Namminersorlutik Oqartussat ingelatseqatigiiffiutaat amigartooruteqangaariarluni sinneqartooruteqartoq
Nalik Ventures 2023-mi 4,4 millionit koruuninik sinneqartooruteqarpoq, ukiup siuliani 82,5 millionit koruuninik amigartooruteqarsimalluni.
Nalik Venturesimi pisortaanerup Thomas „Tyt“ Mogensenip ukiumut angusat naammagisimaarpai.
Assiliisoq: Nalik Ventures
2022-p ajorluinnartumik ingerlareernerata kingorna, Namminersorlutik Oqartussat inuussutissarsiornermik ineriartortitsinermut ingerlatseqatigiiffiutaata Nalik Venturesip amigartooruteqangaarfiani, 2023-mi aningaasaqarneq pitsaanerulerpoq.
Nalik Ventures taamatut tusagassiuutinut nalunaaruteqarpoq.
2023-mi sinneqartoorutit 4,4 millionit koruuniupput, tamannalu pisortaanerup Thomas ‘Tyt’ Mogensenip naammagisimaarutigaa:
- Ukiumut angusat tunaartaqarnitsinnut annertuumillu sulisimanitsinnut takussutissaammata iluarisimaarpavut. Suliniutitta nutaat nunallu tamalaat akornanni attaveqaatitta atorluarnerisigut nunatsinni aallarnisaasunut tapersersueqqinnissarput qilanaaraarput, pisortaaneq oqarpoq.
Thomas ‘Tyt’ Mogensen 2023-mi oktobarip aallaqqaataani pisortaanertut atorfinitsinneqarpoq. Ukiorpassuarni pisortaanerusimasoq Karsten Høy marsimi soraarmat taanna pisortaaninngorpoq.
Ajornannginnerusumik aningaasaliinissamut qulakkeerinnissasoq
Aningaasaqarnikkut pitsaasumik inissinnerup kalaallit aallarnisaasut nutaaliornermikkut alliliinikkullu periarfissagissaarnerulernissaannut, ineriartortsinissaannut anguniagaqarnerannullu Nalik Ventures ikorfartuissasoq, aamma ilisimatitsissutaavoq:
- Matumani kommuunini inuussutissarsiornermut atatillugu siuarsaaviit, Advisory Board-itut ataatsimoortinneqarsimasunut, ilisimasanik, malinnaatitsinermik siuariartortitsinermillu immikkut isiginiartussanik suleqateqarnissap nukittorsaqqinnissaa pingaarnertut inissisimassaaq.
- Advisory Board aqqutigalugu sineriak tamakkerlugu inuussutissarsiortut ajornannginnerusumik aningaasaliinernut periarfissaqarsinnaanerat Nalik Venturesip annertusaavigerusuppaa, Nalik Ventures allappoq.
Taassuma avataasigut nunat tamalaat akornannit attaveqaatit annertusarniarlugit EU-mit aningaasaliissutit Nalik Venturesip angusimavai. Nunatsinni takornariaqarnikkut ingerlatsinerup nunallu tamalaat akornanni niuerneq ilanngullugu iluaqutaasussamik ilisimasanik paasissutissanillu annertusaanissaq suliniutip siunertaraa.
