Nanortalik piffissap ilaani nakorsaqartassanngilaq

Nanortalimmi innuttaasut illoqarfiup peqqissaaviata aggustip qaammataani allagarsiissutaani atuarsinnaavaat illoqarfimmi septembarimi, juullip ukiortaallu akornanni nakorsaqarnavianngitsoq.

Sermitsiap peqqinnissaqarfimmi pisortat pisoq pillugu apeqquteqarfigai, pisortarlu Tine Amondsen allakkatigut akissuteqarluni ilisimatitsivoq nakorsat amigaataanerat pissutaalluni sulisussarsiorneq ajornakusoortoq:

- Ilumoorpoq Nanortalimmi nakorsiartarfik piffissap ilaani nakorsaqartassanngilaq. Sulisussarsiornerup ajornakusoornera pissutaavoq. Nakorsaqannginnerup nalaani nakorsat immikkut ilisimasallit Nuummiittut attaveqaatit atorlugit ungasianiit nakorsiarfigineqarsinnaassapput, pisortaq allappoq.

Peqqinnissaqarfik nuna tamakkerlugu nakorsiartarfinnut tamanut nakorsanik pissarsiniarluni ilungersortuartoq, ajoraluartumilli tamanna ajornaatsuujuaannanngilaq nassuiaatigaa.

Attaveqaatitigut ungasianiit nakorsiartitsineq aaqqiissutissaavoq

Nanortalimmi pisut ungasianit iliuuseqarfigineqassapput:

- Nunami peqqinnissaqarfinni aalajangersimasumik atorfinnut nakorsat immikkut ilisimasallit atorfinitsinniarnerisa ajornakusoorneranni, peqqinnissaq pillugu isumaqatigiissutip novembari 2023-meersumi, najugaqarfinni nakorsaqarniarnikkut ajornakusoorfiusuni nakorsaqanngitsuniluunniit attaveqaatit aqqutigalugit ungasianiit nakorsiartitsisartunik pilersitsisoqarpoq, Tine Amondsen allappoq.

Aamma ilisimatitsivoq nakorsat attaveqaqatigiittarfiisigut nakorsiartitsinerup saniatigut nakorsat Nuummi Dronning Ingridip Napparsimmavissuaneersut imaluunniit nunap immikkoortuani napparsimmavimmit piffissap ilaani pulaartartussaasut.

Attaveqaatitigut ungasianiit nakorsiartitsisarnerup saniatigut Nuummi Dronning Ingridip Napparsimmavissuani nakorsat piffissap ilaani tikeraartassagut ilanngullugu paasissutissiissutigaa.