Nanoq takuneqartoq – atuarfimmiit nunaliarneq taamaatiinnarneqarpoq
Nanoq Paamiut ungasinngisaani pingasunngornermi ullaap tungaani takuneqarsimavoq. Nanoq illoqarfimmiit qanoq ungasitsiginersoq suullu tungaanukarnersoq paasiniarlugu Paamiuni politiit misissuipput.
Toqqorsivimmit assilisaq.
Aalborg Zoo
Pingasunngorneq ullaakkut nanoq Paamiut eqqaani takuneqarsimavoq.
Kalaallit Nunaata Politiivini pigaartut pisortaat Jakob Andreassen Sermitsiamut taama ilisimatitsivoq.
- Nanoq illoqarfimmiit qanoq ungasitsiginersoq suullu tungaanut ingerlaarnersoq paasiniarlugu Paamiuni politiit maanna alakkarteripput. Maannakkorpiaq annertunerusumik oqaaseqarsinnaanngilagut, Jakob Andreassen Sermitsiamut oqarpoq.
Nittartakkani attaveqatigiiffiusuni Paamiuni innuttaasut arlallit ernumassuteqarlutik allassimapput. Meeqqammi atuarfiannit atuartut asimut ullumi pisuttussaapput. Atuarfilli nalunaarpoq meeqqat atuartut atuarfimmut utereersimalersut, nunamiinnissarlu taamaatinneqartoq.
Nannut arlallit illoqarfiit nunaqarfiillu qanittuaniittut ukioq manna takuneqartarput. Kujataani annertunerujussuarmik sikorsuaqarsimanera tamatuminnga kinguneqarnerarneqarpoq.
