Nammineq inuunerisaq pillugu oqaluttuarisaanermik peqarnissamut pisinnaatitaaffik
Svendborgimi Danmarks Forsorgsmuseumimi pisortaq suliniummillu aqutsisoq Jacob Knage Rasmussen aamma suliniummi suleqataasoq Charlotte Mortensen angerlarsimaffiup avataanut inissinneqarsimasunik inunnik, inuunerup oqaluttuassartaanik ataqatigiissumik peqarusuttunik, ikiuiniarlutik siunnersuiniarlutillu ulapipput.
Katersugaasiviup pisortaa suliniummillu aqutsisoq Jacob Knage Rasmussen suliniummilu suleqataasoq Charlotte Mortensen suliarpassuit ilaannik tigummiartut.
Assiliisoq: Knud Fl. Larsen
Nammineq inuunerisaq pillugu oqaluttuarisaanermik peqarnissamut pisinnaatitaaffik tassaavoq ukiuni sisamani suleqatigiinnertalimmik suliniut, Danmarks Forsorgsmuseumimit, Københavns Professionshøjskolemit, Rigsarkivetimit aamma peqatigiiffimmit TABUKA-mit – nuna tamakkerlugu maannakkut siornatigullu angerlarsimaffiup avataanut inissinneqarsimasut pillugit peqatigiiffimmit suleqatigiiffiusoq. Aningaasanut inatsimmi aningaasanit immikkoortinneqarsimasunit namminersortullu aningaasaateqarfiinit aningaasat pissarsiarineqarput.
Maannakkut siornatigulluunniit angerlarsimaffiup avataanut inissitaasimaguit, immikkut ilisimasalinnit ikiorneqarlutit illit pillutit suliaq pillugu ilisimasaqalernissamut maanna immikkut ittumik periarfissaqarputit. Akeqanngitsumik.
Ikiorneqarnissaq pisariaqarpoq
Ulloq manna tikillugu suliniut 320-nit saaffigineqarpoq, taakkunannga ataaseq Kalaallit Nunaannit. Nittartagaq Sermitsiaq Svendborgimiippoq, tassanilu suliniummi suleqataasut marluk suliniut pillugu pimoorusseqalutik tunniusimaqalutillu oqaluttuarput.
- Soorunami Kalaallit Nunaannit angerlarsimaffiup avataanut inissiinerit meeravissianngortinneqarnerillu pillugit oqaluttuat ilisimavavut, taamaattumik Kalaallit Nunaannit ataasiinnarmik saaffigineqarnerput tupigusuutigaarput, Jacob Knage Rasmussen oqaloqatigiinnermik aallarniilluni oqarpoq.
Jacob Knage Rasmussen oqaluttuarisaanermik ilisimatuujuvoq, 2010-miillu meeqqanut tunngasunik sulianik suliaqartarsimalluni.
Angerlarsimaffiup avataanut inissiinermut suliat annertusinnaapput.Tusindilikkaanik qupperneqarsinnaapput. Aamma annikitsuararsuusinnaapput, immaqa assiliaq ataasituaq allagartaatarlu, immaqa meeqqat angerlarsimaffianik allaqatiginnittarsimanermit allakkat. Immaqaluunniit meeqqamik, angajoqqaavinik pissutsillu pillugit allaaserisat.
- Aamma ilaannikkut nassaanngivissortarpugut. Atortussammi peerneqarsimasinnaapput, Charlotte Mortensen ilassuteqarpoq.
Danmarks Forsorgsmuseumimut Svendborgimiittumut isaariaq.
Assiliisoq: Knud Fl. Larsen
Atortussat taama annertutigisut misissuiffigissallugit ajornaatsuinnaanngilaq. Aammami suut saqqummerumaarnersut nalunarsinnaavoq. Immaqa misigisaq alianartoq. Taamaattumik namminermut suliaq pillugu misissuiniarluni paasisaqarnerujumallunilu aalajangeraanni ilisimasalimmik piginnaasaqarluartumillu ikiorneqarnissaq pitsaasinnaavoq. Suliarujussuusinnaasumik aallartitsigaanni tapersersorneqarneq pitsaasuusoq misilittakkat tamarmik takutippaat.
Soorunami inuppassuit pereersut eqqarsaatigiumanngilluinnarpaat. Misigisat annertuut ukiorpassuarni toqqorterneqarsimapput, taamaattumillu tamakku pillugit isumaliutersuutiginninnissamut pissutissaqanngilaq. Taamaattumik meeraanermit allakkat paasissutissallu atuarneqartariaqarnersut aalajangersimalluinnartumik akineqarsinnaanngilaq. Tamanna inuttut ataasiakkaatut nammineq aalajangigassaavoq.
Meeqqat pillugit paasissutissat allagaapput, taakkulu maanna siornatigullu angerlarsimaffiup avataanut inissinneqarsimasunit takuneqarsinnaatitaapput. Assersuutigalugu tassaasinnaapput inissiisarfimmit allattukkat, nalunaarutit, iliuusissatut pilersaarutit, aalajangiinerit assigiinngitsut naammagittaalliuutillu.
Isummernerit assigiinngitsut
- Kinaavunga? Sooruna angerlarsimaffiup avataanut inissinneqarsimasunga? Apeqqutit amerlasinnaallutillu assigiinngitsorpassuusinnaapput. Imaassinnaavoq ukiorpassuit matuma siorna qanoq pisoqarsimaneranik eqqarsaatiginningaalertoqarsimasoq, Jacob Knage Rasmussen nangippoq.
- Suliamik suliaqaraangatta ukiorpassuarni ilisimasat misilittakkallu atortarpavut. Naalagaaffiup toqqorsiviani, Nunatta Katersugaasiviani Allagaateqarfianilu, Kalaallit Nunaata ministereqarfiata toqqorsiviani allanilu suliamut tunngasunik nassaarsinnaasarpugut. Pisimasut tamaasa ataatsimut isigalugit inississoruminaassinnaasarput, pisimasullu oqaluttuarineqarneri paasiuminaassinnaallutillu ukiulersuinerit ajornakusoorsinnaapput.
- Aamma eqqaamasariaqarparput qanoq pisoqarsimanera assigiinngitsunik isumaqarfigineqarsinnaammat.
Pisinnaatitaaffiuvoq
Maannakkut siornatigulluunniit angerlarsimaffiup avataanut inissitaasimaguit, imminut pillutit pissutsinillu atukkannik paasissutissinneqarnissamut pisinnaatitaavutit, taamaalillutit kissaatigigukku pereersut maannakkullu pisut ataqatigiisissinnaavatit.
- Paasisaqarnerujumasut uannut imaluunniit Danmarks Forsorgsmuseumimi Svendborgimiittumi Charlotte Mortensenimut attaveqarsinnaapput, katersugaasivimmi pisortaq Jacob Knage Rasmussen naggasiivoq.
