»Nalunaaquttap akunneri tamaasa aningaasanik annaasaqartarput«

Dronning Ingridip Napparsimmavissuani nakorsat pingasut sulisullu pingaarutillit allat Qatserisunut, napparsimmavimmit ungasinngitsumiittunut, sulisunut inissianut nutaanut kusanartunullu nuunnissaq akisuallaartoq isumaqaramik Nuummit nuupput.

Pisoq Peqqisstusimut Naalakkersuisumut Agathe Fontainimut (IA) naalakkersuisunullu allanut ilungersunarpoq. Ajornartorsiut aaqqinniarlugu – imaluunniit annikillisinniarlugu – ineqarnermut akiliutit appartinniarlugit pilersaarusiortoqarsimavoq. Pilersaarulli Inatsisartut Aningaasaqarnermut Ataatsimiititaliaanit itigartitsissutigineqarpoq.

Tamanna Aningaasaqarnermut Naalakkersuisunut ilisimatitsissummi maanna tamanut saqqummiunneqartumi atuarneqarsinnaavoq.

AAMMA ATUARUK

Nakorsaq alla soraartoq

- Suliap ilungersunassusaa eqqarsaatigalugu ineqarnermut akiliutit qaffasissut pillugit ajornartorsiummut allatut aaqqiisoqassasoq Naalakkersuisunut kajumissaarivoq. Aningaasaqarnermut ataatsimiititaliap Naalakkersuisut inngersuutaat akueriniarnagit aalajangerpoq, ataatsimiititaliaq aalajangiissumi allappoq.

Annikitsuinnaasoq

AG-mi Sermitsiamilu siornatigut allaaserineqareersutuut, suleqatigiissitat illorsuarni Qatserisuniittuni pingasuusuni ineqarnermut akiliutit qaffasinnerujussuat pillugu aaqqiissutaasinnaasumik suliaqarput. Tassani Namminersorlutik Oqartussat inissiaatileqatigiiffiannut llluut A/S-imut ukiumut 3 millionit koruuninik ernialigaanngitsumik taarsersugassaanngitsumillu taarsigassarsisitsisoqarnissaa pineqarpoq. Katillugu ukiuni 18-ini akilersuisoqassaaq, katillugit 54 millionit koruuninik taarsigassarsisitsisoqassalluni.

Maannali Aningaasaqarnermut Ataatsimiititaliap aningaasaliissutit immikkoortuisa siulliat, 3 million koruuninik aningaasaliissut, akueriumanngilaa.

Aningaasat nunatta karsianit pissarsiarineqartussat sunniutaat annikippallaarput, ataatsimiititaliaq isumaqarpoq. Ineqarnermut akiliutit appartinneqarnerat annikippallaarpoq, sulisussarsiornermullu iluaqutaavallaarnavianngilaq, tunngavilersuisoqarpoq.

- 3 million koruuninik taarsigassarsisitsiniarluni siunnersuut ineqarnermut akiliutip annikitsuinnarmik appartinneqarnissaanut iluaqutaasinnaasoq ataatsimiititaliaq isumaqarpoq. Ineqarnermut akiliutit qaffasissusiat sulisussanik pingaarutilinnik atorfinitsitsinissamut akornutaanerannut iluaqutaasussatut naammanngilaq, ataatsimiititaliaq paasissutissiinermini allappoq.

AG-mi allaaserineqareersutut inissiat qaammammut 10.600 koruunit 17.000 koruunillu akornanni akeqarput. Inissiat sisamanik initallit akisunerpaasut Naalakkersuisut aningaasaliineratigut qaammammut 2.000 koruunit missaannik akikillissapput.

Tamatuma qanoq kinguneqarsinnaanera pillugu Naalakkersuisut imminnut eqqaasittariaqartut aningaasaqarnermut ataatsimiititaliap ilaatigut eqqaasitsissutigaa. Matumani ataatsimiititaliap naalakkersuisoqarfimmik ataatsimeeqateqarnera pineqarpoq.

- Qatserisunit ajornartorsiutit aaqqiissutissarsineqarsimanngippata ineriartorneq ernumanartoqartillugu aamma sulisunut aalajangersimasunut, napparsimasumut peqqinnissaqarfillu aningaasaqarneranut kingunerlutsitsissasoq Naalakkersuisut namminneq suliamut atatillugu ilisimatitsipput, ataatsimiititaliaq allappoq.

Akunnermiit akunnermut

Politikeri upernaarli qanimut malinnaalersoq tassaavoq Demokraatineersoq Anna Wangenheim.

- Ajornartorsiutip aaqqiiviginissaa qanoq nukinginnartigaa?

- Nukinginnarpoq, maannalu aaqqiisoqartariaqarpoq. Inuiaqatigiit akunnermiit akunnermut, ullormiit ullormut, qaammammiit qaammammut nukissanik annaasaqarlutillu akissaajartut isumaqarpunga. Neriuppunga ukiumiit ukiumut ilanngullugu oqaatigissanngikkipput!, Anna Wangenheim akivoq.

AAMMA ATUARUK

Nakorsaq piumaneqarluartoq aallarniarluni pilersaaruteqarpoq: Ineqarnermut akiliuteqarnissamut akissaqanngitsoq

Inissiarsuit pingasut katillugit 90-inik initallit pillugit suliniutip tunngaviusumik aningaasaqarnera ernummatigaa.

- Peqqinnissaqarfik inissianut inoqanngitsunut maanna attartortissinnaanngisaminut akiliisassappat ullutsinni peqqinnissaqarfimmi imminut akerlerisut - kusanaatsuliornerillu annersarissavaat, ilanngullugu oqaatigaa.

AG-p peqqissutsimut naalakkersuisoq Agathe Fontain (IA) paasiniaalluni apeqqutinik arlalinnik apeqquteqarfigaa, allaaserisamili matumani akissutinik tigusaqanngilaq.

Naammaginnikkunnaarnermut pissutaasoq

Peqqinnissaqarfimmili sulisut Namminersorlutik Oqartussat itigartikkaangatigit Naalakkersuit iluaalliuutigisaraat qularnanngilaq. Sulisussarsiorneq attassiinnarnissarlu annertuumik ukkatarineqarput, inissiallu pillugit ajornartorsiut aaqqiissuteqanngitsoq nunatsinni aqutsisut aaqqiissuteqarfigerusuppaat.

Peqqissutsimut ataatsimiititaliarsuup sulinermini unammillernartut taakkorpiaat aamma ersersinniarlugit nukinnik atuiffigingaatsiarpai. Peqqissutsimut ataatsimiititaliarsuup »qitiusumik ajornartorsiutaanerarlugu« eqqarsaatissiissuimini allappaa.

- Inissaqarniarneq naammaginnikkunnaarnermut pissutaavoq. Nuummi inissiat qanoq issusaat amerlassusaallu ajornartorsiutaangaatsiarpoq. Peqqinnissaqarfiup nammineq inaatiminik sulisuminut innersuussisinnaanera sakkutsialaasoq pingaaruteqarlunilu attatiinnartariaqartoq ataatsimiititaliaq allappoq.