Dam 16-inik qinerneqartoq, Kim Kielsenilu 13-inik qinerneqarluni.
Siumumi partiimi eqqissiviilliorneq annertooq aamma partiimut kinguneqarpoqtassami partiip unammillertitoqarsua, Inuit Ataqatigiit, Inatsisartunut qinersinermi 6. april 2021-imi nukittunerulersippaa, tassami IA ajugaavoq aqqaneq marlunnik ilaasortaatitaqalermat Siumullu qulinik ilaasortaatitaqalerluni.
Kisianni IA-p siuttuuffiani suleqatigiinneq aamma taakku marluullutik siornatigut unammiuaartuarnikuugaluit siuttuunertik attatiinnarsinnaanngilaat, tassami Demokraatit ukioq manna qinersinermi ajugaapput.
Erik Jensen piumasaqarpoq
Qinersinerup kingorna Demokraatit suleqatigiinnermik pilersitsisinnaasimapput sapinngisamik siammasinnerpaamik, tassanilu Siumut, IA aamma Atassut peqataapput.
Erik Jensenip kingullertigut piumasarisimavaa partiip Siumup naalakkersuisooqatigiinni peqataajunnaarnissaq eqqarsaatigisariaqaraa, tassanilu siulittaasuugallartup Vivian Motzfeldtip akerlilerpaa.
Vivian Motzfeldt-ip nunanut allanut tunngasunut Naalakkersuisutut eqqissilluni sulisinnaatitaanera killeqarpoq, tassami taamatut atuuffeqarnermi saniatigut partiimini, aqagu ataatsimeersuartussami annertuumik nukinnik atuivoq, taaannalumi aamma siusinnerusukkulli nalunaarnikuuvoq sassarluni.
Partiip inuusuttaasa partii inuusuttumik siulittaasortaartinneqartariaqartoq, tassa Ineqi Kielsenimik, taamatuttaaq immikkoortortaqarfiit arlallit suli upperaat "Aleqap sunniutaa" ukiut 10-t sinnerlugit matuma siornatigut pisimasoq suli periarfissaasoq. Apeqqut ammasoq aamma tassaavoq Kielsen "Siumoqqinnertut" siulittaasunngorniaqqinnissaminut pilersaaruteqarnersoq?
Malunnaateqarpoq partiip aaqqiissutissanik nassaarnaveeqqasoq, 2021-mi aammalu kingusinnerusukkut 2025-mi Inatsisartunut qinersisoqarnerani ajorsartitaasimanerup kingorna.
Taamaakkaluartoq partii kommunalpolitikimi suli partiit annersaattut inissisimavoq, naak maanna kommunini tallimani borgmesterit marluinnanngornikuugaluartut.
Pissutissalimmik inerniliisoqarsinnaavoq partiip qullersaqarfia ilaasortaminut pisussaaffeqartoq eqqissiviilliornernik ilaasortaminut nalaataqartitsinaveersaarnissaminut, Inatsisartuni qinersisoqarnerani ajorsarsimanerup assinganik kommunini misigisaqassanngikkunik, malunnarpormi partiip siuttuisa tunuliaqutaat suli tassaniittut, partiip qullersaqarfiani imminnut assortuuttutut inissisimanerani.
Taamaattumik ataatsimeersuarneq pikkunaatsoorfiunavianngitsoq ilimagisariaqarpoq, ilaatigummi aamma apeqqutaagami Erik Jensen qanoq nukittutigisumik inissisimanersoq, partiip naalakkersuisooqatigiinnit aninissaanik piumasaqarninerminut atatillugu.
