Nalunaaqutalerngusaanneq

Nalunaaqutaq ingerlaarfitoqaanut utertinneqassava aasaaneranilu nalunaaqutaq atorunnaarsillugu?

Apeqqutit taakkua oqallitsitsingaatsiarput. Atsiornernik katersisoqarpoq, Siumut inatsisissatut siunnersuusiorpoq taannalu tusarniutaavoq.

Inuppassuit nalunaaquttap ingerlanerata aaqqinneqarnera kingulleq atuukkunnaassasoq isumaqarput. Tusarniaanermili kattuffiit, Naalakkersuisoqarfiit suliffeqarfiillu akissutaat nalunaaquttap UCT-2-mit UCT-3-mut utertinneqarnissaa qularnartoqartinneruaat. Naalakkersuisunut ilaasortaq qularutiginnissinnaavoq.

- Nalunaaquttap piffissami taama sivikitsigisumi nikiseqqinnera inuiaqatigiinni inuussutissarsiortunilu paatsuunganermik eqqissisimannginnermillu pilersitsisinnaavoq, Aningaasaqarnermut Naalakkersuisoqarfik akissummini allappoq. Akissummi nalunaaquttap maannatut ingerlanissaa arlaleriarluni tunngavilersorneqarpoq.

Siumup siulittaasua, Erik Jensen, Naalakkersuisoqarfimmut pineqartumut politikkikkut akisussaanerpaammat AG-p attaveqarfigaa.

Partiippit UTC-3-mut uteqqinnissaq pillugu siunnersuutaanut akerliuivit?

- Naamik, isumaqataavunga. Partiip suliami uani isumaa tapersersorpara. Kisianni tusarniaanermi akissut allaffissornerminngaanneersuusoq paasineqassaaq, uangalu atorfilittat suliaannut soorunami tatiginnittuuvunga.

Akissutit atuarpigit?

- Angalaninni ulapaangaatsiareerlunga uteqqeqqammerpunga, Erik Jensen akivoq. Taassuma aningaasanut aappaagumut inatsisissaq piareersarlugu saqqummiullugulu ulapputigeqqammerpaa.

»Pissusissamisoorpallaanngitsoq«

Qupanuk Olsenip atsiornernik katersineranit oqallittoqalerpoq. Inuit 2.700-t UTC-3-mut uteqqinnissaq kissaatigalugu atsiorput. Taamaalillutik Danmarkimut nalunaaquttap akunerinik sisamanik nikingasoqaqqilissasoq kissaatigaat. Taassuma saniatigut aasaanerani nalunaaquttap ingerlaneranut nuuttarneq atorunnaassasoq kissaatigaat.

- Nalunaaqutaq allanngortinneqartuaannartoq qatsupparput, Qupanuk Olsen Sermitsiamut oqarpoq.

Tusarniaanermi akissummi qulartut Siumup siunnersuutaa pillugu 3.000-t inorlugit atsiortoqarsimasoq maluginiaqquaat.

Peqqissutsimut Naalakkersuisoqarfiup piffissaq atorneqaleqqammersoq inuit peqqissusaannut innarliinngitsutut nalilerpaa.

- Aasami nalunaaquttap ingerlanera atorunnaaraangat piffissalluunniit ingerlaneranut allamut nuuttoqaraangat inunnut aningorsinnaanngisamik sivisuumilluunniit sunniuteqarnerluttarnera uppernarsaatissaqanngilaq. Aasami nalunaaquttamit ukiup nalunaaqutaanut ikaarsaarnermi killormullu ulluinnarni sinnakinnerulaarnerup pianik inooriaatsimut sivikitsumik sunniuteqarnerlussinnaavoq. Sinnakinnerulaarnerulli peqqinnannginnera ilisimatuussutsikkut uppernarsaatissaqanngilaq. Attaveqaasersuutinut Naalakkersuisoqarfiup nunatsinni inuit illuinnarni inooriaasaasa assigiinnginnerujussuat maluginiarpaa.

- Ullut nunatsinni takissusaat ukiup ingerlanerani nunallu immikkoortuini assigiinngitsuni nikerartorujussuupput. Taamaattumik ajornartorsiutit taakkartorneqartut inuiaqatigiit qanoq amerlatigisut nalaattarneraat nalileruminaallunilu paasiuminaappoq.

Nunarsuarmi oqallinneq

Aasaanerani nalunaaquttap piffissallu ingerlanerata allanngorneranut sunniutit ulorianarsinnaasut kalaallit kisimik ernummatiginngilaat. Nunarsuarmi sumiiffinni amerlasuuni sammisaq aamma oqallisaasarpoq. Sumiiffiit amerlasuut aamma akerliupput.

Videnskab.dk-p allaaserisaa naapertorlugu EU-mut naalagaaffiit ilaasortaasut 2018-imi apersorneqarput, taakkunannga 4,6 millionit sinnerlugit innuttallit 84 procentiisa piffissap ingerlanerata allanngortittarunnaarnissaa taamani kissaatigaat.

UTC-2-li malillugu nalunaaquttap maanna ingerlanera aningaasatigut pitsaaquteqartoq tusarniaanermi akissutit ilaanni allaqqasoqarpoq.

 - Nalunaaquttap ingerlanitoqaanut uteqqissagutta Air Greenlandimut inuiaqatigiinnullu pitsaaqutit atuukkunnaarnissaat ernumanarpoq. Soorluttaaq nunarsuarmioqatitsinnit eqqumiigineqarsinnaasoq piffissap ingerlanera nutaaq atuutilerseqqammiinnarlugu allanngortitseqqinneq, Aalisarnermut Naalakkersuisoqarfik, politikkikkut Kim Kielsenimit akisussaaffigineqartoq allappoq.